«Երկիր».-Վարչապետ Նիկոլ Փաշինեան 27 Յունիսին ընդունած է Հարաւային Կովկասի եւ Վրաստանի ճգնաժամի հարցերու Եւրոպական Միութեան յատուկ ներկայացուցիչ Տոյվօ Քլաարին:
Վարչապետ Փաշինեան շեշտած է Հայաստան-Եւրոպական Միութիւն յարաբերութիւններու շարունակական խորացման ու սերտացման կարեւորութիւնը եւ անդրադարձած է ՀՀ-ԵՄ Համապարփակ եւ ընդլայնուած գործընկերութեան համաձայնագիրին:
Նիկոլ Փաշինեան յայտնած է, որ Հայաստանի կառավարութիւնը հետեւողական կը հետապնդէ ժողովրդավարութեան զարգացման, դատաիրաւական համակարգի արմատական բարեփոխման, մարդու իրաւունքներու պաշտպանութեան ուղղութեամբ շարունակական քայլերու, ծրագրերու իրականացման գործը, եւ ՀՀ-ԵՄ համաձայնագիրը կը նպաստէ Հայաստանի համար առանցքային նշանակութիւն ունեցող բարեփոխումներու արդիւնաւէտ իրականացման:
Տոյվօ Քլաար ըսած է, որ Եւրոպական Միութիւնը եւս կարեւոր կը համարէ Հայաստանի հետ գործակցութեան աշխոյժ զարգացումը եւ տարբեր ոլորտներու մէջ յառաջընթաց քայլ արձանագրելու ուղիին մէջ պատրաստ է շարունակել օժանդակելու մեր երկրին:
Հանդիպման ընթացքին զրուցակիցները անդրադարձած են Լեռնային Ղարաբաղի հակամարտութեան կարգաւորման գործընթացին: Վարչապետ Փաշինեան դիտել տուած է, որ Հայաստան հակամարտութեան կարգաւորումը բացառապէս խաղաղ ճանապարհի մէջ կը տեսնէ եւ հաւատարիմ է ԵԱՀԿ Մինսքի խմբակի համանախագահութեան ձեւաչափին համաձայն հիմնահարցի խաղաղ կարգաւորման ուղղուած բանակցային գործընթացին:
ՀՀ վարչապետն ու Հարաւային Կովկասի եւ Վրաստանի ճգնաժամի հարցերու ԵՄ յատուկ ներկայացուցիչը միտքեր փոխանակած նաեւ տարածաշրջանային հարցերուն եւ զարգացումներուն շուրջ: