ՀՅԴ Հայաստանի Գերագոյն մարմինը յայտարարութիւն տարածած է, որ կը ներկայացնենք ստորեւ.
«Համավարակի դէմ պայքարի հիմնաւորմամբ ՀՀ կառավարութիւնը հրատապ վարչակարգով Ազգային ժողով էր ներկայացրել «արտակարգ դրութեան իրաւական ռեժիմի մասին» եւ «էլեկտրոնային հաղորդակցութեան մասին» օրէնքներում լրացումներ կատարելու նախագծերի փաթեթը:
Օրէնսդրական փոփոխութիւնները ենթադրում է այնպիսի տոտալ վերահսկողութեան սահմանում, որը խաթարում է անձնական, մասնաւոր եւ ընտանեկան կեանքի սահմանադրական անձեռնմխելիութիւնը: Վարակի դէմ պայքարի արդիւնաւէտութեան, սահմանադրական հիմնարար իրաւունքների խաթարման եւ անվտանգութեան տեսանկիւնից խնդրահարոյց այս նախաձեռնութիւնը արդարացիօրէն ընդվզման եւ դժգոհութիւնների տեղիք տուեց: խորհրդարանական քուէարկութեամբ նախագծի մերժումից յետոյ էլ, օրուան իշխանութիւնը ոչ միայն չհրաժարուեց իր նախաձեռնութիւնից, այլեւ, արհամարհական վերաբերմունք դրսեւորելով խորհրդարանական ընդդիմութեան նկատմամբ, նոր արտահերթ նիստում կազմակերպուած քուէարկութեամբ վաւերացրեց այն:
Ծանր ժամանակներ եւ մարտահրաւէրներ դիմագրաւող մեր հասարակութեան համար, երբ աւելի քան կենսական են հասարակական համերաշխութիւնը, քաղաքական հանդուրժողականութիւնը, պետական ինստիտուտների արժեւորումն ու անխափան գործունէութիւնը, խորհրդարանական քաղաքական մեծամասնութիւնը դիմում է պառլամենտարիզմի ոտնահարման, քաղաքական մանիպուլեատիւ (բազմակի«Գ.») վարքագծի` սեփական քաղաքական քմահաճութիւնները բարձր դասելով պետական ինստիտուտների բնականոն գործունէութեան եւ հանրային համերաշխութեան առաջնահերթութիւնից:
Այսպիսի քաղաքական վարքագծով, ժողովրդավարութեան կոպիտ ոտնահարմամբ, միանձնեայ կերպով եւ անսխալականութեան բարդոյթի պայմաններում էլ իրականացւում է համավարակի կանխարգելման «կառավարումը»:
Ճգնաժամային կառավարման համար պատասխանատու մարմինների ու նրանց լիազօրութիւնների յստակեցման, կշռադատուած ու ժամանակին կատարուած քայլերի, արդիւնաւէտ եւ օպերատիւ (առարկայական«Գ.») կառավարման փոխարէն, հետեւողական կերպով փորձեր են կատարւում քաղաքացիների եւ ԶԼՄ-ների նկատմամբ չպատճառաբանուած սահմանափակումներ եւ տոտալ (ընդհանուր«Գ.») վերահսկողութիւն սահմանելու ուղղութեամբ: Անտեսւում են առաջնահերթ միջոցառումներ, իսկ որոշ դէպքերում ձեռնարկւում են քայլեր, որոնք այնքան էլ համարժէք չեն համավարակի ընդգրկուածութիւնը նուազեցնելու, մարդկանց կեանքն ու առողջութիւնը պահպանելու, ինչպէս նաեւ հետագայ տնտեսական, ֆինանսական եւ սոցիալական ցնցումները մեղմելու, երկրի անվտանգութիւնը երաշխաւորելու պետութեան պարտաւորութիւնների հետ:
ՀՅԴ Հայաստանի Գերագոյն մարմինը դատապարտում է իշխանութիւնների այս կեցուածքն ու վարքագիծը` մէկ անգամ եւս արձանագրելով, որ միայն միասնական ջանքերով եւ հանրային համերաշխութեամբ է հնարաւոր յաղթահարել այս աննախադէպ մարտահրաւէրը:
ՀՅԴ Հայաստանի Գերագոյն Մարմին
01.04.2020 թ.»: