«Երկիր».-ՀՀ արտաքին գործոց նախարարի տեղակալ Աւետ Ատոնց հանդիպած է ՀՀ-ի Չինաստանի դեսպան Թիեն Ըրլունին: Հանդիպման ընթացքին կողմերը քննարկած են Չինաստանի մէջ քորոնա մանրէի տարածման հարցը:
Դեսպան Թիեն չինական կողմին պատրաստակամութիւնը յայտնած է շարունակելու սերտ գործակցութիւնը հայկական կողմին հետ տարաբնոյթ հարցերու լուծման ուղղութեամբ: Հանդիպումին զրուցակիցները հանգամանօրէն անդրադարձ կատարած են նաեւ Չինաստանի Հուպէի նահանգին մէջ գտնուող ՀՀ քաղաքացիներուն առջեւ ծառացող հարցերուն եւ անոնց հասցէագրման համար անհրաժեշտ քայլերուն շուրջ:
ՀՀ ԱԳ նախարարի տեղակալը յայտնած է, որ Չինաստանի ՀՀ դեսպանութիւնը մշտական կապի մէջ է Չինաստանի տարբեր նահանգներուն մէջ ներկայիս բնակող եւ դեսպանատուն գրանցուած շուրջ 400 ՀՀ քաղաքացիներու հետ, որոնցմէ 7-ն այժմ կը գտնուին Հուպէի նահանգին մէջ: ՀՀ դեսպանութեան կողմէ նաեւ քայլեր առուած են կարելիութեան սահմաններուն ՀՀ քաղաքացիներու հարցերուն արձագանգելու համար:
ՀՀ ԱԳ նախարարի տեղակալ Աւետ Ատոնց աւելցուցած է, որ ՀՀ ԱԳՆ-ն եւ ՉԺՀ-ի ՀՀ դեսպանութիւնը շարունակ կապի մէջ են ՉԺՀ կառավարութեան եւ այլ գործընկեր երկիրներու դեսպանութիւններուն հետ ՀՀ քաղաքացիներու տարհանման հարցով: