Ուրբաթ, 4 Դեկտեմբեր 2020-ին , Սուրիոյ կրթութեան նախարար դոկտ․ Տարեմ Թապպաա, , ընկերակցութեամբ երեսփոխան դոկտ․ Նորա Արիսեանի, այցելեց Դամասկոսի Ազգ. Միացեալ Ճեմարան, ուր ջերմօրէն ընդունուեցաւ իրաւատիրոջ ներկայացուցիչ տիար Պօղոս Խաճարեանի, տնօրէնուհի օրդ. Ծովակ Պաղպուտարեանի, Հոգաբարձութեան անդամներու և ուսուցչական կազմին կողմէ:
Նախարարը շրջեցաւ ճեմարանի բաժինները, մուտք գործեց դասարանները, զրուցեց աշակերտներուն և ուսուցչական կազմին հետ եւ ծանօթացաւ կրթական ընթացքին և խնդիրներուն:
Նախարարը բացումը կատարեց Ճեմարանի Երկրորդական բաժինին, որուն արտօնութիւնը իր օրով տրուեցաւ :
Տեսչարանին մէջ տեղի ունեցաւ զրոյց, ուր քննարկուեցան կրթական զանազան հարցեր, նաև իրաւատիրոջ ներկայացուցիչ տիար Պօղոս Խաճարեան փոխանցեց Բերիոյ Հայոց Թեմի Առաջնորդ Գերշ. Տ. Մասիս Եպս. Զօպուեանի ողջոյնները, շնորհակալութիւն յայտնելով նախարարութեան հետևողականութեան և համագործակցութեան համար, ինչպէս նաեւ երախտագիտութիւն յայտնեց Սուրիոյ նախագահ տոքթ. Պաշշար ալ Ասատին և Առաջին Տիկին Ասմա ալ Ասատին Ազգ. Միացեալ Ճեմարանի վերաշինութեան իրենց զօրակցութեան համար:
Ապա նախարար Թապաա հիւրերու ոսկեմատեանին մէջ արձանագրեց խօսք մը, ուր գնահատեց ճեմարանի կրթական աշխատանքը՝ դրուատելով նման ճեմարանի մը գոյութիւնը Դամասկոսի արուարձանին մէջ:
