Քառասուն օր առաջ, այս անցողիկ աշխարհէն առյաւէտ մեկնեցաւ բարիութեան ու համեստութեան մարմնացում համարուող, ընկերասէր, ծառայասէր, նուիրեալ միութենական, ընկեր Աբրահամ Զուպրիկեանը:
Աբիկին վաղաժամ ու անսպասելի մահը խոր սուգի մատնեց իր հարազատները, միութենական ու գաղափարի ընկերները եւ առհասարակ բոլոր զինք ճանչցողները:
Որքան ալ հաշտուինք մահուան գաղափարին, անոր անխուսափելիութեան հետ, այսուհանդերձ, սիրելիի մը բացակայութիւնը կը խռովէ մեր ամբողջ էութիւնը, կը կոտրէ մեր հոգին անդարմանելիօրէն…: Աբիկին կորուստը այս հոգեվիճակը ստեղծեց մեր մէջ:
Աբիկ փոքր տարիքէն եղած է միութենական եւ ժամանակի հոլովոյթին հետ պատասխանատու պաշտօններ ստանձնած է Կիլիկեան Շրջանակի բաղկացուցիչ մարմիններուն մէջ: Վերջին տարիներուն,Կիլիկեան Կրթ. Հաստատութեան արտօնատէրի ներկայացուցիչն էր յաջս Սուրիոյ կրթական նախարարութեան, պաշտօն մը, որ վարեց ձեռնհասօրէն մինչեւ իր մահը:
Ազգային Մշկթ. Միութեան հետ իր կապուածութիւնը ժառանգած էր հօրմէն՝ հանգուցեալ Յովսէփ Զուպրիկեանէն, որ միութեանս գաղափարախօսութեան անշեղ հաւատաւորներէն մին եղած էր անցեալին:
Աբիկ Զուպրիկեան երկար տարիներ եղած է միութեանս վարչութեան անդամ եւ մեծ ներդրում բերած է կազմակերպչական աշխատանքին: Անսահման խանդավառութեամբ ու հոգածութեամբ ի գործ դրած է ճատրակի դասընթացքները ակումբին մէջ: Այսօր, իր ձեռնասունները մեծ երախտագիտութեամբ պիտի յիշեն իրենց ուսուցիչին վաստակն ու զոհողութիւնը:
Աբիկին գլխաւոր յատկանիշները համեստութիւնն ու բարիութիւնն էին: Ան կը գործէր լուռ ու մունջ, հեռու պոռոտախօսութենէ եւ ինքնացուցադրական հիւանդագին ախտէ. երեւոյթ մը, որմէ կը տառապին շատ-շատեր…: Նախանձախնդիր էր հաւաքականութեան պատկան գանձին, եւ աններող՝ յումպէտս գործածողներուն նկատմամբ: Մարդկային էր իր յարաբերութեան մէջ, կ’ատէր սուտն ու կեղծիքը, դաւադրական ստոր արարքները: Ահա այսպիսի մաքրամաքուր ընկեր մը մենք կորսնցուցինք դժբախտաբար…
Սիրելի՛ Աբիկ, մենք կ’ապրինք ֆիզիքական բացակայութեանդ մորմոքը, բայց բարի ու պայծառ յիշատակդ միշտ վառ պիտի մնայ մեր յիշողութեան մէջ:
Հոգիդ թող թեւածէ երկնային լոյսերու մէջ:
Ազգային Մշկթ. Միութեան վարչութեան անունով խորին ցաւակցութիւն կը յայտնենք հանգուցեալին քրոջը՝ Մայտային, եղբօրը՝ ընկեր Նշանին, զաւակներուն եւ բոլոր մերձաւորներուն:
Ազգային Մշկթ. Միութիւն