Ներքին հակառակորդի ձեռքը դարձեալ հասել է մեր արժէքներին, մեր սրբութիւններին:

Այս գիշեր վանդալի, ներքին թշնամու թունաւորուած ու մթագնած ուղեղն ու ձեռքը չեն երերացել` պղծելու Կոտայքի մարզի Պռոշեան համայնքի Պանթէոնը:

Սա այն Պանթէոնն է, ուր հանգչում են մեր հերոսները. մեր արժանապատիւ գոյութեան, մեր ազգային հաւաքական իղձերի, մեր անվտանգութեան ու անխտիր բոլորի խաղաղ երկնքի համար, մեր արդար պայքարի համար նահատակուած հերոսները` Պետոն, Հրաչը, Ազնաուրը….

Սա այն Պանթէոնն է, յիշատակի ու յանձնառութեան ուխտավայրը, ուր երիտասարդ սերունդը երդւում է` խոստանալով ոչ միայն չուրանալ ազգի հերոսների յիշատակը, այլեւ լինել նրանց ուխտի ժառանգորդն ու շարունակողը:

Բայց, աւաղ, մեր սեփական հողում կան նաեւ այլ «արժէքներով» սնուած ու առաջնորդուող ճիւաղներ, ժամանակին ախտորոշուած` ազգային տականքը:

Այդ տականքի ձեռքն հասաւ Եռաբլուր` չխնայելով անգամ Ապրիլեան հերոսներին, հասաւ Արագածի փէշեր` պղծելով ՀՅԴ Շուշիի գումարտակին եւ Լէոնիդ Ազգալդեանին նուիրուած յուշատախտակները:

Այս տեսակի ի յայտ գալը, որքան էլ ցաւալի է, բայց պատահականութիւն չէ:

Ամիսներ շարունակ մոլեգնող ատելութեան, անհանդուրժողականութեան, հասարակութիւնը սեւերի ու սպիտակների, յեղափոխականների եւ հակաների, Հայաստանը` հնի ու նորի, անցեալը հրէշայնացնելու, մերժելու եւ պիտակաւորելու, բանակը, նրա հերոսներին, ազգային եկեղեցին, դպրոցն ու ընտանիքը մերժող այս ինքնակործան ընթացքը պիտի յանգեցնէր հոգեւոր ու մարդկային այս վանդալիզմին, այլասերումին:

Ազգային համերաշխութիւնը ջլատող, մեր ներքին դիմադրողականութիւնն ու ոգին կոտրող ու սնանկացնող այս արգահատելի դրսեւորումները, որոնք յղի են անկանխատեսելի հետեւանքներով, արգասիքն են հանրապետութիւնում տիրող բարոյահոգեբանական մթնոլորտի, մեր ազգային արժեհամակարգը խաթարող քաղաքական համակարգի:

ՀՅԴ Հայաստանի Գերագոյն Մարմինը դատապարտում է Պռոշեանի պանթէոնում տեղի ունեցածը, այն գնահատում է որպէս վանտալիզմ եւ հարուած` ուղղուած մեր հաւաքական ազգային արժէքներին, պետականութեան մարտունակութեանն ու ազգային համախոհութեանը:

Միաժամանակ պահանջում ենք, որ ՀՀ իշխանութիւնները քաղաքական գնահատական տան կատարուածին, հանրապետութիւնում տիրող բարոյահոգեբանական մթնոլորտին, իսկ մեղաւորները պատասխանատուութեան ենթարկուեն օրէնքի ողջ խստութեամբ:

ՀՅԴ Հայաստանի Գերագոյն Մարմին
02.12.2019 թ.