ԳԱՄԻՇԼԻ
ՀՄԸՄ-ի Գամիշլի Մասնաճիւղը հիմնուած է 1931-ին:
«Գանձասար»ի թղթակից Անի Պօղիկեան ՀՄԸՄ-ի Գամիշլիի ներկայացուցիչին հետեւեալ հարցումները ուղղեց.
Հ.- Պատմեցէք խնդրեմ տողանցքի մասնակցութեան նախապատրաստական աշխատանքներուն մասին:
Պ.-Մօտաւորապէս մէկ ու կէս ամիս առաջ ՀՄԸՄ-ի Շրջ. Վարչութենէն նամակ ստացանք միջմասնաճիւղային խաղերուն եւ տողանցքի Գամիշլիի մասնակցութեան ծրագիրին մասին, քանի մը օր վերջ արդէն ՀՄԸՄ-ի բոլոր միաւորները՝ մարզական, սկաուտական եւ փողերախումբը գործի լծուեցան: Առօրեայ փորձեր կատարեցինք ՀՄԸՄ-ի դաշտին մէջ: Տրամադրութիւնները բարձր էին, շատ ուրախ եւ շատ քաջալերուած էին եւ մեծ թիւով մասնակցելու պատրաստակամութիւն ունէին, սակայն, ինչպէս տեղեակ էք, աշխարհագրականօրէն Գամիշլիին հեռու ըլլալը եւ ցամաքի ճամբով գալը անապահով ըլլալը ստիպեցին մեզ, որ կրճատենք մասնակցողներուն թիւը եւ 105 քոյրեր-եղբայրներով կրցանք մասնակցիլ:
Հ.- Ձեր ակնկալածը տեսա՞ք այս տողանցքին:
Պ.- Շատ դրական տպաւորութիւններով, խրախուսուած եւ նոր ուժ կուտակած պիտի վերադառնանք Գամիշլի:Վստահ էի, որ մեր բոլոր կրտսեր քոյրերն ու եղբայրները տարիներէ ի վեր առիթ չէին ունեցած այսպիսի միջմասնաճիւղային փառատօնի մասնակցելու: Բոլորն ալ, հակառակ ճամբորդութէան բազմաթիւ դժուարութիւններուն, ուրախ են եւ գօտեպնդուած: Այս տողանցքը առիթ հանդիսացաւ ընկերային կապերու ամրապնդման եւ միութեան գործունէութեան ծիրին մէջ նոր հայեացքներու ձեւաւորման:
ՔԵՍԱՊ
ՀՄԸՄ-ի Քեսապ Մասնաճիւղը հիմնուած է 1948-ին:
«Գանձասար»ի թղթակից Ժիրայր Կարապետեան հետեւեալ հարցումները ուղղեց ՀՄԸՄ-ի Քեսապ Մասնաճիւղի ներկայացուցիչին.
Հ.- Քանի՞ անդամներէ կը բաղկանայ մասնաճիւղը:
Պ.-ՀՄԸՄ-Ի Քեսապի Մասնաճիւղը ներկայիս ունի 100 սկաուտներ եւ գայլիկներ, որոնք շաբաթական դրութեամբ կը կատարեն իրենց ժողովները, գործունէութիւնը եւ փողերախումբի փորձերը։
Մարզական կեանքը աշխուժ է. ֆութպոլի խումբը ունի 30 անդամներ, որոնք իրենց հերթական փորձերը կը կատարեն, իսկ ճատրակի եւ փինկ-փոնկի խումբերու անդամներուն թիւը կը հասնի 30-ի:
Հ.-Տողանցքի նախապատրաստական աշխատանքները դիւրաւ ընթացա՞ն:
Պ.-Նախքան տողանցքի մասնակցութիւնը Քեսապ Մասնաճիւղը կատարեց իր տարեկան բանակումը նուիրուած «Շուշի»ի, Քեսապի կազդուրման կայանին մէջ, 90 քոյր-եղբայրներու մասնակցութեամբ: Բանակումէն ետք, տողանցքի եւ միջմասնաճիւղային մրցումներու նախապատրաստական աշխատանքներն ու մրցաշարքերը սկսանք: Բարեբախտաբար ճատրակի եւ փինկ-փոնկի մասնակիցներէն ախոյեաններ ունեցանք, որոնք պարգեւատրուեցան ՀՄԸՄ-ի Սուրիոյ Շրջ. Վարչութեան կողմէ, տողանցքի աւարտին։
Հ.-Քանի՞ անդամներով ժամանեցիք Հալէպ:
Պ.-Տողանցքին 95 քոյր-եղբայրներ մասնակցեցան, ներառեալ մարզական եւ սկաուտական խումբերն ու փողերախումբը։
Մասնակիցներուն մեծամասնութիւնը առաջին անգամ կը մասնակցէր միջմասնաճիւղային տողանցքի եւ փողերախումբը առաջին անգամ կը նուագէր այս հսկայ հանրութեան առջեւ: Ուստի մեծ տպաւորութեամբ եւ վերանորոգ ուխտով վերադարձանք Քեսապ։
ԼԱԹԱՔԻԱ
ՀՄԸՄ-ի Լաթաքիա Մասնաճիւղը հիմնուած է 1926-ին:
«Գանձասար»ի թղթակից Անժելա Չաղլասեանը հետեւեալ հարցումները ուղղեց ՀՄԸՄ-ի Լաթաքիոյ Մասնաճիւղի ներկայացուցիչին.
Հ. -Ինչպիսի՞ տրամադրութիւն կը տիրէր Լաթաքիոյ ՀՄԸՄ-ականներուն մօտ նախքան Հալէպ ժամանելը:
Պ.- Նախ կ’ուզեմ շնորհակալութիւն յայտնել պատասխանատու կազմին, որովհետեւ շատ մեծ աշխատանք է կազմակերպուածը: Մեր երազն էր որ օր մը Սուրիոյ բոլոր շրջաններէն հաւաքուէինք մայր գաղութին՝ Հալէպի մէջ: Փառք Աստուծոյ, այսօր մեր երազը իրականացաւ եւ կը փափաքինք որ այս տողանցքը ըլլայ աւանդական ու ամէն տարի այս ձեւով շարունակենք: Գիտենք որ շատ դժուար ու ծախսալից է, սակայն բարոյական եւ դաստիարակչական ազդեցութիւնը շատ աւելին է:
Լաթաքիան մասնակցեցաւ 95 սկաուտ, գայլ-արծուիկներով: Նախօրէին փողերախումբի եւ սկաուտական տողանցքի փորձերը սկսանք, իր մասնակցութիւնը բերաւ նաեւ Համազգայինի Լաթաքիոյ Մասնաճիւղի «Գեղարդ» պարախումբը: Այս մէկը մեզի համար մեծ ուրախութիւն էր, որովհետեւ Լաթաքիոյ Համազգայինն ու ՀՄԸՄ-ը հանդէս պիտի գային սուրիահայ համայնքին առջեւ, այսպիսի հանդիսաւոր փառատօնի մը ընթացքին:
Հ.-Ինչպիսի՞ տպաւորութիւններով պիտի մեկնիք:
Պ.- Մենք այսօր շատ ուրախ, մեր երազները իրականացուցած ըլլալու գոհունակութեամբ կը վերադառնանք Լաթաքիա:
ԴԱՄԱՍԿՈՍ
ՀՄԸՄ-ի Դամասկոս Մասնաճիւղը հիմնուած է 1925-ին:
«Գանձասար»ի խմբագրակազմի անդամ Վեհան Պարսումեան հետեւեալ հարցումները ուղղեց ՀՄԸՄ-ի Դամասկոսի Մասնաճիւղի ներկայացուցիչին.
Հ.- Ինչպէ՞ս պատրաստուեցաւ ՀՄԸՄ-ի Դամասկոս մասնաճիւղը այս տողանցքին, ինչպիսի տրամադրութիւններով գործի լծուած էին ՀՄԸՄ-ականները:
Պ.- Երբ մասնաճիւղի վարչութիւնը մէկ ամիս առաջ տեղեկացաւ այս տողանցքին մասին, անմիջապէս գործի լծուեցաւ: Խորքին մէջ այս մէկը շատ մեծ խանդավառութիւն ստեղծեց, այն իմաստով, որ մեր երիտասարդ միութենականներէն շատեր բախտն ու առիթը չէին ունեցած Հալէպի մէջ այսպիսի փառատօններու մասնակցելու, կամ ընդհանրապէս Հալէպ չէին այցելած: Անոնք այնքան խանդավառուած էին, որ կ’ուզէին ոչ թէ շաբաթական հերթականութեամբ, այլ ամէն օր փորձ կատարել: Դամասկոսի մեր ակումբի վայրը քիչ մը նեղ է եւ դրացիներ ունինք, որոնք աղմուկէն կրնան անհանգստանալ, բայց եւ այնպէս մենք շաբաթը երեք օր կը յաջողէինք փորձ ընել, իսկ վերջին անգամ տողանցելով մինչեւ համալիր մեկնեցանք եւ մօտաւորապէս երեք ժամ այնտեղ փորձ ըրինք: Փառք Աստուծոյ. այսօր մեր յոգնութեան պտուղները քաղեցինք: Ինչպէս տեսաք այսօր մեր մասնաճիւղի փողերախումբին վստահուեցաւ տողանցքի բացման քայլերգներու կատարումը, այս մէկը շատ մեծ քաջալերանք ու պատիւ էր Դամասկոսի մասնաճիւղին համար, նաեւ այն իմաստով որ այսպիսի հոծ հայ բազմութեան դիմաց մեր երիտասարդները առաջին անգամն է որ հանդէս կու գային: Ասիկա չենք կրնար բաղդատել մեր սերունդին հետ: Մեր սերունդը 80-ական թուականներուն, երբ Հալէպի քաղաքապետարանի դաշտին մէջ կը մասնակցէր տողանցքի, 20-25 հազար հայ հանդիսատես կը տեսնէր:
Հ.- Քանի՞ անդամ կը հաշուէ այսօր ՀՄԸՄ-ի Դամասկոսի Մասնաճիւղը եւ ի՞նչ հերթականութեամբ կը կատարուին գործունէութիւններն ու ժողովները:
Պ.- Այսօր ՀՄԸՄ-ի Դամասկոս Մասնաճիւղը ունի 110 անդամ, յիսուն առ հարիւրը գայլ-արծուիկ, յիսուն առ հարիւրը՝ սկաուտ: Ունինք նաեւ փողերախումբը, որ կը հաշուէ 40 անդամ: Իսկ գործունէութիւններու պարագային ինչպէս որ ՀՄԸՄ-ի ծրագիրը եւ կանոնագիրը յստակ ուղի մը ընդգծած է, մեր մասնաճիւղն ալ վարչութեան եւ Շրջ. Վարչութեան որդեգրած դաստիարակչական ծրագիրով, ցուցմունքներով կ’առաջնորդուի: Մենք ունինք սկաուտական կազմ, խմբապետական կազմ, ունինք գայլիկներու պատասխանատու կազմ, որոնք կը գումարեն իրենց շաբաթական հերթական ժողովներն ու կ’իրականացնեն գործունէութիւնը, որուն ընդմէջէն նոր սերունդին կը ջամբուի ՀՄԸՄ-ականի դաստիարակութիւն՝ առողջ մարմին, արթուն միտք եւ ազնիւ հոգի ունենալու համար:
Հ.- Ինչպէ՞ս էր սկաուտներուն տրամադրութիւնը Հալէպ հասնելէն ետք եւ ինչպիսի՞ տպաւորութիւններով պիտի մեկնին հոսկէ:
Պ.- Կը նախընտրէի, որ այս հարցումը երիտասարդներուն հարցնէիք, որովհետեւ անոնց անդրադարձը կրնայ աւելի հարազատ պատկերը արտացոլացնել անոնց մտածումներուն եւ մանաւանդ խանդավառութեան: Վստահ եմ, որ այսօր երբ Դամասկոս Մասնաճիւղի անդամները տուն վերադառնան, աւելի մեծ թափով, եռանդով եւ մասնաճիւղը աւելի վերաշխուժացնելու գիտակցութեամբ պիտի լծուին միութենական աշխատանքի՝ զարգացնելու մարզական, սկաուտական թէ փողերախումբին առնչուող ծրագիրները:
Հ.- Ի՞նչ կ’ուզէիք ըսել այսօրուան մասնակիցներուն, որպէս երէց ՀՄԸՄ-ական:
Պ.- Թող անոնք ՀՄԸՄ-ի նշանաբանը՝ «Բարձրացիր- Բարձրացուր»ը վառ պահեն իրենց մէջ, որովհետեւ այս նշանաբանը եթէ իսկապէս կարենանք գործադրել, պիտի յաջողինք մեր ներկան ու ապագան ճիշդ հունի մէջ դնել: Ես հաւատք ունիմ մեր միութեան ծրագիրին հանդէպ, որ իսկապէս հայեցի, մտային ու ֆիզիքական, լիակատար մարդկային արժէքներ ունեցող անձնաւորութիւններ պատրաստելու կ՛առաջնորդէ եւ համոզուած եմ, որ այս սերունդը վաղուան օրը ոչ միայն պիտի ծառայէ մեր ազգի զաւակներուն, այլեւ մարդկութեան:
ՀԱԼԷՊ
ՀՄԸՄ-ի Հալէպ Մասնաճիւղը հիմնուած է 1925-ին:
«Գանձասար»ի խմբագրակազմի անդամ Անի Թոփալեան հետեւեալ հարցումները ուղղեց ՀՄԸՄ-ի Հալէպ Մասնաճիւղի ներկայացուցիչին.
Հ.- Տասը տարի ընդմիջումէ ետք այս տողանցքին կազմակերպումը դժուար ընթացա՞ւ:
Պ.-Աշխատանքի մթնոլորտը շատ լաւ էր, իւրաքանչիւր կազմակերպչական խմբակ իր գործը լի ու լի իրականացուց եւ միասնական ջանքերով նախապատրաստուեցանք այս տողանցք-փառատօնին: Պատասխանատուութիւնը մեծ է, որովհետեւ Սուրիոյ բոլոր մասնաճիւղերը պիտի հիւրընկալէինք: Այդուամենայնիւ օրական աշխատանքով կարելի եղաւ նախապատրաստուիլ թէ՛ ՀՄԸՄ-ականները դիմաւորելու, եւ թէ հանդիսականները: ՀՄԸՄ-ի նշանաբանը մեր մղիչ ուժը հանդիսացաւ:
Հ.- Տողանցքի ընդհանուր մասնակիցներու թիւը ի՞նչ կը հաշուէր:
Պ.- Մասնակիցներու թիւը հասաւ 1000-ի: Մասնակիցները ուրախ էին, որովհետեւ շատեր առաջին անգամ ըլլալով կը մասնակցէին: Այս տողանցքը մօտեցուց բոլորը, զարգացուց յարաբերութիւնները եւ դրական տպաւորութիւն ստեղծեց:
Հ.- Հանդիսականներու մասնակցութեան մասին ի՞նչ կ’ըսէք:
Պ.- Մօտաւորապէս 4000 հանդիսատես ներկայ էր տողանցքին: Տողանցը առցանց ալ սփռուեցաւ եւ Սուրիայէն դուրս ապրող ՀՄԸՄ-ականներ ալ առիթ ունեցան հետեւելու եւ վերյիշելու իրենց ապրած օրերը Սուրիոյ ՀՄԸՄ-ի շարքերուն մէջ:
Յուսանք այս աւանդական փառատօնը ամէն տարի կազմակերպելու առիթ կ’ունենանք, թափ ու եռանդ հաղորդելու ՀՄԸՄ-ականներուն: