Թանկագի՛ն հայրենակիցներ Հայաստանում, Արցախում եւ Սփիւռքում,
Հայաստանի Հանրապետութեան սիրելի՛ քաղաքացիներ,
Այսօր Հայաստանի Անկախութեան օրն է:
Այն առանձնայատուկ պատգամ է` աւելի լաւ ճանաչելու ինքներս մեզ` մեր երկիրը, մեր ինքնութիւնը, մեր հնարաւորութիւնները, մեր ներուժը:
Ինչ որ ունենք այսօր` Ազատութիւն, Անկախութիւն, Հայրենիք, Պետութիւն, այդ ամէնի համար պարտական ենք ինքներս մեզ:
Ինչ որ կարողանալու ենք ձեռք բերել, լինելու է կրկին մեր շնորհիւ` մեր համախմբուածութեան, մեր միասնական ջանքի, գործի վերածուած մեր մտքի, միմեանց հանդէպ յարգանքի ու հանդուրժողականութեան:
Լաւագոյն ճանապարհն ամէնօրեայ աշխատանքն է, ամէնօրեայ արարումը, հոգատարութիւնը երկրի, պետութեան հանդէպ, հայրենապաշտութիւնը եւ հայրենաճանաչութիւնը:
Հայրենիքը կը մնայ ընդամէնն աշխարհագրական քարտէզ, եթէ այն չապրեցնենք մեր մէջ, չապրեցնենք մեզնով եւ չապրենք նրանով:
Հայրենիքը սիրելու եւ նրանով ապրելու համար պէտք է այն ճանաչել: Իսկ ճանաչելու համար քարտէզի վրայ նրա տեղն իմանալը բաւարար չէ: Հայրենիքը տեսնել է պէտք` Գիւմրիից մինչեւ Գորիս, Սիւնիքից մինչեւ Լոռի, Արցախից մինչեւ Տաւուշ, Լորից մինչեւ Ահնիձոր:
Հայրենիքը տեսնելուց եւ զգալուց յետոյ աւելի յստակ է դառնում, թէ ինչ է պէտք անել նրա համար, ինչպէս է պէտք է անել եւ ինչու է պէտք անել: Մենք պէտք է ունենանք տեսլական, առաջարկենք եւ իրագործենք գաղափարներ ու ծրագրեր:
Հայրենիքը ճանաչելու համար պէտք է հասկանալ հայրենատիրոջը, որովհետեւ Հայրենիքը նաեւ մարդիկ են, որոնք մեզ հետ, մեր կողքին ապրում եւ արարում են: Ինչպէս անկախութեան ձեռք բերման բախտորոշ օրերին եւ դրան յաջորդող դժուար տարիներին, այսօր էլ մեր պետութեան առջեւ կան մարտահրաւէրներ, որոնց յաղթահարման բանալին գտնւում է բացառապէս մեր ձեռքերում:
Հրանտ Մաթեւոսեանն ասում էր. ,հայրենիք ենք հիմնել, Հայրենիք ենք բարձրացնում…Հայրենիքը պահանջում է իր բոլոր որդիների, մեր ամէնամեայ, ամէնօրեայ, այսժամեայ հաւատաւոր ջանքը:
Չխնայե՛նք մեզ, մեր ջանքը, մեր միտքը, մեր սէրը Հայրենիքի համար: Պաշտպան ու պահապան լինենք մեր պետութեանը, մեր եկեղեցուն, հանդուրժող ու սրտացաւ լինենք միմեանց հանդէպ:
Որպէս պետութիւն, որպէս ժողովուրդ մենք կամուրջ ենք քաղաքակրթութիւնների միջեւ: Աշխարհի տարբեր վայրերում խեղաթիւրւում են արժեհամակարգերը, քաղաքակրթութիւնները զոհաբերւում են քաղաքականութեանը, մարդկային յարաբերութիւնները` տարատեսակ շահերի, մարդիկ միմեանց հանդէպ դառնում են անտարբեր ու յաճախ` օտար:
Ուստի առաւել քան անհրաժեշտ է հոգատար լինել մեր արժեհամակարգի, մէկմէկու նկատմամբ: Մենք կարող ենք որպէս մարդ լինել միմեանցից տարբեր, բայց յանուն մեր ընդհանուր նպատակների, յանուն մեր անկախութեան, յանուն մեր ապագայի պարտաւոր ենք լինել համախմբուած ու միասին:
Յաւերժ փառք անկախութեան համար իրենց կեանքը նուիրաբերած բոլոր հերոսներին:
Աստուած զօրաւիգ անկախութեան եւ անվտանգութեան երաշխաւոր մեր բանակին:
Կեցցէ՛ անկախ Հայաստանի Հանրապետութիւնը:
Կեցցէ՛ մեր ժողովուրդը Հայաստանում, Արցախում եւ Սփիւռքում:
Կեցցէ՛ Հայաստանի Հանրապետութեան քաղաքացին:
Աստուած պահապան բոլորիս:
