-Սուրիոյ ֆութպոլի հաւաքականը Կիրակի, 7 Յունուար 2024-ին ժամանեց Տաուհա՝ իր մասնակցութիւնը բերելու Ասիոյ ախոյեանական մրցումներուն: Հաւաքականը դիմաւորուեցաւ մեծաթիւ սուրիացիներու կողմէ, որոնք Տաուհայի օդակայանին մէջ ծաղիկներով եւ ազգային երգերով ողջունեցին խաղացողները: Նշենք, որ հաւաքականէն պիտի բացակայի հայ մարզիկ Մարտիկ Մարտիկեանը՝ վիրաւոր ըլլալուն համար:

– Սուրիոյ պասքեթի տղոց Ա. դասակարգի ախոյեանական մրցումներուն, Հալէպի Ահլին յաջողեցաւ 82 – 74 արդիւնքով պարտութեան մատնել Դամասկոսէն ժամանած Ուահտէն: հանդիպումի ամբողջ տեւողութեան Ահլին կրցաւ տիրապետել արդիւնքին եւ յաղթել։

78 տարեկանին իր մահկանացուն կնքեց համաշխարհային ֆութպոլի լեկենտ, 1974 ֆութպոլի աշխարհի ախոյեան, գերմանացի ֆութպոլիստ Ֆրանց Փեկենփաուըր: Ըստ  DPA գործակալութեան, գերմանացի մարզիկի ընտանիքին անդամները փոխանցած են, որ Ֆրանց մահացած է Կիրակի 7 Յունուարին: 1974 թուականի աշխարհի առաջնութենէն բացի, Փեկենփաուըր նաեւ արժանացած է Եւրօ-1972-ի ախոյեանութեան։ Միւնեխի «Պաւարիայի» կազմին հետ գերմանացի պաշտպանը չորս անգամ տիրացած է Գերմանիոյ առաջնութեան՝ երեք անգամ նուաճած է  Եւրոպայի Չեմփիընզ Լիկի գաւաթը: Փեկենփաուըր նաեւ երկու անգամ արժանացած է «Ոսկի գնդակ» մրցանակին:

Մանչեսթըր Սիթիի յարձակող Էրլինկ Հալանտ համամտութիւն յայտնած է մեկնելու այլ ակումբ՝ փոխան 100 միլիոն եւրոյի։ Ըստ կարգ մը մարզական լուրերու, Ռէալ Մատրիտ իր պատրաստակամութիւնը յայտնած է վերոյիշեալ գումարով իր կազմին մէջ ներառնելու Նորվեկիացի խաղացողը: Այս մասին յայտարարած է նաեւ  Football Espana-ն: Աղբիւրին համաձայն, Փրեմիէր Լիկի ակումբները պէտք է ծախսեն առնուազն 200 միլիոն եւրօ, որպէսզի համոզեն Մանչեսթըր Սիթին ազատ արձակելու նորվեկիացի խաղացողը, մինչդեռ արտասահմանեան խումբերը կրնան կազմակերպել Հալանտի տեղափոխութիւնը 100 միլիոն եւրոյով: Աւելցնենք, որ վերջին երկու տարիներուն ընթացքին Ռէալի կազմը հետաքրքրուած էր ֆրանսացի խաղացող Քիլիան Մպափէով, սակայն անոր անտարբեր կեցուածքներուն համար Ռէալ կը մտածէ ձերբազատիլ Մպափէէն եւ կազմին միացնել Հալանտը։ Այս մրցաշրջանին 23-ամեայ Հալանտը Փրեմիէր Լիկին հետ մաս կազմած  է 15 հանդիպումի եւ դարձած է 14 կոլի եւ 4 կոլային փոխանցման հեղինակ։