«Արմէնփրէս».-Սփիւռքի գործերու գլխաւոր յանձնակատար Զարեհ Սինանեան Մոսկուա կատարած աշխատանքային այցելութեան ընթացքին՝ 21 Յուլիսին, հանդիպում ունեցած է ՀՅԴ Հայ Դատի Մոսկուայի Յանձնախումբի ներկայացուցիչներուն հետ: ՀՅԴ Հայ Դատի Մոսկուայի գրասենեակի պատասխանատու Ներսէս Ներսէսեան ողջունելով Զարեհ Սինանեանը եւ անդրադառնալով գլխաւոր յանձնակատարի Ռուսաստանի Դաշնութեան այցելութեան ըսած է . «Համախմբումի շունչ զգացուեցաւ: Դուք յաջողեցաք առանձնակի ջանքերով համախմբել տարբեր շրջանակներ»:
Գլխաւոր յանձնակատարը կարեւոր համարած է Սփիւռքի մէջ գործող կառոյցներու համախմբուած աշխատանքը եւ ներկայացուցած է Հայաստան-Սփիւռք գործակցութեան իր տեսլականը: «Ուր որ գտնուած եմ, միշտ եղած եմ հայրենիքիս զինուորը», իր խօսքը եզրափակելով ըսած է Զարեհ Սինանեան: