ՀՀ Արտաքին գործոց նախարար Զոհրապ Մնացականեան լրագրողները շնորհաւորած է մամուլի օրուան առիթով:
«Շնորհաւորում եմ մամուլի ազատութեան համաշխարհային օրուան կապակցութեամբ բոլոր մամուլի ներկայացուցիչներին եւ նրանց հսկայական լսարանին:
Մամուլի ազատութեան համաշխարհային օրուայ խորհուրդն առաւել ընդգծուած է այսօր, երբ ողջ միջազգային հանրութիւնն առերեսւում է նոր տիպի պսակաձեւ ժահրի հետեւանքով առաջացած ընդհանուր մարտահրաւէրներին: Այդ մարտահրաւէրների յաղթահարումը ենթադրում է քաղաքացիական համերաշխութիւն, որի ձեւաւորման կարեւորագոյն գրաւականն է վստահելի ու փաստերի վրայ հիմնուած տեղեկատուութեան հասանելիութիւնը:
Ազատ եւ անկախ մամուլը ժողովրդավարական հասարակութիւնների կենսունակութեան եւ ժողովրդավարական վերափոխման շարժիչ ուժն է: Մամուլի եւ խօսքի ազատութիւնը Հայաստանի կարեւորագոյն նուաճումներից է, որին Հայաստանի հասարակութիւնը հասել է ազատութեան արժէքներին իր ձգտմամբ, իր ժողովրդավարական ընտրութեամբ եւ այդ ընտրութիւնը պաշտպանելու ունակութեամբ:
Հայաստանը մեծապէս կարեւորում է խօսքի ազատութիւնը եւ լրատուամիջոցների անխափան գործունէութեան երաշխաւորումը, տեղեկատուութեան հասանելիութիւնը, առաւել եւս հակամարտութեան գօտիներում: Ազատ խօսքը եւ ազատ արտայայտուելու իրաւունքը մեծ ներդրում կարող են ունենալ ժողովուրդներին խաղաղութեան պատրաստելու գործում», ըսուած է ուղերձին մէջ: