59 աշակերտ-աշակերտուհիներ դժուար ու երկար ուսումնական տարեշրջան մը յաղթահարելէ ետք բախտաւորութիւնը ունեցան շրջանաւարտ դառնալու Ազգ Քարէն Եփփէ ճեմարանէն, կոչուելով «Շուշի» հունձք։
Արդարեւ, Շաբաթ, 3 Յուլիս 2021-ի երեկոյեան ժամը 7:30-ին, Ազգ.Քարէն Եփփէ ճեմարանի շրջափակէն ներս տեղի ունեցաւ երկրորդականի ամավերջի հանդէսը, հովանաւորութեամբ Բերիոյ Հայոց Թեմի Առաջնորդ Գերշ.Տէր Մասիս Սրբ.Եպս. Զօպուեանի, կազմակերպութեամբ ճեմարանի տնօրէնութեան եւ խնամակալութեան։
Հանդէսի գեղարուեստական յայտագիրով շրջանաւարտները վերակենդանացուցին Արցախի դարարմատ պատմութիւնը՝ հաստատելով անոր հայկական էութիւնը։
Շրջանաւարտները շնորհաւորելու եկած էին՝ Բերիոյ Հայոց Թեմի Առաջնորդը, Սուրիոյ խորհրդարանի երեսփոխանը, Պատկան Մարմինն ու Ազգ. վարչութեան ներկայացուցիչները, ՀՄԸՄ-ի եւ Համազգայինի Կեդր.վարչութեանց ներկայացուցիչները, հալէպահայ մշակութային, բարեսիրական, մարզական միութիւններու ներկայացուցիչներ, ճեմարանի խնամակալութիւնը, ուսուցչական կազմն ու տնօրէնութիւնը, ինչպէս նաեւ շրջանաւարտներուն ծնողներն ու հարազատները։
Հանդէսի բացումը կատարեցին շրջանաւարտները երգելով Հայաստանի եւ Սուրիոյ քայլերգները, դաշնամուրի ընկերակցութեամբ Երուանդ Գասպարեանի եւ Վանայ Պարմաքսզեանի։
Հայերէն եւ արաբերէն բացման խօսքերով Մեղրի Ստեփան եւ Սալբի Մաթոսեան յայտնեցին, որ այսօր կը փակեն իրենց կեանքի գեղեցկագոյն էջերէն մէկը՝ Ճեմարանի ուսումնառութեան էջը, ուր սորվեցան գիտութիւն, ձգտումներու իրականացման համար անդուլ աշխատանք, ինքնավստահութիւն եւ ընկերասիրութիւն։ Ապա անոնք շնորհակալութիւն յայտնեցին ծնողներուն, ուսուցչական կազմին ու տնօրէնութեան իրենց անսակարկ ճիգերուն համար, խոստանալով, որ շրջանաւարտ սերունդը ուսումնական իր ճամբան պիտի շարունակէ բարձր պահելով ճեմարանի անունը։
Շրջանաւարտներէ բաղկացած երգչախումբը յաջորդաբար Արցախի նուիրուած հայերէն եւ արաբերէն հայրենասիրական երգեր, գեղարուեստական ղեկավարութեամբ Ռուզան Պարսումեանի։
Ապա խումբ մը շրջանաւարտներ պատմեցին Արցախի պատմութիւնը՝ հայերէն, արաբերէն եւ անգլերէն լեզուներով։ Այլ շրջանաւարտներ ներկայացուցին Շուշիի ազատագրական պայքարը եւ անոր արժէքը։ Շրջանաւարտները գեղարուեստական յայտագիրը գունաւորեցին ասմունքելով՝ «Արցախի Լեռների Լեգենդ»ը, որմէ ետք շրջանաւարտներ Արփի Գէորգեան եւ Նանոր Պոտիկեան մեներգեցին «Հերոս Տղերքը Մեր»ը։
Այլ շրջանաւարտներ արաբերէն փունջ մը հայրենասիրական բանաստեղծութիւններով Սուրիական Հայրենիքին հանդէպ իրենց տածած սէրն ու երախտիքը յայտնեցին։
Հայերէն ուղերձով շրջանաւարտ Արփի Գէորգեան նկարագրեց իր սերունդին ապրումներն ու կրած դժուարութիւնները, ուսումնական ծանր աշխատանքին կողքին հայրենիքէն հասած լուրերուն բանեցուցած ճնշումը իրենց վրայ ու ըսաւ.
«2020-2021 ուսումնական տարեշրջանին տակաւին սկիզբն էր երբ բռնկեցաւ Արցախի պատերազմը։ Պաքալորիայի գիրքը մեր մէկ ձեռքին, միւս ձեռքին լրահոսերու համացանցային էջերը՝ անքթիթ կը հետեւէինք Արցախի լուրերուն։ Մէկ ձեռքով թուաբանական խնդիրներ կը լուծէինք, միւս ձեռքով կը հաշուէինք նահատակներու եւ ռազմագերիներուն թիւերը։ Մէկ ականջով բնագիտութեան, մարդու կազմուածքին մասին դասեր կը լսէինք, միւս ականջով Շուշիի մէջ մարդկութեան դէմ գործուած ոճիրներուն բօթերը կ’ունկնդրէինք»։
Ապա Արփին իր սերունդին անունով խոստացաւ կարելի բոլոր միջոցներով տէր կանգնիլ մեր ազգային արժէքներուն եւ Արցախին եւ ուսման մէջ տեւաբար յառաջանալ։ Արփին շնորհակալութիւն յայտնեց ծնողներուն եւ ուսուցչական կազմին, ինչպէս նաեւ դաստիարակ Ներսէս Պարսումեանին, որոնք համբերատար հետեւեցան աշակերտներուն ուսման ընթացքին եւ քաջալերեցին զիրենք։
Արաբերէն ուղերձով Վանայ Արուշեան դիտել տուաւ, որ այսօրուան հանդէսը արգասիքն է տարիներու աշխատանքի, մաքառումի եւ ձգտումներու։ «Մենք ձեր կեանքի պարտէզին մէջ փոքր ածու մըն էինք, այսօր դարձանք ձեր հոգին սնուցանող պտղաբեր ծառեր։ Մեր պարտքն է յիշել ձեզ եւ մոմ վառել բոլոր այն ուսուցիչներուն դիմաց, կրթական մշակներուն, որոնք մեզ գիտութիւն տուին եւ կեանքը ապրիլ սորվեցուցին, տնօրէններուն եւ դաստիարակներուն, որոնք մեր ուսումնառութիւնը կարգաւորեցին, մեր ծնողներուն, որոնք մերթ արցունքով, մերթ ժպիտով հետեւեցան մեզի եւ քաջալերեցին, իսկ վերջին մոմը պիտի վառենք մեր երկրի նախագահին ու սուրիական բանակին դիմաց, որոնք նորարարութեան, պայքարի եւ յուսալից աշխատանքի օրինակ դարձան։ Կը խոստանանք ըլլալ արժանաւոր սերունդ մը՝ մեր ուսումով եւ վարք ու բարքով»։
Այնուհետեւ ճեմարանի տնօրէն Յակոբ Քիլէճեան անդրադառնալով ազգային գիտակցութեամբ զինուած սերունդներու կերտման մէջ Ճեմարանի դերակատարութեան, ներկայացուց ճեմարանի 2020-2021 ուսումնական տարեշրջանի տեղեկագիրը, ճեմարանի վերակառուցման փուլերը եւ տարուան ընթացքին աշակերտներուն մարզական, մշակութային եւ գիտական արտադպրոցական մրցումներու մասնակցութիւններն ու նուաճած մետալները։
Իր խօսքի աւարտին տնօրէնը շնորհակալութիւն յայտնեց բոլոր ծնողներուն, որոնք տնտեսական դժուար պայմաններուն մէջ զօրավիգ կանգնեցան վարժարանին, ապա գնահատանքի խօսք ուղղեց Բերիոյ Հայոց Թեմի Առաջնորդին՝ իր հայրական յորդորներուն եւ քաջալերանքին համար, ինչպէս Բերիոյ Թեմի Ազգ.Վարչութեան, Ուսումնական Խորհուրդին, Ճեմարանի խնամակալութեան եւ Ճեմարանին նեցուկ կանգնող բոլոր բարեսիրական կողմերուն, ինչպէս նաեւ յայտագիրի պատրաստութեան նպաստող ուսուցիչներ՝ Մարիա Գաբրիէլեանին, Արա Մութաֆեանին եւ Ռուզան Պարսումեանին։ Տնօրէնը յատուկ շնորհակալութիւն յայտնեց Քալիֆորնիոյ Ճեմարանի ընկերակցութեան եւ անոր Հալէպի յանձնախումբին, Համազգայինի Սուրիոյ Շրջ.Վարչութեան եւ Հայագիտական Հիմնարկի Վարչութեան, Բերիոյ Թեմի Նպաստից Յանձնախումբին, Էօժէնի Պետրոսեան պարգեւին, «Կիլիկիա» հրատարակչատան, «Տորքաս» հաստատութեան, Միջին Արեւելքի Եկեղեցիներու Միութեան եւ անհատ բարերարներուն, ճեմարանի Շրջանաւարտից Միութեան Վարչութեան իր Հալէպի եւ Աւստրալիոյ մասնաճիւղերով, որոնք միշտ նիւթապէս եւ բարոյապէս նեցուկ կը կանգնին Ճեմարանին։ Տնօրէնը շնորհակալութիւն յայտնեց նաեւ Ճեմարանի պետական տնօրէնին, ապա խօսքը ուղղելով շրջանաւարտներուն ըսաւ.
«Մենք ձեզ կոչեցինք «Շուշի» սերունդ։ «Շուշի»ն իր մէջ կը պարփակէր մեր պատմութիւնը, իսկ երբ միասնական էինք յաջողեցանք զայն պահել։ Մենք մեր նախկին սերունդներէն մէկը կոչեցինք «Արցախ» սերունդ, ձեզ՝«Շուշի», որպէսզի ձեր պապերուն ճանապարհը շարունակէք՝ տէր կանգնելով ձեր հայրենիքին, ազգային արժէքներուն, մայրենի լեզուին։ Կը յուսանք որ դուք կը հասնիք պատուաբեր նուաճումներու»։
Եզրափակելով տնօրէնը շնորհաւորեց նախագահ Պաշշար ալ Ասատի վերընտրութիւնը, մաղթելով անոր ուժ եւ կորով՝ Սուրիան առաջնորդելու խաղաղութեան բարգաւաճ ափ։
Այնուհետեւ խօսք առաւ ճեմարանի պետական տնօրէն Ապտուլ Նապիլ ալ Մասրի։ Ան շնորհակալութիւն յայտնեց Ազգ. Քարէն Եփփէ ճեմարանին՝ սերունդներու առողջ դաստիարակութեան եւ ուսումնառութեան ճամբուն իր տարած յոյժ կարեւոր աշխատանքին համար եւ յորդորեց շրջանաւարտները յառաջանալու մասնագիտական տարբեր ոլորտներու մէջ՝ վերաշինելու ինչ որ պատերազմը քանդեց։
Ճեմարանի Շրջանաւարտից Միութեան Վարչութեան կողմէ ատենապետ Ներսէս Պարսումեան պարգեւատրեց Ճեմարանի երկրորդականի երեք կարգերու առաջնակարգ հետեւեալ աշակերտներն ու շրջանաւարտները.
Ժ. կարգ
Աննա Սաղպազարեան
Արեգ Արոյեան
Սէրլի Պետրոսեան
ԺԱ. կարգ (գիտական բաժին)
Քարէն Գատէհճեան
Սելա Պազարպաշեան
Աննա Աբարահամ Չալաքեան
ԺԱ. կարգ (գրական բաժին)
Պօղոս Կարապետեան
ԺԲ. կարգ (Գիտական բաժին 2019-2020 տարեշրջան)
Սեսիլ Պազարպաշեան
Սիրվարդ Յովակիմեան
Սագօ Պալապանեան
ԺԲ. կարգ (Գրական բաժին 2019-2020 տարեշրջան)
Մարալ Ղազէլեան
Աննա Եղիայեան
Աննա Մարիա Պիւտիւզեան
Պարգեւատրումէն ետք տեղի ունեցաւ վկայականաց բաշխում՝ ձեռամբ ԲԵրիոյ Հայոց ԹԵմի Առաջանորդ Գերշ. Տէր Մասիս Սրբ. Եպս. Զօպուեանի, իսկ Համազգային Սուրիոյ Շրջ.Վարչութեան կողմէ հայերէն գիրքերով պարգեւատրուեցան ԺԲ. կարգի հայերէնագիտութեան մէջ բարձր գնահատանիշեր ապահոված շրջանաւարտները: Երկրորդ տարին ըլլալով «Կիլիկիա» հրատարակչատունը «Մկրտիչ Մկրտիչեան» պարգեւով (30 գիրք իւրաքանչիւր շրջանաւարտի) պարգեւատրեց միջնակարգի երեք տարիներու հայերէնի բարձրագոյն միջինը ապահոված շրջանաւարտներ՝ Վանայ Պարմաքսզեան, Վանայ Արուշեան եւ Արփի Գէորգեան։
Այնուհետեւ Էօժենի Պետրոսեան պարգեւը տրամադրուեցաւ երկրորդականի երեք տարիներու աւարտին հայերէնի բարձրագոյն նիշ ապահոված շրջանաւարտ Արփի Գէորգեանին։
Աւարտին Բերիոյ Թեմի Առաջնորդը իր պատգամը ուղղեց շրջանաւարտներուն։ Տէր Մասիս ըսաւ, որ այսօր ձեր եւ մեր զաւակները անգամ մը եւս մկրտուեցան ազգային աւազանին մէջ, կոչուելով «Շուշի»։ «Շուշի»ն կը մարմնաւորէ ե՛ւ մեր պարտութիւնները, ե՛ւ մեր յաղթանակները, սակայն շրջանաւարտները իրենց տիպար ընթացքով, մաքուր նկարագրով յոյս հաղորդեցին, հաստատելով, որ ազգային արժէքները կենդանի պիտի մնան մեր մէջ։
«Սիրելի՛ շրջանաւարտներ,
Այսօր պէտք է հպարտ ըլլաք, որովհետեւ դառնալով ճեմարանէն շրջանաւարտ, կոչուելով «Շուշի» սերունդ, դուք ձեր ուշադրութիւնը սեւեռած պիտի պահէք հայկական բռնագրաւուած մեր հողերուն, մեր Հայաստանի, Արցախի եւ սուրիահայ նահատակներու պատգամը պիտի կրէք ձեր մէջ ու անով իսկ ամրացած մտքի ու գործի նոր հորիզոններ պիտի բանաք մեր բոլորին դիմաց։
Դուք անցաք կեանքի զանազան փոթորիկներէ եւ ձեզի հետ պիտի փոխադրէք երկու դրամագլուխ՝ ա) պայքարէ, տագնապէ դուրս գալու փորձառութեան դրամագլուխ, բ) նոր յոյսով կեանքի նոր հանգրուան մտնելու ինքնավստահութեան դրամագլուխ՝ թիավարելու հոսանքն ի վեր, մշտապէս եւ երբեմն առանձնաբար պայքարելով կեանքի փոթորիկներուն դէմ։ Հետեւեաբար եղէք տոկուն, ինքնավստահ, եղէք ճկուն, երբեմն դիւանագէտ, յարմարելու կեանքի բոլոր պայմաններուն։ Ընթացէք յառաջ եւ ծաղկեցուցէք ձեր կեանքը, ձեր ընտանիքները, մեր համայնքը, մեր հայրենիքը եւ գիտութեամբ զինուեցէք», եզրափակեց սրբազան հայրը։
Պահը հասած էր արդէն շրջանաւարտներու գլխարկները ուրախութեամբ դէպի երկինք արձակելու եւ երգերով ու արցունքոտ աչքերով հրաժեշտ տալու Ազգ. Քարէն Եփփէ Ճեմարանին։
Բարի երթ, սիրելի՛ շրջանաւարտ ընկներ-ընկերուհիներ։
Անի Պօղիկեան