Իւրաքանչիւր մարդ կ’ունենայ նախասիրութիւններ, որոնք իր հետ կը ծնին եւ օրերու ընթացքին կրնան զարգանալ եւ կամ փոխուիլ՝ ըստ պայմաններուն:
Քեսապի բնութեան հանդէպ մանկութենէս յատուկ սէր ունիմ: Ինչպէ՞ս չսիրես մեր գիւղի բնութիւնը։ Քիչ մը ամէն կողմ մրգատու պարտէզներ, դեղաբոյսերով հարուստ մշտադալար պուրակներ, անտառներ:Յատկապէս մեծ է սէրս անոր կենդանական աշխարհին հանդէպ:
Ամէնէն աւելին զիս հրապուրած են թռչունները՝ իրենց բազմաձայն գեղգեղանքներով եւ խատուտիկ տեսքով:
Դեռ մանուկ, հայրս կը նկատէ, որ շատ կը սիրեմ թռչունները: Եւ օր մըն ալ իր անակնկալը ինծի …. երկու թռչուն վանդակի մէջ: Ուրախութիւնս չափ ու սահման չունէր:
Այսպէս,զանազան տեսակի թռչուններ պահած եմ մինչեւ այն օրը, երբ Քեսապ ներխուժեցին դաժան ահաբեկիչները, որոնք այրեցին,թալանեցին քանդեցին շատ բան: Անոնք չէին խնայած նաեւ թռչուններուս…:
Սէրը մէջս էր: Քեսապ վերադարձին նոր գաղափար մը ծագեցաւ մտքիս մէջ: Որոշեցի այդ ծրագիրը իրագործել մեր տան բակի մէկ անկիւնը օգտագործելով: Ուստի հօրս օգնութեամբ հաւնոց շինեցի, եւ ես սկսայ տարբեր տեսակի հաւեր բուծանել: Ամիսներու ընթացքին, երբոր որոշ փորձառութիւն ձեռք ձգած էի, ծրագիրս ընդլայնեցի եւ յաջողեցայ: հետզհետէ անոնց թիւը բազմացաւ: Հիմա ունիմ տեսակաւոր եւ բազմաթիւ թռչնազգիներ (անոնց շարքին՝ թութակներ), որոնց բաւական ժամանակ կը տրամադրեմ, մեծ ուրախութեամբ մանաւանդ այս դժուար պայմաններուն մէջ, երբ պարտադրուած ենք տան մէջ բանտարակուելու: Կը հոգամ անոնց սնունդն ու մաքրութիւնը:
Անկեղծօրէն՝ թէ՛ հոգեկան գոհունակութիւն եւ թէ մտային անդորրութիւն կը ստանամ այս հաճելի գործէն: Անոնցմէ դրական ներուժ կը ստանամ եւ աւելի լաւ կը կեդրոնանամ դասերուս վրայ:
Ես արդէն հասած եմ այն եզրակացութեան,որ մարդկութեան գոյութիւնը խիստ կերպով կապուած է բնութեան հաւասարակշռութեան հետ: Անոր համար ալ կ’ուզեմ խորհուրդ տալ իմ համագիւղացիներուն եւ շրջանի ժողովուրդին, որ վերջ տան ապօրինի որսին եւ ծառահատումին:
Նշան Պետրճիքեան
ԺԱ. կարգ
Քեսապի Ազգ. Ուսումնասիրաց Միացեալ Ճեմարան