Ճափոնի մէջ տարածուած է ամէն առաւօտ, արթննալէ անմիջապէս ետք, կիտրոնով եռացած ջուր խմելու սովորութիւնը:

Գոյութիւն ունին գիտնական ուսումնասիրութիւններ, որոնք կ’ապացուցեն անոր արժէքը:

 Ճափոնցիները նշանաւոր են իրենց երկարամեայ առողջ կեանքով:

 Խորքին մէջ, մեզմէ իւրաքանչիւրը կարելիութիւն ունի արեւելեան այդ փորձառութիւնը կիրարկելու եւ իր առողջութիւնը բարելաւելու:

   Եթէ արեան ցած ճնշումէ չէք տառապիր, ուստի փորձեցէ՛ք ամէն առաւօտ եռացած գաւաթ մը ջուրին մէկ կիտրոնի հիւթ աւելցնել եւ նախքան նախաճաշը խմել զայն:

-Կիտրոնը իր հիւթով եւ կեղեւով ուժի աղբիւր է: Ան հարուստ է մակնիզիումով, քալսիումով, նատրիումով, կալիումով եւ Սէ կենսանիւթով:

Այլ տարբերակ մըն ալ կարելի է օգտագործել. մէկ լիթր գաղջ ջուրին մէջ կրնաք խառնել 40 մլ. կիտրոնի հիւթ, աւելցնել 3 ճաշի  դգալ մեղր եւ խմել քանի մը անգամով:

Այս հիւթը, յատկապէս ձմրան, հիւանդութիւններու պարագային,  ձեր դիմադրողականութիւնը կը զօրացնէ:

-Կիտրոնը կարելի է օգտագործել նաեւ սիրտ  խառնուքը կանխելու համար, յատկապէս ճամբորդութիւններու պարագային:

Միւս կողմէ, կիտրոնի բոյրը կը նուազեցնէ ճնշուածութիւնը եւ կը հանգստացնէ ձեր միտքը:

Հետեւաբար կիտրոնը շատ լաւ միջոց է հանգստանալու եւ տարբեր հիւանդութիւններու հանդէպ ձեր դիմադրողականութիւնը զօրացնելու:

Երեկոյեան, նախքան քնանալը, յատկապէս ցուրտ ձմրան, կարելի է 2 -3 բաժակ ջուրին մէջ դնել 1 խոշոր կիտրոնի շերտեր եւ եռացնել 5 վայրկեան, ապա հեղուկը խմել տաք վիճակով:

Այս հեղուկը կը պաշտպանէ ցուրտէն, կը նպաստէ մարսողութեան, կը մաքրէ մաշկը եւ կը թարմացնէ շնչառութիւնը:

Ուստի օգտուեցէ՛ք դարմանումի բնական միջոցներէն եւ առատօրէն օգտագործեցէ՛ք կիտրոնը: