(Գիրեճեան Նազարը՝ հօրս քեռին եւ իր շառաւիղները)
Հալէպի Նոր Գիւղի մթնոլորտը շատ իւրայատուկ տեղ կը գրաւէ իմ յիշատակներու շտեմարանին մէջ: Մէկ բաժինը մանկութեանս եւ պատանեկութեանս հետ կապուած ժամանակաշրջանին հետ աղերսուած է, երկրորդ բաժինը՝ հասունութեանս եւ ամուսնութեանս շրջանն է, քանի որ բնակարանս ալ Նոր Գիւղ էր:
Այդ մէկն ալ պէտք է ընդունինք, որ Հալէպի հայկական թաղամասերը, միապաղաղ տարածքներ չէին, ըլլա՛յ շինարարական իմաստով, ըլլա՛յ ընկերային-կենցաղային միակերպ դիմագիծ մը բաժնելու հասկացողութեամբ: Այդ շրջաններու իւրատիպ յատկութիւններու տարբերութիւնները վերածուած էին հոգեբարոյական շատ նուրբ զգայնութիւններու ու առթած, ձեւով մը, անհանդուրժողութեան մթնոլորտ «քաղաքացի»ի եւ Նոր Գիւղ աւանին մէջ ապրողներուն միջեւ: Այդ մէկուն ականատեսը եղած եմ իմ պատանեկութեան շրջանին, եւ քիչ մըն ալ աւելի ուշ: Բարեբախտաբար այդ հակադրութեան եւ իրարամերժ ոգիի ուժգնութիւնը նօսրացաւ, մանաւանդ վերջին 20 տարիներուն՝ գրեթէ չքացաւ: Վերացան մարդը իր ապրած շրջանին համաձայն ընդունելի նկատելու կամ արժեւորելու սին համոզումները:
Այս մասին պէտք է առիթով մը աւելի մանրամասն գրեմ եւ դըրուագներով ներկայացնեմ այդ օրերու տիրող մթնոլորտը: Այս պահուս, անդրադառնալով ընտանեկան պարագաներուս, որոնք Նոր Գիւղ հաստատուած էին, իմ մանկական եւ պատանեկան կեանքի կարգ մը պատկերներ նկարագրելով, պիտի փորձեմ ուրուագծել վերեւ յիշած որոշ վիճակները, որոնք թէեւ իրենց մակերեսային առաջին հայեացքով կրնան շատ բան չյուշել մտայնութեան տարբերութիւններու իմաստով, բայց իրենց թաքուն խորքով կը պարզեն վիճակներ, ուր յստակօրէն կ’երեւին գոյ զգայնութիւններ եւ տարբերութիւններ:
Այսպէս, ես քաղաքի «կակուղ թաթիկներու» վրայ հաշուըուած խումբի մը կը պատկանէի: Ընդհանրապէս արդ ու զարդս ալ այդ կը մատնէր: Միշտ մաքուր տարազով, սանտրուած, կօշիկներս փայլուն վիճակով դուրս կու գայի տունէն, անշուշտ՝ ծնողքիս ընկերակցութեամբ: Միակ միջավայրը, ուր ազատ էինք զբօսնելու՝ քաղաքի ՀՄԸՄ-ի պարտէզէն ներս էր, ուր զարմիկներուս հետ մարզական հանդիպումներու կը մասնակցէի:
Անհամբեր կը սպասէի Ուրբաթ օրերուն, որպէսզի ուղղուէի Նոր Գիւղ, ուր պիտի ճախրէի, թափ տալով պատանեկան տենչերուս, անկաշկանդ խաղերով եւ արկածախնդրական, հետախուզական նորութիւններով յագեցնելու պատանեկան անմեղ որոնումներս:
Բարեբախտաբար զիս «մարզողը-առաջնորդը» պատրաստ էր. Յարութը՝ հօրս զարմիկը, Նազար քեռիին տղան, որ հազիւ մէկ տարի մեծ էր ինձմէ, բայց «փողոցի փորձառութեամբ» աւելին կուտակած էր, եւ մեծ վիհ մը կար երկուքիս մէջ, իրական կեանքի հասկացութեան ու ընկերային յարաբերական փորձառութեան առումներով:
Առաջին անգամ ըլլալով, իրմէ սորվեցայ, որ խաղերու արդիւնքը արձանագրուած թիւերով չէր որոշուեր եւ խաղը չէր աւարտեր լաւագոյն կողմին յաղթանակով: Փողոցի օրէնքը իր յատուկ վճիռը ունէր, ուժեղ բազուկները ու թաղային հեղինակութիւնն էին, որոնք յաղթանակի նժարին կողմը կ’որոշէին, անշուշտ «զորպաճիութեամբ»: Աւելի ուշ, նաեւ հասկցայ, որ կեանքի տարերքն ալ այդ իմաստութեան կը հետեւի եւ միշտ արդարն ու իրաւացին չեն, որոնք կը յաղթանակեն կամ իրենց տեսակէտները ընդունելի հանգամանքով կը դիտուին հասարակութեան կողմէ:
Երբ ընտանեօք կը հասնէինք Նազար քեռիին տունը, որ միայարկանի քարաշէն շէնք մըն էր, ի տարբերութիւն Նոր Գիւղի այդ շրջանի տուներուն, որոնք մեծաւ մասամբ փոքր բակով մը օժտուած կ’ըլլային եւ աղիւսով պատուած տնակներ էին: Տան պատշգամը կը յարէր Նոր Գիւղի մզկիթի եռանկիւն պարտէզին: Հոն, հայ վարպետ մը կար, որ արտօնագիր ունէր պարտէզի ջրհորը օգտագործելու եւ զայն վաճառելու, մեծածաւալ տակառները լեցնելով ու մօտակայ գիւղական շրջաններու հողագործներուն կարիքները հոգալով: Մայթին յատակը, փոսի մը մէջ զետեղուած էր ջրհորին ելեկ-տրական շարժիչը, որ հսկայ երկաթեայ ծածկոյթով թաքցուած էր, հեռու հետաքրքիր աչքերէ:
Օր մը, երբ կը ծրագրէինք, թէ ինչպէ՛ս պիտի անցընենք մեր ժամանակը, Յարութը ընդհատելով մեր զրոյցը, նշմարելով հեռուէն մօտեցող գաճաճ մեծ կին մը, որ իրեն ծանօթ էր, ըսաւ. «Տղա՛ք, գրաւ կը դնէ՞ք, որ կրնամ ցատքել ղըսսա Մարոյին վրայէն»: Այս ըսելը ու արագ մը ցատքելը եւ նոյնինքն այդ ջրհորի երկաթէ կափարիչին վրայ հանգչիլը մէկ եղաւ, պայթուցիկ ահեղ ձայն մը որոտացնելով, որուն հետեւանքով ղըսսա Մարօն նուաղեցաւ: Անշուշտ Յարութը իր հնարամտութեամբ շալակը հովին տալով կորսուեցաւ մէջտեղէն, գիտնալով որ անհետեւանք պիտի չմնար իր «ականին» տրաքոցը:
Դէպի մզկիթ տանող ճամբուն վրայ կային կառք նորոգող հայ վարպետներ, որոնց վարպետութեան ականատեսը կ’ըլլայինք, քանի ջորեպանները իրենց անիւով կառքերը պարտէզի մայթին վրայ կը շարէին ու մենք հետաքրքրութեամբ կը հետեւէինք հայ վարպետներու տաղանդին: Անոնք ճարտարութեամբ կը նորոգէին փճացած մասերը, երբեմն ալ զեռոյէն նոր կարգ մը կը սարքէին: Արտաշը, Սարգիսը եւ Յակոբը իրենց կոտրտուած, երբեմն ալ թրքախառն արաբերէնով ճարտարութեամբ արաբ կառապանին ձեռքէն իրենց արդար վարձատրութիւնը կ’առնէին եւ ալլահ եըաուէտ ալէք ապու… ըսելով՝ կը ճամբէին կառապանը: Օր մը, մեր մանկական դաւադրական աշխատանքներուն մէկուն զոհը, ուստա Արտաշն էր: Այսպէս, իր աշխատած ժամուն, երբ ջորին ալ կապուած էր կառքին, Յարութը ձայնային պայթուցիկ (ֆէթթէշ) մը պիտի նետէր կառքին տակ: Այս դաւադրական գործին մտայղացումը եւ իրականացումը իրն էր ու իր վառ արկածախնդրական ախորժակներուն արգասիքը: Ամէն պատրաստութիւն տեսած էր, ուստի արագ մը գործի անցնելով վարեց պատրոյկը ու պայթուցիկը շպրտեց կառքին տակ: Դուք երեւակայեցէք, երբ ամառնային հանդարտ երեկոյի մը ընթացքին, մօտդ այդ անակնկալ պայթումը տեղի կ’ունենայ: Ուստային բեռնէն միայն «օրհնեալ» թրքերէն պոռչտուքը կը լսուէր: Ջորին կատղած կը փորձէր քարշ տալ կառքը, որուն անիւները վրան չէին ու տակաւին աւարտած չէր անոր նորոգութիւնը: Տեսնելով ուստա Արտաշին խենթացած վիճակը, ամէն մէկս ուղղութեամբ մը վազելով, դերասանական ամէն մեր շնորհքները ի գործ դնելով, անմեղ հրեշտակներու բաճկոնը հագնելով, օրօր-շորոր ման կու գայինք մօտակայ փողոցներուն մէջ: Բաւական ուշ, կրկին կը հաւաքուէինք թաղին ծայրը, երբ վարպետները արդէն գոցած կ’ըլլային աշխատանոցները ու թաղը՝ խաղաղած: Մինչ մենք, կը պատրաստուէինք այլ «քաջագործութեան» մը, նոր արարի մը ծրագրումին:
Այլ առիթներով, մեր մարզական «տաղանդը» զարգացնելու նպատակով, թաղին երկու ծայրամասերը քար շարելով, ֆութպոլի դաշտի կը վերածէինք փողոցը, նոյնիսկ պատահական ինքնաշարժները ստիպելով այլ ճամբու մը ընտրութիւնը ընելու: Վերջապէս, մէկը պէտք չէ խանգարեր մեր մարզումը: Ամառնային կիզիչ օրերուն, տաքը «գլխերնուս զարկած» կ’ըլլար ու մեր թիրախը փոխանակ շարուած քարերով կոլը ըլլալու, իբրեւ թէ սխալմամբ կը վրիպէր եւ գնդակները կը բախէին ինքնաշարժներու ներկարար՝ Կարօ եւ Հայկ Մխիթարեաններու խանութի թիթեղաշէն բեղկին: Ձմեռ չէր, որ որոտումի դղրդոցին մեղքը առնուէր: Կէսօրուան հանգիստի ժամերուն, երբ շուներն անգամ շուքին ներքեւ պատսպարուած կ’ըլլային, մենք մեր մարզական շնորհները կը զարգացնէինք: Այդ միջոցին, իպիշներէն մին, (իպիշը ծածկանուն էր), վերեւի իրենց տունէն գլուխը երկարելով, «մաքուր հայերէնով» լաւ մը իր օրհնեալ բերանը կը բանար:
Երեկոյեան խաղերու տեսակը այլ կ’ըլլար: Արդ, կամ հոլ պիտի խաղայինք, կամ «գնդակով եօթը քար» կը հարուածէինք: Այլ ձեւի խաղ մըն ալ, որ քիչ մը բազուկի ուժ, քիչ մըն ալ արագութիւն կը պահանջէր թոփ-տէյնէկն էր: Եկէ՛ք այս մէկը իր անունովը կանչենք եւ baseball ըսենք: Ինծի համար շատ ալ համակրելի ժամանց մը չէր ատիկա: Առաւելաբար կը սպասէի մթնշաղի ժամերուն, որովհետեւ այնպէս դասաւորուած էր «հրամանատարութեան» կողմէ, որ ուզուն էշշէկ-ը այդ ժամերուն խաղցուէր: Այդ Խաղի ընթացքին կը խուսափէի էշշէկ ըլլալէ, որովհետեւ ամէնէն մանրակազմն էի եւ եթէ մէկը վրաս ցատքէր, անպայման պիտի կքէի ու վնասուէի, Յարութին ընկերներուն մեծածաւալ ու կոշտ կազմուածքին պատճառով:
Իսկ գնդիկ խաղալը շատ անմեղ խաղ մըն էր մեր խումբին համար, բայց հողէ տարածք կը պահանջէր, որովհետեւ փոքր փոսերու կարիքը կար եւ յատուկ նեղ արահետներու, ուր գնդիկը պարտադիր այդ ուղղութեամբ պիտի սահէր, երբեմն դպչելով որոշ արգելակիչ գնդիկներու, երբեմն ալ շրջանցելով այլ տեսակի գնդիկներ: Այս խաղը վերապահած կ’ըլլայինք այն օրուան, ուր յատուկ արշաւ մը պիտի կազմակերպէինք դէպի մօտակայ հայաբնակ Զէյթուն Խանի կատարը, որ բացօթեայ լերկ բլուր մըն էր, որոշ յարմար խոռոչներով: Խանի լանջին նշանաւոր «պալատը» կար, որ բնակուած էր հայ ընչազուրկ ընտանիքներով: Անոնց փոքրերուն հետ երբեմն խաղընկեր կ’ըլլայինք:
Իսկ ամէնէն մանկունակ եւ անվնաս խաղը հինգ քարն էր կամ եօթը քարը: Ծալապատիկ նստած, որեւէ մէկ անկիւն, յարմար փոքր չափի խճաքարերով, անձայն կարելի էր ժամանակ անցընել եւ երկու անձի մրցակցութեամբ հաճելի մթնոլորտ ստեղծել: Մէկ անպատեհութիւն, որ արմուկդ եւ ձեռքիդ մակերեսը կուպրի գոյն պիտի ստանային, բայց կը մնար շատ անմեղունակ խաղի տեսակ, որ դարձեալ խմբակին կողմէ այդքա՜ն ալ գրաւիչ չէր:
Իսկ գիծ խաղալը կամ հոլահոբը նուաստացուցիչ խաղեր էին տղամարդոց համար, որովհետեւ ընդհանրացած մտայնութիւն էր, որ այդ մէկը վերապահուած էր միայն աղջիկներուն: Հետեւաբար այդ երկու խաղերը երբե՛ք Նոր Գիւղի տղոց ցուցակներուն մէջ չէին ներառնուէր:
Գիշերուան ուշ ժամերու նախասիրած խաղս, որուն մէջ կոշտութիւն եւ բրտութիւն կար, ջարխըտ պիւլպիւլն էր: Թերեւս սխալ ալ կը հնչեմ այս անունը, քանի չկրցայ յարմարցնել հայերէն համապատասխան թարգմանութիւնը այս խաղի անուանակոչումին (թերեւս ցնցուած սոխակ կարելի է ըսել): Խաղի կանոններուն մէջ կաշիէ գօտիով հարուածել կար, պատասխանելով հարցումի մը, եւ անոր լոյսին տակ փախչիլ եւ մութին մէջ ապաստանիլ անգտանելի տեղ մը: Է՜հ, ասոր խաղ կ’ըսէին եւ ո՛չ թէ հոլահոբին…:
Այս ամէնը կը յամենային ընդունելի «արկածախնդրութիւններու» կարգին:
(շար.1)
Ժան Հալլաճեան