Այս գարնան հագուստի նորոյթն է պարզ առօրեայի եւ դասականի համադրութիւնը: Մարդիկ կը նախընտրեն  յարմար-աւէտութեան ու գեղեցիկի համադրումը:

Անդրադառնալով գարնանային 2022-ի գոյներուն, կրնանք ըսել որ կապոյտի երանգները, կանաչը, ճերմակը, սեւը, ինչպէս նաեւ դեղինը տիրող գոյներն են այս գարնան:

Հիմնական նորոյթը՝ երկար ծոպերն են: Աշխարհահռչակ  «Dior»-ը, « Alberta Ferretti»-ին, «Salvatore Ferragamo-ն  կ’առաջարկեն  ծոպերու գործածութիւնը զգեստներու վրայ:

Այս եղանակին նորոյթ է նաեւ լայնափողք տաբատներ, այս լայն տաբատները կը համադրուին քոստիւմներու պարագային ալ, բաց գոյներով:

Նորաձեւ կը համարուին փայլփլուն հագուստներ, նաեւ մետաղի փայլքով զգեստներ:

Ժանեակները (կիւփիւռ) դարձեալ նորոյթ են: Անոնք այս տարուան գլխաւոր տեղը կը գրաւեն մանաւանդ՝ ճերմակ ժանեակները:

Լայնածաւալ հագուստները, անշուշտ նիհարակազմ կիներու համար, կը ներկայացնեն նրբութիւն եւ իգականութիւն:

Իսկ հագուստներու կտրուածքները աւանդական կտրուածքներով չեն սահմանափակուիր, ձեւագէտներ կ’առաջարկեն նոր տարբերակներ: Ինչպէս օրինակ V-ձեւով կտրուածքը կլոր եւ քառակուսի կտրուածքներու փոխարէն, գործածական են նաեւ անսովոր ձեւեր կրող լանջաբացուածքները, աւելի գրաւիչ ըլլալու նպատակով:

Ցած գօտատեղիով ճինզերը եւս պիտի ընդհանրանան: Այս տաբատները երկար ընդմիջումէ ետք կրկին նորաձեւութեան գագաթնակէտին յայտնուած են:

Ձեւագէտները խորհուրդ կու տան այս տաբատները հագնիլ կարճ գազակներով:

Այս եղանակի գլխաւոր նորոյթը կարճ շրջազգեստներն են:

Այս եղանակին պէտք է ընտրել դեղինի եւ մանիշակագոյնի բոլոր երանգներով պատրաստուած հագուստները, որոնք ձեր գեղեցկութիւնն ու մարմնի բնական գոյնը կ’ընդգծեն: Կանանց հագուստները պէտք է ունենան վառ գոյներով բացուած գարնանային ծաղիկներ:

Ձեւագէտներ առատ փետուրներով ձեւաւորած են ո՛չ միայն հագուստները, այլեւ արծաթեայ կամ այլ զարդերը: Եթէ մտավախութիւն ունիք, որ չէք կրնար փետուրով հագուստը համադրել այլ իրերու հետ, կրնաք փետուրով գլխարկ կամ փետուրով զարդարուած պայուսակ օգտագործել:

Նորոյթ է նաեւ ուսերուն ամրացուող ապարանջանները, որոնք զարդարանքի հետաքրքիր տարրեր են:

Իսկ կօշիկներու պարագային նորոյթ են՝ սանտալները եւ բոկոտները՝ բարձր կռունկներով, յատկապէս կանաչ եւ կապոյտ գոյներով: