Քառասուն տարիէ ի վեր Սուրիոյ Երիտասարդական Միութեան իրարայաջորդ սերունդները, իրենց երդման հաւատարիմ, կը գործեն ժողովուրդին հետ, ժողովուրդին համար, որպէս կամաւոր, ծառայասէր երիտասարդներ:
Այսօր անոնք հպարտութեամբ կը յիշատակեն իրենց միութեան 40-ամեակը:
Արդարեւ, Կիրակի, 3 Նոյեմբեր 2019-ին տեղի ունեցաւ ՍԵՄ-ի հիմնադրութեան 40-ամեակին նուիրուած հանդիսութիւնը: Ներկաները նախքան հանդիսութիւնը վայելեցին ցուցահանդէսը, որ կը ներկայացնէր ՍԵՄ-ի 40 տարուան հրատարակութիւնները՝ պարբերաթերթեր, թերթօններ, օրացոյցներ, թղթապանակներ, շապիկներ եւ գլխարկներ, յուշանուէրներ, յուշադրօշներ, ծանուցումներ եւ յօդուածներ, որոնք լոյս տեսած էին Հալէպի «Գանձասար» շաբաթաթերթին մէջ, ինչպէս նաեւ 1977-ին ՀՅԴ 21-րդ ընդհանուր ժողովով վաւերացուած զինանշանի մը պատկերը, որուն ներքեւ Սուրիոյ շրջաններուն մէջ երիտասարդական միութիւն հիմնելու առաջարկը երկրորդող ընկերներուն ստորագրութիւնները դրոշմուած էին:
Հայերէն բացման խօսքով հանդէս եկաւ Ընկհ. Մարիա Նալպանտեան: Ան ըսաւ, որ ՍԵՄ-ը կը միտի պատրաստել ազգային գիտակցութեամբ լիցքաւորուած երիտասարդներ, ունենալ Հայ Դատին ու հայ ժողովուրդի պահանջատիրութեան պաշտպան ու պահապան նուիրեալ զինուորներ:
Արաբերէն բացման խօսք արտասանեց ընկ. Հրակ Փայասեան: Ան հաստատեց, որ մենք՝ երիտասարդներս, ամրակուռ շարքերով, հաւատքով ու աշխատանքով պիտի նուիրուինք Հայ Դատին: Հանդիսութեան բացումը կատարուեցաւ թատերական պատկերով մը, որ կը ներկայացնէր ՍԵՄ-ի հիմնադրութեան պատմութիւնը: Ապա ելոյթ ունեցաւ ՍԵՄ-ի նուագախումբը, հրամցնելով «Ախպերս ու Ես», «Մարտիկի Երգը», «Ղարաբաղ» (մենակատար ընկ. Յովիկ Պարսումեան): Շարունակուեցաւ ներկայացումը՝ ՍԵՄ-ի մասնաճիւղերուն 40-ամեայ գործունէութեան յիշատակումով:
Իրենց ճիգերով ու հեւքոտ աշխատանքով ՍԵՄ-ականներ պարախումբ ալ կազմած էին: Պարախումբը ներկայացուց «Բերդ» եւ «Եարխուշտա» պարերը, իսկ ընկհ. Կասիա Պաղտիկեան առաջին անգամ ըլլալով մեկնաբանեց ՍԵՄ-ի 40-ամեակին նուիրուած «ՍԵՄ-ականներ» երգը, որմէ ետք բեմ հրաւիրուեցան ընկհ. Աննա Պարսամեան, ընկհ. Բեկի Զատիկեան եւ ընկ. Վիգէն Չաղլասեան ասմունքելու ազգային-յեղափոխական գրականութենէն քաղուած ընտրանի մը:
Օրուան ուղերձը արտասանեց ընկ. Քրիստ Խրոյեան, յիշելով որ ՍԵՄ-ականը առաւօտուն դպրոցական գրասեղաններու ետին, համալսարանական լսարաններու մէջ գիտութիւն կ’ամբարէր, նոյն այդ երիտասարդը քանի մը ժամ ետք, պատերազմական ծանր օրերուն հրդեհ կը շիջանէր, վիրաւորներ կը փոխադրէր, նպաստ կը բաշխէր, Հայ Ծերանոցի ծերունիները ապահով վայր կը տեղափոխէր: Իսկ գիշերները պահակութիւն կ’ընէր, վճռած էր իր կեանքին գնով պաշտպանել մեր ժողովուրդը, մեր սրբագոյն կառոյցները՝ եկեղեցի, դպրոց, ակումբ…: Պատերազմի տարիները խլեցին երիտասարդին խանդավառութիւնը, բայց յուսահատութեան չմատնեցին զինք: Այդ յոյսն էր, որ վերաբռնկեցաւ եւ շրջան մը վերջ ծիածանը տարածուեցաւ Հալէպի երկնակամարին վրայ՝ խաղաղութիւն աւետելով բոլորին: Միութիւնը իր նախկին եռանդը վերագտաւ: Վրանները վերստին լարուեցան Քեսապի մէջ, թէ այլուր, բանակումի փողը հնչեց ու մեր դրօշները կրկին ծածանեցան հայրենական տարածք դարձած մեր բանակավայրերու կայմերուն վրայ: Տարիները կը թաւալին եւ ՍԵՄ-ը կը շարունակէ նոր ուժեր հասցնել: Ուժեր, որոնք Սփիւռքի մէջ մաքառելով մէկտեղ, իրենց աչքերը սեւեռած կը պահեն ձիւնածածկ գագաթներուն եւ կը սպասեն, որ հայ հերոսներուն բազուկները այնտեղ կրկին եռագոյնը ծածանեցնեն:
Գեղարուեստական յայտագիրը շարունակուեցաւ: Ընկհ. Մարիա Չիչեան մեներգեց «Առաքինի Ընկեր»ը:
Աւարտին ՍԵՄ-ի երգչախումբը, տիկ. Գայիանէ Սիմոնեան -Տէրեանի գեղ. ղեկավարութեամբ, ներկայացուց «Վերցրուք Տղերք Հրացան», «Խնուսից Գալով», «Մշոյ Դաշտեր», «Ախ Ֆիտայիք», «Դեհ Զարկէք», «Գարեգին Նժդեհի Յիշատակին», «Հպարտ Անպարտ Դաշնակցութիւն», «Փառք Քեզ, Ով ՍԵՄ» երգերը, երգեհոնի նուագակցութեամբ ընկեր Արմէն Ասայեանի։
Հանդիսավար ընկհ. Ժագի Մահսերէճեան հանդիսականներուն ծափողջոյններուն ներքեւ, մէկ առ մէկ բեմ հրաւիրեց նախ երգչախումբի ղեկավարը, ապա պարախումբի պարուսոյցը՝ պրն. Յարութ Պարոնեանը, թատրոնի բնաբանին հեղինակը՝ ընհ. Յուշիկ Ղազարեանն ու թատերական ներկայացման բեմադրիչը՝ պրն. Գէորգ Արոյեանը:
Օրուան եզրափակիչ պատգամը ուղղեց Բերիոյ Հայոց Թեմի Բարեջան Առաջնորդ Գերշ. Տէր Մասիս Սրբ. Եպս. Զօպուեան: Սրբազանը գնահատելով երիտասարդներուն ինքնաշխատութեամբ պատրաստուած գունեղ եւ իմաստալից յայտագիրը ըսաւ. «ՍԵՄ-ը ոչ միայն պար, երգ եւ ասմունք կ’ուսուցանէ, այլեւ հայ երիտասարդին նկարագիրը կը կերտէ՝ հաւաքական աշխատանքին ու դաստիարակչական իր ծրագրին ընդմէջէն: Մեր ժողովուրդը այսպէս կ’ընկալէ ՍԵՄ-ը: Իւրաքանչիւր ՍԵՄ-ական սուրիահայութեան հպարտութիւնն է: Այս երիտասարդներուն վստահուած է մեր համայնքին ապագան: Այսօր, այս բեմին վրայ յոյս տեսանք, ուժ տեսանք, ապրում եւ կազմակերպուած աշխատանք տեսանք, փոխադարձ յարգանք ու գործակցութեան օրինակ տեսանք, պայքարի ոգի տեսանք: Կեցցէ՛ք, սիրելի ՍԵՄ-ականներ»:
Հանդիսութիւնը աւարտին հասաւ սրբազան հօր «Պահպանիչ» աղօթքով:
Վեհան Պարսումեան