՛՛Հայրենիքի Փրկութեան Կոմիտէ՛՛ն հրապարակած է հետեւեալ յայտարարութիւնը․
«Նիկոլ Փաշինեանը եւ նրա վարչախումբը, ըստ էութեան, երկիրը տարան կապիտուլեացիայի` համայն հայ ժողովրդին կանգնեցնելով լրջագոյն կորուստների առջեւ, փոշիացնելով տասնեակ տարիների` մեր համազգային ձեռքբերումները, տեւական ժամանակով խոցելի դարձնելով ազգային անվտանգութիւնը: Կատարուածն ազգային աղէտ է եւ դաւաճանութիւն, որի քաղաքական ու իրաւական ամբողջական գնահատականը կտրուի առաջիկայում:
Ն. Փաշինեանի եւ նրա վարչախմբի գործունէութեան իւրաքանչիւր ժամը մեր պետականութիւնը հիւծող եւ ՀՀ քաղաքացիների անվտանգութեանն ուղղուած սպառնալիք է:
Ակնյայտ է, որ բոլոր ոլորտներում ձախողուած վարչախումբն անկարող է դիմագրաւել աշխարհաքաղաքական մարտահրաւէրները, յաղթահարել երկրում օրաւուր խորացող քաղաքական, սոցիալական, տնտեսական եւ հոգեբարոյական ճգնաժամը:
Նոր որակի իշխանութեան ձեւաւորումը հրամայական է:
Ելնելով ստեղծուած իրավիճակից, հաշուի առնելով հանրութեան լայն շրջանակների պահանջը, 17 կուսակցութիւնների խորհուրդը որոշել է ընդլայնել իր ձեւաչափը` ձեւաւորելով Հայրենիքի փրկութեան շարժում:
Շարժումը համահայկական է եւ վերկուսակցական: Շարժման խորհուրդը ներառում է կուսակցութիւնների, մտաւորականութեան եւ հասարակութեան լայն շրջանակների ներկայացուցիչների:
Հայրենիքի փրկութեան շարժման խորհուրդը յայտարարում է.
1․Շարժման նպատակն է սահմանադրական ճանապարհով օր առաջ ազատուել Հայաստանի աղէտաբեր վարչակազմից` ստեղծելով անցումային, հակաճգնաժամային կառավարութիւն, որը կը կանխի Հայաստանի պետականութեան կորուստը, կ’իրականացնի երկրի յետպատերազմեան առողջացումը, կ’աշխատի ազգային-պետական շահերի վրայ հիմնուած ներքին եւ արտաքին քաղաքականութեան, քաղաքացիների անվտանգութեան երաշխաւորման բարձրացման ուղղութեամբ եւ կը կազմակերպի արտահերթ խորհրդարանական ընտրութիւններ:
2․Որպէս անցումային կառավարութեան ղեկավար` Հայաստանի Հանրապետութեան վարչապետ, Խորհուրդն առաջադրում է Վազգէն Մանուկեանի թեկնածութիւնը, որն ունի հակաճգնաժամային կառավարման փորձ, արդիւնաւէտ բանակցութիւններ վարելու կարողութիւն, ներքին համերաշխութիւն եւ համազգային համախմբուածութիւն ապահովելու կամք ու վճռականութիւն:
3. Վազգէն Մանուկեանը վարչապետ դառնալուն պէս կասեցնելու է իր կուսակցական գործունէութիւնը, պարտաւորւում է առաջիկայ խորհրդարանական ընտրութիւններին անձամբ չմասնակցել եւ չհաւակնել վարչապետի պաշտօնին: Միաժամանակ, նա ստանձնում է պարտականութիւն` մէկ տարի յետոյ կազմակերպել արտահերթ խորհրդարանական ընտրութիւններ` Ըօ-ին համապատասխան հաւասար պայմաններ երաշխաւորելով քաղաքական բոլոր ուժերի համար:
4. Վարչապետի միասնական թեկնածուն` 5 Դեկտեմբեր 2020-ին, ժամը 1500-ին, Ազատութեան հրապարակում հրաւիրուած համազգային մեծ հանրահաւաքին կը ներկայացնի նոր կառավարութեան առաջնահերթ գործողութիւնները եւ հակաճգնաժամային քայլերը:
Սիրելի՛ հայրենակիցներ, Հայրենիքի փրկութեան շարժմանը իւրաքանչիւրիդ մասնակցութիւնն անհրաժեշտութիւն է:
Հայրենիքի փրկութեան շարժման խորհուրդ
03.12.2020թ.»
