Երեքշաբթի, 22 Մարտ 2022-ին, ՀՀ Արտաքին Գործոց Նախարարութիւնը հանդէս եկած է հետեւեալ հաղորդագրութեամբ.
«Ատրպէյճանական կողմի ակնյայտ միջամտութեամբ Շուշի քաղաքի մօտակայքում՝ ատրպէյճանական վերահսկողութեան տակ գտնուող տարածքում, կրկին խափանուել է Հայաստանից բնական կազի մատակարարումը Լեռնային Ղարաբաղ: Այսպիսով, ձեան աննախադէպ տեղումների եւ աննախադէպ ցրտաշունչ եղանակային պայմաններում Լեռնային Ղարաբաղի շուրջ 120.000 բնակչութիւնը զրկուել է կենսական անհրաժեշտ կազամատակարարումից:
Ընդամէնը մի քանի օր առաջ Ատրպէյճան 8 օր շարունակ թոյլ չէր տալիս աշխատանքներ իրականացնել նոյն տեղանքում չպարզուած հանգամանքներում վթարուած կազատարի վերանորոգման ուղղութեամբ:
Այսպիսով, բացի Լեռնային Ղարաբաղի բնակչութեան նկատմամբ հոգեբանական ճնշում գործադրելուն ուղղուած իր միւս շարունակական գործողութիւններից եւ Լեռնային Ղարաբաղ միջազգային մարդասիրական կառոյցների մուտքը խոչընդոտելուց, Ատրպէյճան միտումնաւոր կերպով խաթարում է Լեռնային Ղարաբաղում կենսական նշանակութիւն ունեցող ենթակառուցուածքների բնականոն աշխատանքը, ինչն ակնյայտօրէն յանգեցնում է Լեռնային Ղարաբաղում մարդկային ճգնաժամի ստեղծմանը: Անթոյլատրելի ենք համարում արցախահայութեան նկատմամբ սիստեմատիք բռնութեան այս աղաղակող քաղաքականութիւնը:
Ստեղծուած իրավիճակը հրատապ է դարձնում մարդկային ճգնաժամի կանխման նպատակով միջազգային հանրութեան յստակ արձագանգը, ինչպէս նաեւ միջազգային մարդասիրական կառոյցների անյապաղ եւ անխոչընդոտ ներգրաւուածութիւնը Լեռնային Ղարաբաղում»: