Եթէ պահ մը խորհինք մարդոց ներկան ու անցեալը կամրջող իրերուն մասին, պիտի նկատենք որ անոնց մէջ մեծ տեղ կը գրաւէ գրասեղանը: Կը մտաբերենք անոր տարբեր չափերն ու տեսակները, նոյնիսկ վիմաքարերը, որոնց վրայ փորագրելով նախնադարեան մարդը կրցած է ներկայ մեր հարցադրումներուն պատասխանող շատ մը գիտելիքներ փոխանցել: Գրասեղանի առկայութեամբ յաճախ նոր մտքեր կը ծնին: Այս մտքերը գրի կ’առնենք, ծրագիրի կը վերածենք թէ՛ մեր տան, եւ թէ գործատեղիներէն ներս գտնուող գրասեղաններուն ետին նստելով:
Քանիցս թէզեր կը պաշտպանուին կամ դատեր կ’արծարծուին փաստաբաններու գրասեղաններուն վրայ, ու անոնց հետեւանքով ոմանք իրենց իրաւունքներուն կը վերատիրանան, ուրիշներ խստիւ կը դատապարտուին:
Տարբեր երանգ ունին, սակայն, դպրոցական գրասեղանները, որոնց ետին նստելով միշտ ալ օգուտ կը քաղենք: Անոնց յենելով կ’ամբարենք հետաքրքրական գիտելիքներ, կը սորվինք գրել, կարդալ եւ կ’արձանագրենք քաղցր տպաւորութիւններ՝ մեր անհոգ մանկութենէն մինչեւ երիտասարդութեան առաջին փուլը:
Թէեւ նոյն կերպն ու որակը ունին համալսարանի գրասեղանները եւս, սակայն անոնք մեզ կը ստիպեն լրջութեամբ եւ պատասխանատուութեամբ մօտենալ ուսման եւ ըստայնմ նստիլ իրենց ետին՝ մասնագիտանալու, ուրուագծելու մեր ապագան եւ կերտելու մեր անհատականութիւնը:
Գրասեղանը միտք չէ, հոգի չէ:
Գրասեղանը օդ չէ, ջուր չէ:
Այլ այն սեղանն է, որուն յենելով մեր միտքը թռիչք կ’առնէ, կ’արտայայտէ գաղափարներ, որոնք ջուրի պէս կը ծորին սերունդէ-սերունդ, դարէ-դար:
Զգո՛յշ, սակայն… Եթէ այդ գաղափարները գործի չվերածուին ու լոկ սանդի մէջ ջուր ծեծելու ծառայեն, գրասեղանը կը կորսնցնէ իր իմաստն ու արժէքը:
Անի Մինասեան