– Միջազգային ֆութպոլի դասաւորման Նոյեմբեր ամսուան հրապարակուած ընդհանուր աղիւսակին մէջ, Սուրիոյ հաւաքականը չորս աստիճան բարձրանալով գրաւեց 79-րդ հորիզոնականը: Կազմը Ասիոյ երկիրներու 11-րդ, իսկ արաբ երկիրներու 8-րդ դիրքը գրաւեց:

– Սուրիոյ ֆութպոլի ախոյեանութեան 7-րդ փուլի մրցումներուն , Իթթիհատ 4 – 0 արդիւնքով պարտութեան մատնեց Ֆթուէն, իսկ Դամասկոսի Ուահտէն 1 – 0 արդիւնքով յաղթեց Հըթթինին: Մնացեալ խումբերը հետեւեալ արդիւնքը արձանագրեցին՝ Թիշրին – Թալիաա 1 -0, Ուասպէ – Ճեզիրէ 2 – 0, Նաուաաիր – Սահէլ 4 – 0, Քարամէ – Ճապլէ 2 – 0, Ճէյշ – Շրթա 2 – 1:

– Անցեալ շաբթուան ընթացքին Դամասկոս ժամանեցին Պասքեթի Միջազգային Ֆետերասիոնի Ասիոյ գրասենեակի ներկայացուցիչներ՝ Յովսէփ Սէրայտարեան եւ Ռաֆֆի Գասապեան, մօտէն հետեւելու Դամասկոսի պասքեթի մարզադաշտերու պատրաստութեան, նախքան Ասիոյ մրցաշարքերու կայացումը:

Հայազգի բռնցքամարտիկ Էտկար Ղուկասեան WBA Asia South-ի մրցումներուն յաջողեցաւ տիրանալ աշխարհի ախոյեանութեան: Մրցումը տեղի ունեցաւ Ռուսիոյ մայրաքաղաք Մոսկուայի մէջ. 30 տարեկան հայ մարզիկը մրցավարներու միաձայն որոշումին համաձայն պարտութեան մատնեց Թանզանիոյ ներկայացուցիչ Կուլվու Պուշիրին եւ ձեռք ձգեց տիտղոսը:

Սպանիոյ ախոյեանի՝ Պարսելոնայի ղեկավարութիւնը ակումբի պաշտօնական կայքին մէջ յայտարարութիւն մը տարածեց, յայտնելով, թէ խումբի յարձակողական խաղացող Օսման Տեմպէլէ տասը շաբաթ պիտի բացակայի խումբի մրցումներէն, վիրաւոր ըլլալուն համար: Տեմպէլէ այս տարեշրջանին երկրորդ անգամ ըլլալով վիրաւորուեցաւ: Անցեալ Չորեքշաբթի, Եւրոպայի ախոյեանութեան մրցումներուն, Պարսելոնա Պորիսիա Տորթմոնտ հանդիպումին ընթացքին, Տեմպէլէ դուրս ելաւ դաշտէն, որովհետեւ աջ ոտքին մկանը ծանրօրէն վնասուեցաւ: Ան արցունքոտ աչքերով հրաժեշտ տուաւ ընկերներուն:

Անգլիոյ մարզիչներու հեռացումներուն ընթացքը շարունակելով, Լոնտոնի Արսենալի ղեկավարութիւնը պաշտօնազուրկ ըրաւ ֆութպոլի սպանացի մարզիչ Ունայ Էմերը: Հինգշաբթի օր խումբը Էմերի գլխաւորութեամբ կատարեց Եւրոպայի «Չեմփիընզ-լիկ»ի մրցաշարքի իր վերջին մրցումը, 2 – 1 արդիւնքով պարտութիւն կրելով Գերմանիոյ Ինթրախտ ֆրանքֆուրթ խումբին դիմաց: Արսենալը վերջին եօթը մրցումներուն չյաջողեցաւ ոչ մէկ յաղթանակ արձանագրել, որուն համար ակումբի համակիրները մրցումի ընթացքին բարձրաձայն պահանջեցին Էմերի հեռացումը, ինչպէս նաեւ դաշտի պատերուն վրայ գրութիւններ արձանագրեցին՝ իրենց դժգոհանքը արտայայտելով:

 Ռումինիոյ մայրաքաղաք Պուխարեստի մէջ տեղի ունեցաւ ֆութպոլի Եւրօ-2020-ի եզրափակիչ մրցաշարքի վիճակահանումը։ 24 խումբեր բաժնուեցան 6 խմբակներու։ 4 ուղեգրերու տէրերը յայտնի կը դառնան 2020-ի գարնան տեղի ունենալիք ՈւԵՖԱ-ի Ազգերու Լիկայի փլէյ-օֆֆի արդիւնքին համաձայն:

Եզրափակիչ մրցաշարքը տեղի կ’ունենայ 12 Յունիսէն 12 Յուլիս, Սան Պեթերսպուրկի, Ռոմայի, Ամսթրտամի, Լոնտոնի, Քլազքոյի, Պաքուի, Պուտափեստի, Միւնեխի, Քոփենհակընի, Թիֆլիսի, Պիլպաուի եւ Պուխարեստի մէջ։

Վիճակահանումի արդիւնքը հետեւեալն էր.

A խումբ (Ռոմա – Պաքու)

Իտալիա, Զուիցերիա, Թուրքիա, Ուէլզ

B խումբ (Սանկտ Փեթերսպուրկ, Քոփենհակըն)

Պելճիքա, Ռուսիա, Դանիա , Ֆինլանտա

C խումբ (Ամսթրտամ, Պուխարեստ)

Ուքրանիա, Հոլանտա, Աւստրիա, Ազգերու Լիկայի փլէյ-օֆֆի D խմբակի յաղթող

D խումբ (Լոնտոն, Քլազքօ)

Անգլիա, Խրուաթիա, Չեխիա, Ազգերու Լիկայի փլէյ-օֆֆի C խմբակի յաղթող

E խումբ (Պիլպաու, Տուպլին)

Սպանիա, Լեհաստան, Շուէտ, Ազգերու Լիկայի փլէյ-օֆֆի B խմբակի յաղթող

F խումբ (Միւնեխ, Պուտափեստ)

Գերմանիա, Ֆրանսա, Փորթուկալ ,Ազգերու Լիկայի փլէյ-օֆֆի A խմբակի յաղթող