ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Սուրիոյ հաւաքականի հայազգի խաղացող Մարտիկ Մարտիկեան, նոր պայմանագրութիւն պիտի ստորագրէ Յորդանանի Ֆէյսալի խումբին միանալու համար: Ըստ մարզական լրատուական կայքէջերու, Մարտիկեան համաձայնաբար Հթթին ակումբի վարչութեան հետ, չեղեալ նկատած է իրենց միջեւ եղած պայմանագրութիւնը, եւ ստացած է Ֆէյսալին միանալու իրաւունքը:
– ՀՄԸՄ-ի ճատրակի խումբէն կրտսեր մարզիկ՝ Արսէն Գինեան, Շաբաթ, 20 Մարտ 2021-ին, երկարաշունչ խաղէ մը ետք Սուրիոյ (10) տարեկաններու խմբաւորման յաջողեցաւ տիրանալ Սուրիոյ Ախոյեանութեան:
– Սուրիոյ ֆութպոլի հաւաքականը ժամանեց Մանամէ, բարեկամական երկու հանդիպումներ կատարելու համար Պահրէյնի եւ Իրանի հաւաքականներուն հետ:
– Սուրիոյ պասքեթի աղջկանց Ա- դասակարգի ախոյեանութեան մըրցումներուն, ՀԵԸ-ի աղջկանց խումբը 70-52 արդիւնքով պարտւթեան մատնուեցաւ Ճալաա-էն:
ՄԻՋԱԶԳԱՅԻՆ
ԶԻՏԱՆ ԹԵԿՆԱԾՈՒ Է ՖՐԱՆՍԱՅԻ
ՀԱՒԱՔԱԿԱՆԻ ՄԱՐԶԻՉԻ ՊԱՇՏՕՆԻՆ
Ֆրանսայի հաւաքականի գլխաւոր մարզիչ Տիշամբ երաշխաւորեց Զիտանը ստանձնելու համար մարզիչի պաշտօնը: Ան ըսաւ. «2022-ի Եւրոպայի ախոյեանական մրցումներէն ետք կ’աւարտի իմ ժամանակաշըրջանը, եւ կը կարծեմ թէ Զիտան զիս յաջորդող լաւագոյն թեկնածուն է»: Ֆրանսական Ֆութ Միրքաթօ թերթին հետ զրոյցին Տիշամբ նաեւ անդրադարձաւ Զիտանի արձանագրած նուաճումներուն որպէս հաւաքականի խաղացող, ապա մարզիչ, յայտնելով որ ան ներկայիս ֆրանսացի լաւագոյն մարզիչներէն մէկն է:
Յիշենք որ Տիշամբ 2018-ին Ֆրանսայի հաւաքականին հետ տիրացաւ աշխարհի ախոյեանութեան:
ՎԱՍՔԷՍ ՊԱՀԱՆՋՈՒԱԾ Է
ԱՆԳԼԻԱԿԱՆ ԱԿՈՒՄԲՆԵՐԷ
Սպանիոյ մայրաքաղաքի Ռէալ Մատրիտի խաղացող Լուքաս Վասքէսը, ակումբի պատասխանատուներուն տեղեկացուց թէ ան կը փափաքի լքել կազմը եւ միանալ այլ խումբի: Վասքէսի այս յայտարարութիւնէն ետք, անգլիական երկու ակումբներ՝ Արսենալն ու Թոթենհամը առաջարկեցին անոր միանալու իրենց խումբին: Ըստ անգլիական «Միրըր» թերթին, 29 տարեկան խաղացողին պայմանագիրը կ’աւարտի այս տարեշրջանի վերջաւորութեան, եւ անոր փոխանցման արարողութիւնը կ’ընթանայ ազատ կարգավիճակով: Աւելցնենք որ սպանական ակումբը երեք տարուայ նոր պայմանագիր առաջարկած էր Վասքէսին, բայց ան մերժած է Մատրիտեան առաջարկը:
ՉԵՄՓԻԸՆԶ ԼԻԿԻ ՎԻՃԱԿԱՀԱՆՈՒՄԻՆ ԱՐԴԻՒՆՔՈՎ
ՈՒԺԵՂ ՀԱՆԴԻՊՈՒՄՆԵՐ ՏԵՂԻ ՊԻՏԻ ՈՒՆԵՆԱՆ
Եւրոպայի ֆութպոլի դաշնութեան ՈՒԵՖԱ-ի նստավայր Նիոնի մէջ կայացաւ Չեմփիընզ լիկի քառորդ եզրափակիչ եւ կիսաեզրափակիչ հանգրուաններու վիճակահանութիւնը: Գործող գաւաթակիր Պայերն Միւնեխ նախ մրցակից պիտի ունենայ Փարիզ Սան Ժերմանը, որուն եթէ յաղթէ մրցակից պիտի ունենայ Ռէալ Մատրիտ Լիվըրփուլ հանդիպումի յաղթողին: Անգլիական Մանչեսթըր Սիթին 1/4 եզրափակիչին պիտի մրցի Պորիսիա Տորթմունտին հետ, իսկ Լոնտոնի Չելսին՝ Փորթուկալեան Փորթոյին հետ: Այս զոյգերու յաղթողները պիտի հանդիպին կիսաեզրափակիչին: Քառորդ եզրափակիչ հանդիպումի մրցումները տեղի պիտի ունենան Ապրիլ 6-7-ին եւ Ապրիլ 13-14-ին: Կիսաեզրափակիչ խաղերը նախատեսուած են Ապրիլ 27-28-ին եւ Մայիս 4-5-ին։ Աւարտական մրցումը տեղի պիտի ունենայ 29 Մայիսին: