Հայրնիքի Փրկութեան Շարժումը 23 Փետրուարին յայտարարութիւն տարածեց.
«Այսօր հայրենադաւ իշխանութեան գլխաւոր խորհրդանիշի այցը կառավարական 3-րդ մասնաշէնք ուղեկցուեց բազմաթիւ արժանապատիւ քաղաքացիների հանդէպ ակնյայտ անհամաչափ ուժի գործադրմամբ:
Յատուկ դիտաւորութեամբ բռնութեան ենթարկուեց նաեւ Հայրենիքի փրկութեան շարժման համակարգող Իշխան Սաղաթէլեանը: Տասնեակ քաղաքացիներ հաշուեյարդարի ենթարկուեցին ոստիկանական բաժանմունքներ տեղափոխուելիս:
Հայրենիքին դաւաճանածի, թուրքի առաջ ծնկի եկածի վերջին յոյսը նրա հլու կամակատար, ոստիկանի կոչումն ու համազգեստն արատաւորող, օրէնքն ու Սահմանադրութիւնը ոտնատակ տուած մի խումբ յանցագործների վրայ է:
Տապալելով սահմանադրական կարգը, ոտնահարելով մարդու իրաւունքների պաշտպանութեան ոլորտում միջազգային պարտաւորութիւններն ու հեղինակազրկելով Հայաստանի Հանրապետութիւնը` ոստիկանապետութեան ձգտող գլխաւոր յանցագործը խուճապի մէջ է:
Բոլոր յանցագործներն անխուսափելիօրէն պատժուելու են:
Առնուազն տարակուսելի է իրաւական եւ ժողովրդավարական պետութեան բնութագիրն աղաւաղող, մարդու հիմնական իրաւունքների ոտնահարման աղաղակող փաստերի վերաբերեալ միջազգային կազմակերպութիւնների լռութիւնը, այն դէպքում, երբ դրանց պարտաւորութիւնն է հետեւել եւ գնահատել իշխանութիւնների վարքագիծը:
Սիրելի՛ հայրենակիցներ, իշխանութիւնը պատկանում է ժողովրդին: Տէ՛ր կանգնենք մեր իրաւունքներին, անհատական եւ հաւաքական գործողութիւններով հեռացնենք պետականութեան այս սպառնալիքին եւ հաստատենք ազգային իշխանութիւն:
Կոչ ենք ուղղում Զինուած ուժերի, Ազգային անվտանգութեան ծառայութեան, ոստիկանութեան, դատախազութեան, Յատուկ քննչական ծառայութեան եւ այլ պետական կառոյցներում աշխատող հայրենասէր եւ օրինապաշտ քաղաքացիներին` տէ՛ր կանգնէք հայ ժողովրդին տուած ձեր երդմանը, պաշտպանէ՛ք հայրենիքը յանցագործ իշխանութիւններից, հրաժարուէ՛ք նրանց ապօրինի ցուցումների կատարումից, կանխէ՛ք պետական ահաբեկչութիւնը:
ՀԱՅՐԵՆԻՔԻ ՓՐԿՈՒԹԵԱՆ ՇԱՐԺՄԱՆ Խորհուրդ
23.02.2021թ.»