ՆՍՕՏՏ ԳԱՐԵԳԻՆ Բ. ԱՄԵՆԱՅՆ ՀԱՅՈՑ ԿԱԹՈՂԻԿՈՍԻՆ ԽՕՍՔԸ ՀՀ ԱԶԳԱՅԻՆ ԺՈՂՈՎԻ 8-ՐԴ ԳՈՒՄԱՐՄԱՆ ԱՆԴՐԱՆԻԿ ՆԻՍՏԻՆ

“Մեծարգոյ նախագահ Հայաստանի Հանրապետութեան,

Յարգելի նախագահող,

Յարգելի պատգամաւորներ եւ ներկաներ,

Հայրապետական Մեր օրհնութիւնն ենք բերում ձեզ Ազգային ժողովի 8-րդ գումարման անդրանիկ նիստի առիթով եւ շնորհաւորում նորընտիր պատգամաւորներիդ:

Այսօր մեր հայրենիք Հայաստանն ու Արցախը դիմակայում են արտաքին եւ ներքին լուրջ մարտահրաւէրների՝ յանդիման Ատրպէյճանի կողմից շարունակուող յարձակումի ու ծաւալապաշտական նկրտումների։ Հայրենական կեանքում ծառացած հիմնախնդիրները յաղթահարելու համար հրամայական է պետական, քաղաքական գործիչների եւ ողջ հասարակութեան համախմբումը, քաղաքացիական պատասխանատուութեան բարձր գիտակցութիւնը, համընդհանուր զգաստութիւնն ու բարեխղճութիւնը։ Բոլորիս փափաքն ու ձգտումն է մեր հայրենիքի անվտանգութիւնն ու առաջընթացը, խաղաղ եւ բարեկեցիկ կեանքի կերտումը, որը մեծապէս պայմանաւորուած է նաև օրէնսդիր մարմնի եւ ձեւաւորուելիք կառավարութեան գործունէութեամբ։

Այսօր դուք ստանձնում էք ձեր պարտականութիւնները՝ օրէնսդրական նախաձեռնութիւններով կարեւոր ներդրում բերելու տնտեսութեան շարունակական զարգացման, գիտութեան, կրթութեան, մշակոյթի առաջընթացի գործում, պաշտպանելու անխաթարութիւնը մեր ինքնութեան ու արժէքների եւ հաստատուն պահելու արդարութիւնն ու իրաւունքը։ «Երանի նրանց, ովքեր իրաւունքն են պահում եւ ամէն ժամ արդարութիւն գործում», ասում է Սուրբ Գիրքը (Սաղմ. 105.3)՝ վկայելով, որ արդարութիւնն ու օրինապահութիւնն են գրաւականը երկրի եւ ժողովրդի բարօրութեան ու յարընթաց բարգաւաճման։ Օրէնսդրական ձեր գործունէութիւնը՝ արդարութեան եւ իրաւունքի գերակայութեամբ, միտուած պէտք է լինի ձևաւորելու անհրաժեշտ միջավայր ու հնարաւորութիւններ մեր պետութեան հզօրութեան եւ ապահովութեան, մեր երկրի արժանապատիւ կյանքի համար: Այս նուիրական դարաւոր իղձը իրականութիւն դարձնելու ուղին մեր հայրերի պատգամի իրագործումն է, ովքեր ըստ Աւետարանի ուսուցանել են, որ օրէնքն է մարդու համար, եւ ոչ թէ մարդը՝ օրէնքի (հմմտ. Մարկ. 2.27)։
Մեր երկրում տիրող ներկայիս ծանր իրավիճակում եւ տարածաշրջանում առկայ բարդ ու դժուարին հանգամանքներում մենք կենսականօրէն պէտք ունենք միասնութեան, հանդարտութեան, յուզումների ու լարուածութեան թօթափման՝ ատելութեան, վրէժխնդրութեան ու պառակտումների փոխարէն։ Մենք ամէնքս պէտք է քաջ գիտակցենք, որ ազգային եւ հասարակական համերաշխութեանն այլընտրանք չկայ: Առաջնահերթօրէն եւ այս խորհրդարանից, կառավարական համակարգից պիտի սերմանուի սէրը, փոխհասկացողութիւնը, բարի կամեցողութիւնը հասարակութիւնում։ Խորհրդարանական գործունէութեան ընթացքում հնչող քննադատութիւնները թող լինեն միայն կառուցելու եւ սխալները շտկելու նպատակով, ծաւալող բանավէճերը՝ ճշմարտութիւնը գտնելու, ճշմարտութեան հոգով առաջնորդուելու եւ այդ ճշմարտութեան վրայ խարսխելու օրինակարգ հանրային կեանքը եւ պետութեան կենսագործունէութիւնը։

Հայրապետական Մեր յորդորն ենք բերում ձեզ, որ քաղաքական հայեացքների եւ տեսակէտների բազմակարծութեամբ հանդերձ, մեր հայրենիքի եւ ժողովրդի լուսաւոր ապագայի կերտման նոյն ձգտումով աշխատէք համախումբ՝ մեր պետութեան անսասանութեան, ներքին ու արտաքին մարտահրաւէրների յաղթահարման, արտագաղթի կանխման, սփիւռքի հետ կապերի ու գործակցութեան առաւել արդիւնաւորման ջանքերով: Ամուր պահէք հաւատարմութիւնը մեր հոգեւոր եւ ազգային արժէքներին, հայրենիքի գերագոյն շահերին, մեր սուրբ նախնեաց եւ հայրենեայց պաշտպան նահատակ զաւակների հաւատին ու նուիրական տեսիլքին, որպէսզի ազգովի ունենանք շնորհն ու զօրութիւնը կերտելու մեր պետութեան եւ հայրենական կեանքի զարթօնքը։

Մեր Սուրբ Եկեղեցին բոլոր ժամանակներում առաջնորդել է մեր ժողովրդին հոգու փրկութեան, մտքի լուսաւորութեան, ազգային կեանքի վերելքի, նաեւ օրհնել ազատագրական պայքարները, սատարել պետականութեան վերահաստատման մաքառումներին։ Հայաստանեայց Առաքելական Սուրբ Եկեղեցին այս տեսլականով միշտ իր ձայնն է բարձրացնում հայրենիքի համար վտանգաւոր ընթացքների, ազգային ինքնութեան սպառնալիքների, մեր ժողովրդի իրաւունքների ու արժէքների ոտնահարման դէմ։ Հաւատարիմ իր կոչմանը՝ մեր Սուրբ Եկեղեցին պիտի շարունակի տերունապատուէր իր առաքելութիւնը՝ զօրակից ու օգտակար լինելով հայրենաշէն ու ազգաշահ բոլոր ջանքերին՝ ի սէր մեր ժողովրդի եւ պետութեան։

Աղօթում ենք, որ Աստուած իմաստութիւն պարգեւի եւ աջակից լինի ձեզ ձեր գործունէութեան մէջ, որպէսզի Ազգային Ժողովի առաքելութիւնը արգասաւորուի ցանկալի արդիւնքներով` յանուն հայրենիքի առաջընթացի, մեր ժողովուրդի խաղաղ, ապահով ու արժանապատիւ կեանքի: Բարի եւ օրհնեալ ընթացք Ազգային ժողովի 8-րդ գումարման աշխատանքներին։