Եվրոպական խորհրդարանը 13 Մարտ 2024-ին ընդունած է «Եւրոպական Միութեան և Հայաստանի միջեւ կապերու սերտացման եւ Ատրպէյճանի ու Հայաստանի միջև խաղաղութեան համաձայնագրի անհրաժեշտութեան մասին» բանաձևը։
ՀՅԴ Հայ Դատի Եւրոպայի գրասենեակի դիրքորոշումը յիշեալ բանաձևին վերաբերեալ հետևեալն է․
Հայ Դատի Եւրոպայի գրասենեակը երախտապարտ է Եւրոպական խորհրդարանին՝ Արցախի և Հայաստանի Հանրապետութեան նկատմամբ Ատրպէյճանի ապակառուցողական քաղաքականութեան վերաբերեալ առարկայական դիրքորոշման համար։ Իբրև համաեւրոպական բնոյթի համայնքային կազմակերպութիւն՝ Հայ Դատի Եւրոպայի Յանձնախումբը և իր տեղական յանձնախմբերը աշխուժօրէն աշխատած են և պիտի աշխատին Հայաստանի և ԵՄ-ի միջև աւելի ամուր, սերտ և կշռութաւոր կապերու հաստատման համար: Միևնոյն ատեն, հաշուի առնելով տարածաշրջանի աշխարհաքաղաքական իրողութիւնները, փոխլրացնող արտաքին քաղաքականութիւնը Հայաստանի համար այն ուղին է, որով պէտք է առաջ ընթանալ՝ յանուն ամուր և կենսունակ հայկական պետականութեան։
Նկատենք` ի թիւս այլ դրոյթներու, Եւրոպական խորհրդարանի բանաձևը՝
– կ՚առաջարկէ դիտարկել Հայաստանին ԵՄ անդամակցութեան թեկնածուի կարգավիճակի տրամադրումը՝ պայմանով, որ Հայաստանը շահագրգռուած ըլլայ և համապատասխանէ «Քոփենհակնեան չափանիշներուն»։
– կը նախազգուշացնէ Ատրպէյճանը` Հայաստանի նկատմամբ իւրաքանչիւր հնարաւոր ռազմական արկածախնդրութեան համար և կ՚ընդգծէ, որ Նախիջևանի արտագաւառի հետ Ատրպէյճանի կապի խնդիրները պէտք է լուծուին Հայաստանի ինքնիշխանութեան և տարածքային ամբողջականութեան նկատմամբ լիակատար յարգանքով։
– Ատրպէյճանին կոչ կ՚ուղղէ անկեղծօրէն ներգրաւուելու Լեռնային Ղարաբաղի հայերու հետ համապարփակ և թափանցիկ երկխօսութեան մէջ՝ ապահովելու անոնց իրաւունքներու յարգանքը և երաշխաւորելու անոնց անվտանգութիւնը, ներառեալ միջազգային ներկայութեան ներքեւ իրենց տուներ արժանապատիւ և ապահով կերպով վերադառնալու և ապրելու իրաւունքը։
– կ՚ընդգծէ, որ ԵՄ-ը պէտք է պատրաստ ըլլայ պատժամիջոցներ կիրառելու տարբեր անձերու և կազմակերպութիւններու նկատմամբ, որոնք կը սպառնան Հայաստանի ինքնիշխանութեան, անկախութեան և տարածքային ամբողջականութեան,
– կ՚ընդունի անվտանգութեան և պաշտպանութեան ոլորտներուն մէջ ԵՄ-ի և Հայաստանի համագործակցութեան ամրապնդման հրատապ անհրաժեշտութիւնը։
ՀՅԴ Բիւրոյի Հայ Դատի Կեդրոնական Գրասենեակ
15.03.2024