«Ապառաժ».- ՀՅԴ «Ապառաժ»-ի շրջանի Շրջանային ժողովը տեղի ունեցաւ 6-7 Յուլիսին եւ ընտրեց Կեդրոնական Կոմիտէի նոր կազմ մը:

ՀՅԴ Արցախի կազմակերպութեան Շրջանային ժողովը հրապարակեց հետեւեալ յայտարարութիւնը.

«ՀՅ Դաշնակցութեան Արցախի կազմակերպութեան բարձրագոյն ժողովը, քննելով եւ վերլուծելով Արցախում տիրող կացութիւնը եւ յառաջիկայ տեղական ինքնակառավարման մարմինների (ՏԻՄ), նախագահական եւ խորհրդարանական ընտրութիւններում Դաշնակցութեան դիրքորոշումները, արձանագրելով, որ որոշ քաղաքական ուժերի եւ առանձին գործիչների կողմից վաղաժամկէտ սկսած նախագահական ընտրութիւնների նախապատրաստման  գործընթացը եւ սահմանադրական իրաւակարգաւորումներին հակասող փաստացի  քարոզարշաւը հասարակութեան ծայրաստիճան բեւեռացման պատճառ է դարձել, ինչին նպաստել է նաեւ իշխանութեան կողմից երկրում արմատական բարեփոխումների գործընթացի անհետեւողականութիւնը.

Հաշուի առնելով, որ.

Հայաստանի Հանրապետութեան իշխանութիւնների հետ յարաբերութիւններում յառաջացած մտահոգիչ լարուածութիւնը,

Բանակցային գործընթացում առկայ մարտահրաւէրներն ու վտանգները եւ այդ առումով Արցախի սուբիեկտայնութեան բարձրացման հրամայականը,

Արցախի հիմնախնդրի համահայկական նշանակութիւնը հայ ժողովրդի պահանջատիրութեան եւ նպատակների իրականացման գործում,

Հաստատում է, որ`

– Նոր սահմանադրական կարգով իրականացուող առաջին համապետական ընտրութիւնները վճռորոշ դեր են ունենալու Արցախի Հանրապետութեան ներքին կեանքում եւ արտաքին յարաբերութիւններում,

– Ընտրութիւնները պէտք է մէկ անգամ եւս վերահաստատեն էլ աւելի հզօրացուած, աւելի ժողովրդավարական եւ ընկերային պետութիւն կառուցելու ժողովրդի կամքը,

– Քաղաքական որեւէ գործընթաց պէտք չէ խաթարի ժողովրդի միասնականութիւնը:

ՀՅԴ Արցախի կազմակերպութեան Շրջանային ժողովը համոզուած է, որ Արցախի առաջընթացի երաշխիքը ազատ, արդար եւ թափանցիկ ընտրութիւնների արդիւնքում ազգային օրակարգով  առաջնորդուող իշխանութեան ձեւաւորումն է:

Այդպիսի օրակարգով առաջնորդուող իշխանութեան պետական ուղեգիծը պէտք է հիմնուած լինի «Զարգանալ` չզիջելով» գաղափարի վրայ, ապահովելով.

– Արցախի Հանրապետութեան Սահմանադրութեամբ ամրագրուած տարածքային ամբողջականութեան վերականգնումը,

– Հայաստան-Արցախ  ռազմավարական դաշինքի` իրաւապայմանագրային հիմքի վրայ ամրապնդումը,

Ընկերային արդարութեան, մարդու իրաւունքների պահպանութեան եւ օրէնքի գերակայութեան վրայ հիմնուած ներազգային համերաշխութեան ապահովումը,

Զսպումների եւ հակակշիռների մեքանիզմների ներդրմամբ պետական համակարգի հաւասարակշռման, անմիջական ժողովրդավարութեան ընդլայնմանն ու ամրապնդմանն ուղղուած` Արցախի Հանրապետութեան նոր Սահմանադրութեան ընդունումը,

Վերաբնակեցման համակարգուած, լայնածաւալ ու հետեւողական իրականացումը:

Քննելով յառաջիկայ համապետական ընտրութիւնների հարցը` ՀՅԴ Արցախի կազմակերպութեան բարձրագոյն ժողովը որոշեց.

Մասնակցել Արցախի Հանրապետութեան նախագահական եւ խորհրդարանական ընտրութիւններին,

Յանձնարարել նորընտիր Կենտրոնական կոմիտէին` բազմակողմանի բանակցութիւններ սկսել ազգային միասնական օրակարգի հիման վրայ նախագահի համաձայնեցուած թեկնածու առաջադրելու շուրջ,

Բանակցութիւնների արդիւնքների հիման վրայ աշնանը հրաւիրել Արտակարգ ժողով` ՀՅ Դաշնակցութեան կողմից Արցախի Հանրապետութեան նախագահի թեկնածու առաջադրելու օրակարգով»:

ՀՅԴ ԱՐՑԱԽԻ ԿԱԶՄԱԿԵՐՊՈՒԹԵԱՆ
ՇՐՋԱՆԱՅԻՆ ԺՈՂՈՎ

7 Յուլիս 2019