Ամերիկայի Հայ Դատի Յանձնախումբը յայտնած է, որ
ԱՄՆ Քոնկրէսի Ներկայացուցիչներու Պալատի հայկական յանձնախումբը ատորագրահաւաք մը սկսած է` որով քոնկրէսականները նախագահ Պայտընին կոչ ուղղած են միանալու Քոնկրէսին Հայոց Ցեղասպանութիւնը յստակ եւ ուղղակիօրէն ճանչնալու:
Քոնկրէսականներ Ատամ Շիֆ, Կուս Պիլիրաքիս, Ֆրենք Փալօնէ կրտսերը, քոնկրէսական Տեյուիտ Գ. Վալադաոն եւ Ճեքի Շպյերի ստորագրութիւններով ուղարկուած նամակով մասնաւորապէս ըսուած է`
Յարգելի նախագահ Պայտըն,
Այս ամսուան վերջը `24 Ապրիլին, աշխարհը պիտի նշէ Հայոց Ցեղասպանութեան 106-րդ տարելիցը` 1915-1923 թուականներուն Օսմանեան կայսրութեան կողմէն 1.5 միլիոն հայերու սպանութիւնը եւ միլիոնաւորներու տեղահանութիւնը: Սակայն տասնամեակներ շարունակ, մինչ աշխարհի առաջնորդները ճանչցած են 20-րդ դարու առաջին ցեղասպանութիւնը, Միացեալ Նահանգներու նախագահը լռած է: Մենք կը միանանք հպարտ ամերիկահայ համայնքին եւ բոլոր անոնց, որոնք կը սատարեն ճշմարտութեան ու արդարութեան` խնդրելով Ձեզ 24 Ապրիլի յայտարարութեան մէջ յստակ եւ ուղղակիօրէն ճանչնալու Հայոց Ցեղասպանութիւնը:
Մենք գիտենք, որ հարց մըն է, որուն դուք քաջածանօթ էք Ծերակոյտին մէջ գտնուելու ընթացքին եւ որպէս փոխնախագահ: Մէկ դար առաջ տեղի ունեցածին պատմական փաստը վիճարկումի ենթակայ չէ:
Պարոն Նախագահ, ինչպէս նախորդ տարի ըսիք 24 Ապրիլի ձեր յայտարարութեան մէջ. »Լռութիւնը յանցակցութիւն է»: Հայոց Ցեղասպանութեան պատմական փաստի առնչութեամբ Միացեալ Նահանգներու կառավարութեան ամօթալի լռութիւնը չափազանց երկար տեւած է, եւ ան պէտք է աւարտի: Մենք ձեզ կը յորդորենք հետեւելու ձեր ստանձնած պարտաւորութիւններուն եւ ըսելու ճշմարտութիւնը:
Յարգանքներով`
քոնկրէսական Ատամ Շիֆ
քոնկրէսական Կուս Պիլիրաքիս
Ֆրենք Փալոնէ կրտսեր
քոնկրէսական Տեյուիտ Գ. Վալադաո
քոնկրէսական Ճեքի Շպյեր
Յիշեցնենք, որ տակաւին անցեալ ամիս 38 ծերակուտական կոչով դիմած էր Պայտընին` ճանչնալու Հայոց Ցեղասպանութիւնը: