Արցախի Արտաքին Գործոց Նախարարութիւնը յայտնած է.
«Կարեւորում ենք Ռուսաստանի Դաշնութեան միջնորդութեամբ 10 Հոկտեմբեր 2020 -ին ժամը 12:00-ից մարդասիրական նպատակներով հրադադարի վերաբերեալ ձեռք բերուած պայմանաւորուածութիւնը` Կարմիր խաչի միջազգային կոմիտէի միջնորդութեամբ եւ վերջինիս չափանիշների համաձայն ռազմագերիների եւ զոհուածների մարմինների փոխանակման համար:
Մոսկուայում ձեռք բերուած պայմանաւորուածութիւնը գործնական քայլ է` Ատրպէյճանի եւ Թուրքիայի կողմից` միջազգային ահաբեկիչների հետ դաշինքով, Արցախի Հանրապետութեան դէմ զինուած յարձակողապաշտութիւնը դադարեցնելու ճանապարհին: Մարդասիրական հրադադարը պէտք է Ատրպէյճանի կողմից անշեղօրէն պահպանուի եւ ամուր հիմք դնի 12 Մայիս 1994-ի կրակի եւ ռազմական գործողութիւնների դադարեցման եւ 6 Փետրուար 1995-ի հրադադարի կարգի ամրապնդման վերաբերեալ համաձայնագրերի գործողութիւնը լիակատար վերականգնելու համար:
Կարեւոր ենք համարում, որ Մոսկուայում կայացած բանակցութիւնների արդիւնքներով համատեղ յայտարարութեան մէջ նշւում է ԵԱՀԿ Մինսքի խմբի համանախագահութեան ինստիտուտի բացառիկ դերը ատրպէյճանա-ղարաբաղեան հակամարտութեան կարգաւորման համար միջնորդական գործունէութեան իրականացման մէջ:
Վերստին ընդգծում ենք, որ Ատրպէճանի կողմից չորս տարիների ընթացքում սանձազերծուած երկու ագրեսիանները համոզիչ կերպով ցոյց են տալիս ռազմական գործողութիւնների վերսկսման հնարաւորութիւնը բացառող մեխանիզմի ներդրման յոյժ անհրաժեշտութիւնը:
Վերահաստատում ենք պաշտօնական Ստեփանակերտի դիրքորոշումը, որ միայն Արցախի Հանրապետութեան անկախութեան միջազգային ճանաչումը կ’երաշխաւորի տարածաշրջանում խաղաղութիւն եւ անվտանգութիւն եւ ցոյց կը տայ միջազգային հանրութեան համար ուժի կիրառման անընդունելիութիւնը ` որպէս հակամարտութեան լուծման միջոց»:
