Շաբաթ, 26 Յունիս 2021-ին երեկոյեան ժամը 7:30-ին, Ազգ. Քարէն Եփփէ Ճեմարանի շրջափակին մէջ տեղի ունեցաւ միջնակարգի ամավերջի հանդէսը։
Հանդիսութիւնը կը հովանաւորէր Բերիոյ Հայոց Թեմի Առաջնորդ Գերշ. Տ. Մասիս Սրբ. Եպս. Զօպուեան, ներկայ էին՝ Սուիրոյ Խորհրդարանի անդամ տիար Ժիրայր Րէիսեան, Բերիոյ Թեմի Ազգ. Վարչութեան, ՀՄԸՄ-ի Կենդրոնական Վարչութեան ներկայացուցիչները, ինչպէս նաեւ բարեսիրական, մշակութային եւ մարզական միութիւններու ներկայացուցիչներ, Ճեմարանի խնամալութիւնը, տնօրէնութիւնը, ուսուցչական կազմը եւ շրջանաւարտից միութիւնը։
Հանդէսի բացումէն ետք, երգչախումբը մեկնաբանեց Սուրիոյ եւ Հայաստանի Հանրապետութեան զոյգ քայլերգները՝ դաշնամուրի ընկերակցութեամբ Արփի Կոստանեանի եւ Սեդի Խաչերեանի։
Հայերէն բացման խօսքով հանդէս եկաւ Յովիկ Տատաղլեան, իսկ արաբերէն Մարի-Ռոզ Քէօշկէրեան։
Ազգ. Քարէն Եփփէ Ճեմարանի 9-րդ կարգի երգչախումբը յաջորդաբար ներկայացուց փունջ մը հայերէն, արաբերէն երգեր, գեղա- րուեստական ղեկավարութեամբ Ռուզան Պարսումեանի։
Երգչախումբին յաջորդեցին խմբային հայերէն եւ արաբերէն ասմունքներ։
Արաբերէն ուղերձը ընթերցեց Աննա Պետրոսեան, իսկ Հայերէնը՝ Արէն Խրոյեան։ Անոնք 9-րդ կարգի աշակերտութեան անունով շնորհակալութիւն յայտնեցին Ազգ. Քարէն Եփփէ Ճեմարանի տնօրէնութեան եւ ուսուցչական կազմին եւ ծնողներուն՝ տարուան ընթացքին իրենց հոգատարութեան եւ խնամքին համար։ Ապա շնորհաւորեցին իրենց դասընկերներն ու դասընկերուհիները եւ անոնց մաղթեցին յաջողութիւն: Շըրջանաւարտները խոստացան ըլլալ ուսման, գիտութեան եւ ազգային բարձր իտէալներու հաւատարիմ ուխտեալները։
Ապա խօսք առաւ Ազգ. Քարէն Եփփէ Ճեմարանի պետական տնօրէն Ապըտ ալ Համիտ Մասրի եւ շնորհակալութիւն յայտնեց Հալէպի Կրթական ՏնօրԷնութեան, թեմիս առաջնորդին, Ճեմարանի խնամակալութեան, տնօրէնութեան, ուսուցչական կազմին եւ ծնողներուն, որոնց միասնական աշխատանքին շնորհիւ ուսումնական այս տարին յաջողութեամբ պսակուեցաւ։
Ազգ. Քարէն Եփփէ Ճեմարանի տնօրէն Յակոբ Քիլէճեան ընթերցեց ճեմարանի միամեայ տեղեկագիրը, ապա յատուկ շնորհակալութիւն յատնեց սրբազան հօր, Ազգ. Վարչութեան եւ Ուսումնական Խորհուրդին, Ճեմարանի խնամակալութեան, պետական տնօրէնին, Շրջանաւարտից Միութեան վարչութեան, ուսուցչական եւ վարչական կազմերուն, երգչախումբի ղեկավարին, խմբային ասմունքներու պատասխանատուներուն, Բերիոյ թեմի դպրոց հիմնադրամին, ԱՔԵ Ճեմարանի Քալիֆորնիոյ ընկերակցութեան եւ անոր Հալէպի յանձնախումբին, անհատ բարերարներուն եւ բոլոր անոնց, որոնք նիւթապէս եւ բարոյապէս նեցուկ կը կանգնին ճեմարանին։
Աւարտին խօսքը ուղղելով միջնակարգի երեք տարուան տարիները բոլորած Ճեմարանականներուն, թելադրեց յաւելեալ ջանք թափել երկրորդականի կարգերուն եւս յաջողութիւն արձանագրելու եւ բարձրագոյն ուսման հասնելու համար: Տնօրէնը այնուհետեւ ուժ, կորով եւ համբերութիւն մաղթեց երկրի նախագահ տոքթ. Պաշշար ալ Ասատին, որ վճռականօրէն Սուրիան կ’առաջնորդէ դէպի խաղաղութեան ափ։
Ապա բեմ հրաւիրուեցաւ Ազգ. Քարէն Եփփէ Ճեմարանի Շրջանաւարտից Միութեան Վարչութեան անդամ Սեդա Աճէմեան՝ պարգեւատրելու 2019-2020 ուսումնական տարեշրջանի 9-րդ կարգի պետական քննութեանց առաջին երեք դիրքերը գրաւող հետեւեալ աշակերտները՝ Աննա Սաղպազարեան (առաջին), Արեգ Արոյեան (երկրորդ) եւ Յովիկ Իփճեան (երրորդ)։
Պարգեւատրուեցան նաեւ 2020-2021 տարեշրջանի առաջնակարգ հետեւեալ աշակերտները՝ 7-րդ կարգէն Արշալոյս Տիլպէրեան, Սելինա Երէցեան եւ Սէրլի Մկրտիչեան, 8-րդ կարգէն՝ Արփի Արապանեան, Եսթեր Կիւլտալեան եւ Շողակ Խրոյեան։
Այնուհետեւ բեմ բարձրացան 2020-2021 տարեշրջանի 76 շրջանաւարտներ, որոնք առաջնորդ սրբազան հօր ձեռամբ ստացան միջնակարգի վկայական, իսկ հայերէն լեզուի առաջնակարգ ուսանողները տնօրէնութեան կողմէ գովասանագիրներու արժանացան։
Օրուան եզրափակիչ պատգամը ուղղեց Բերիոյ Հայոց Թեմի Առաջնորդ Գերշ. Տէր Մասիս Ս. Եպս. Զօպուեան աշակերտներուն հետեւեալ յորդորը տալով. «Ձեր սեփական նպատակներու եւ երազանքներու իրականացումը ճեմարանին, հալէպահայութեան եւ մեր բոլորին յաջողութիւնն ու պարծանքն են»:
Ապա իր ուրախութիւնը յայտնեց ազգային շունչով տոգորուած այս սերունդին ի տես ու ըսաւ. «Դուք էք ապագան, ձեզմով պիտի իրականացնենք մեր ազգային երազները: Այս դպրոցը սովորական դպրոց մը չէ, ան հայակերտումի, ազգակերտումի նուիրական վայր մըն է, որմէ վկայուողէն կ’ակնկալուի ազգի եւ հայրենիքի ծառայութիւն»:
Հանդիսութիւնը փակուեցաւ ճեմարանի քայլերգով, դաշնակի ընկերակցութեամբ Կալին Տէմիրճեանի։
Հանդէսին խրախճանքը տեղի ունեցաւ «Տիգրանեան» պարտէզէն ներս, կազմակերպութեամբ Ճեմարանի Շրջանաւարտից Միութեան վարչութեան, վկայուած աշակերտներու բարձր տրամադրութեամբ, եւ անոնց ծնողներուն ու հարազատներուն քաջալերելի ներկայութեամբ։
Ահաւասիկ սերունդ մը եւս յաղթահարելով բոլոր դժուարութիւնները ինքնավստահ կշռոյթով կը կրկնէ՝ «Չենք նահանջեր»:
Ժիրայր Կարապետեան