Գերմանիայէն, Ֆրանսայէն, Պելճիքայէն եւ Հոլանտայէն ժամանած աւելի քան տասը հազար մարդ մասնակցած է Պրուքսէլի Ռելոպերթ Շումանի անուան հրապարակը տեղի ունեցած Լեռնային Ղարաբաղի համաեւրոպական ժողովրդային հաւաքին։ «Եւրոպացիները Յանուն Արցախի» նախաձեռնութեան կազմակերպած ժողովրդային հաւաքը սկսած է Հայաստանի և Լեռնային Ղարաբաղի օրհներգերով։
Հաւաքի մասնակիցներուն ձեռքին գտնուող պաստառներուն հիմնական մասը իրենց գրութիւններով կը մեղադրեն Եւրոմիութիւնը և Եւրոյանձնաժողովի ղեկավար Ուրսուլա ֆոն տէր Լայենը՝ Ալիեևի վարչակարգը անպատժելի թողելու համար, կան նաև «Ալիեւ, մարդասպան» գրութեամբ պաստառներ։
Հաւաքին մասնակցելու համար Ֆրանսայէն ժամանած են բարձրաստիճան քաղաքական գործիչներ, պատգամաւորներ, տարածաշրջաններու ղեկավարներ և քաղաքապետներ։
Պելճիքայի Հայ կոմիտէի վեհաժողովի նախագահ Կարէն Թադևոսեան յայտնած է. «Այսօր այստեղ հաւաքուածներէն իւրաքանչիւրը կը կրէ պատասխանատուութիւն բոլոր այն մարդոց առջև, որոնք կ՚աշխատին Լեռնային Ղարաբաղի 120 հազար հայերու ճակատագիրը անտէրութեան չմատնելու համար։ Մենք արդէն կուշտ ենք լղոզուած յայտարարութիւններէն, և եկած է ժամանակը, որպէսզի Եւրոպան գործէ և անդրադառնայ հարցին առ այն, որ մենք՝ որպէս Եւրոպայի քաղաքացիներ, ունինք հաւասար իրաւունքներ պահանջելու այն աէենը, ինչ իւրաքանչիւր եւրոպացի կը պահանջէ։ Այսօր միակ բանը, որ մենք կրնանք ընել, բռունցք դառնալն է, որպէսզի կարենանք մէկ բռունցք եղած պայքարիլ այն բոլոր անարդարութիւններուն դէմ, զորս, ցաւօք, կը թելադրեն աշխարհաքաղաքական խաղերը»։
Հաւաքուածները խորհրդանշական երդում տուին` պայքարելու յանուն Հայաստանի և Արցախի. «Պիտի չզիջինք և պիտի չհաշտուինք։ Հայաստանի և Լեռնային Ղարաբաղի հայութիւնը կրնայ մեզի ապաւինիլ»։
«Եւրոպացիները Յանուն Արցախի» նախաձեռնութեան ի զօրակցութիւն Լեռնային Ղարաբաղի և Ատրպէյճանի ցեղային զտումներն ու ցեղասպան քաղաքականութիւնը դատապարտող համաեւրոպական ժողովրդային հաւաքը տեղի կ՚ունենայ Եւրոպական քաղաքական համայնքի՝ 5 Հոկտեմբերին կայանալիք երրորդ գագաթնաժողովին ընդառաջ, որուն շրջագիծին մէջ կը նախատեսուի Հայաստանի վարչապետ Նիկոլ Փաշինեանի և Ատրպէյճանի նախագահ Իլհամ Ալիևի հանդիպումը՝ Եւրոպական Խորհուրդի նախագահ Շառլ Միշէլի, Ֆրանսայի նախագահ Էմանուէլ Մաքրոնի և Գերմանիոյ վարչապետ Օլաֆ Շոլցի միջնորդութեամբ։
Պրուքսէլի ցոյցին զուգահեռ՝ նույն օրը համանուն բողոքի ցոյցեր տեղի կ՚ունենան նաև եւրոպական շարք մը այլ երկիրներու մէջ՝ Աւստրիայիա, Շուէտ, Ֆրանսա, Չեխիա, Պուլկարիա , Յունաստան, Կիպրոս, Սլովաքիա, Գերմանիա եւ Դանիա։
«Եւրոպացիները Յանուն Արցախի» նախաձեռնութիւնը բաղկացած է Եւրոպայի հայկական համայնքներու և աւելի քան 500 եւրոպական կառոյցներու ներկայացուցիչներէն։
Լիլիթ Գասպարեան