Սիրելի՛ հայրենակիցներ,
Այսօր Արցախի անկախութեան հռչակման 28-րդ տարեդարձն է: Այս երեք տասնամեակը համայն հայութեան մաքառումի, տոկունութեան, հերոսութեան ու յաղթանակի պատմութիւն է, որ կերտեց մեր ժողովուրդը:
Արցախի մեր պատմական հողում ազատութեան տենչը գալիս է դարերի խորքից: Հայոց երկրի այդ հատուածում հնուց ի վեր դրուել են հայկական պետականութեան ամուր հիմքերը, կազմաւորուել է հզօր եւ մարտունակ բանակ, ստեղծուել են գիտակրթական կենտրոններ եւ մշակութային արժէքներ, ձեւաւորուել խաղաղ գոյակցութեան ու բարիդրացիութեան աւանդոյթներ եւ, ամենակարեւորը, հայրենի հողն ու ընտանիքը ամէն գնով պաշտպանելու հզօր կամք ու անպարտ ոգի:
Բայց պատմութիւնը միայն անցեալը չէ, պատմութիւնը նաեւ այսօրն է, պատմութիւնը ստեղծուում է նաեւ վաղուայ համար:
1988-ին բոլորս միասին երազում էինք ազատ Արցախի մասին, յետոյ, երբ վտանգուած էր ազատութիւնը, եւ հայ ժողովուրդը դուրս էր եկել հերթական գոյամարտի, բոլորս աղօթում էինք Արցախի փրկութեան համար, այսօր, երբ անկախութիւնն իրականութիւն է, մենք բոլորս պահանջում ենք խաղաղ ու անվտանգ Արցախ:
Ազատութիւնն ու խաղաղութիւնը չեն նուիրուել արցախցուն, այլ` ձեռք են բերուել հազարաւոր հայորդիների կեանքի գնով, արիւնով ու հայրենիքի նկատմամբ անսահման սիրով ու նուիրումով է ամրագրուել 28 տարի առաջ ընդունուած Արցախի Անկախութեան հռչակագիրը:
Այսօր էլ դեռ շատ են անելիքները մեր բարդ եւ յարափոփոխ ժամանակներում: Արցախի ազատագրման եւ անկախութեան համար զոհուածները, Արցախում ապրող ու իրենց ամենօրեայ կեանքով հերոսութեան օրինակ ծառայող մարդիկ, մեր ապագայ սերունդներն արժանի են, որ Արցախի ապագան շարունակուի կերտուել որպէս յաղթանակների, խաղաղութեան ու բարիդրացիութեան պատմութիւն:
Այսօր, աւելի քան երբեւէ, մենք հաստատակամ եւ ամուր ենք հայոց միասնականութեան խորհրդանիշ ինքնիշխան Արցախի Հանրապետութիւնը ու նրա հերոս զաւակներին պաշտպանելու հարցում: Այդ գիտակցութեամբ եմ իմ անկեղծ բարեմաղթանքները յղում Արցախին դէպի յաջողութիւն ու յաղթանակ տանող բոլոր ձեռնարկներում:
Արցախի Հանրապետութեան օրուայ առթիւ շնորհաւորում եմ բոլորիս Արցախում, Հայաստանում եւ Սփիւռքում:
Միասի՛ն պաշտպանենք ու պահպանենք մեր յաղթանակներն ու ձեռքբերումները: Եւ թող Աստուա՛ծ պահապան լինի Արցախին, Հայաստանին ու մեր ժողովրդին:
