103 տարի առաջ, համատարած յուսահատութեան մէջ յոյսի շող մը փայլատակեց: Հայ ժողովուրդը մինակ էր, նոր դուրս եկած Ցեղասպանութեան արհաւիրքէն, կորսնցուցած էր հայրենի հողեր, մէկուկէս միլիոն ազգի զաւակ: Թուրքն ու ազերին կը ջանային պոկել Հայաստանի հողէն ինչ որ կարելի էր, ջարդել, սպառնալ եւ հասնիլ մինչեւ Երեւան, այնպէս ինչպէս այսօր կը յոխորտան Ալիեւներն ու Էրտողանները:
Ծանրագոյն տագնապային իրավիճակէն դուրս եկած, ստեղծուեցան խորհրդարան, նախարարութիւններ, կրթական հիմնարկներ ու հաստատութիւններ եւ վերջապէս բանակ, եռագոյն դրօշ ու զինանշան:
Ազատատենչ ու հայրենանուէր իսկական ղեկավարներ, հերոսաբար ու նուիրեալ շունչով դարձան օրինակ ամբողջ հայ ժողովուրդին:
Ինչպէս ամէն տարի, անգամ Հալէպի պատերազմական տարիներուն Հալէպահայութիւնը փառաւոր շուքով յիշատակեց Հայաստանի անկախ պետականութեան կերտման 103-ամեակը՝ հոծ բազմութեան ներկայութեամբ: Կազմակերպութեամբ Սուրիոյ Երիտասարդական Միութեան Կեդրոնական Վարչութեան, 28 Մայիսի ժողովրդային տօնակատարութիւնը տեղի ունեցաւ Ազգային Քարէն Եփփէ Ճեմարանի շրջափակին մէջ 28 Մայիս 2021-ին:
Հանդիսութեան ներկայ էին հայ երեք համայնքապետները, ՀՀ Հալէպի գլխաւոր հիւպատոսն ու ՀՀ մարդասիրական խումբի ներկայացուցիչը, Սուրիոյ խորհրդարանի հայ երեսփոխանը, հայկական կազմակերպութիւններու, միութիւններու եւ ազգ. իշխանութեան ներկայացուցիչներ:
Մուտքին հրաւիրեալները դիմաւորեցին ՀՄԸՄ-ի փողերախումբն ու արի-արենոյշները:
Բացման խօսքերէն ետք, խումբ մը սեմականներէ բաղկացած երգչախումբը ժողովուրդին հրամցուց յեղափոխական շարք մը երգեր, գեղարուեստական ղեկավարութեամբ տիկ. Գայիանէ Սիմոնեան-Տէրեանի, դաշնամուրի ընկերակցութեամբ Կիթառ Աւընեանի:
Սեմականներու եւ համազգայնականներու կատարողութեամբ ազգային մեներգներու շարան մը եւ Ժագ Յակոբեանի «Յաղթերգութիւն» քերթուածը գեղարուեստական յայտագիրին հիմնական բաղադրիչներն էին: Օրուան բանախօս՝ Մարիա Մոմճեան-Աղպապեան, անկախութեան տարիներու պատմական ակնարկը տալով ներկայացուց այդ տարիներու Հայաստանի աշխարհաքաղաքական պայմաններն ու համեմատականներ ըրաւ ներկայ օրերուն հետ:
Անդրադառնալով Հայաստանի ներկայ իշխանութիւններու զիջողական քաղաքականութեան, ան շեշտեց, թէ որքան ալ մեծ ըլլան յարձակող ուժերը, յաղթելու վճռակամութիւնը եւ նպատակին հասնելու համար միասնական ուժերով պայքարելու ուղին անպայման յաղթանակի կ’առաջնորդեն ազգին ու հայրենիքին նուիրեալները:
«Ազատութեան եւ արժանավայել անկախութեան համար նահատակուած մեր հերոսներուն արիւնը, սփիւռքի թէ հայրենիքի մեր պայքարունակ ժողովուրդը թոյլ պիտի չտան որ տնտեսական շահերու խաբկանքով կուլ տան մեր հայրենիքը, իսկ ազգային պետութիւն կերտելու անկարող ղեկավարներ անդունդ գլորեն մեր դարաւոր արժէքներն ու թուրք ազերիին գերին դարձնեն մեր երկիրն ու ժողովուրդը: Միասնական ուժերով հարկ է ձախողութեան մատնել կրկին թշնամիին նկրտումները, այնպէս ինչպէս մատնուեցաւ 103 տարի առաջ, քաղաքակիրթ միջոցներով վար առնել երկրի շահերուն պաշտպան կանգնելու կարելիութիւն եւ կարողութիւն չունեցող իշխանութիւնները եւ անկախ ապրելու մեր ժողովուրդին արժանապատուութիւնն ու պայքարի ոգին պայծառ արեգակի նման շողացնել Հայաստանի երկնակամարին վրայ, տիրութիւն ընելով մեր ազգային, պետական եւ մարդկային բոլոր իրաւունքներուն», ըսաւ բանախօսը:
Ապա եզրափակելով ըսաւ. «Կը հաւատանք, որ նոր սերունդին խոստումը անխախտելի է՝ ականատես ըլլալով 27 Սեպտեմբերին մեր կամաւորական շարքերուն, որոնք ուղղուեցան ճակատ տէր կանգնելու Արցախի ու Հայաստանի պետականութեան: Կը հաւատանք նաեւ որ հայ ժողովուրդը ունի արիութիւնն ու իմաստութիւնը որոնելու եւ գտնելու Ազատ, Անկախ եւ Միացեալ Հայաստանին առաջնորդող դժուար, բայց յաղթահարելի ուղին»:
Այնուհետեւ Բերիոյ Հայոց Թեմի Առաջնորդ Գերշ. Տէր Մասիս Սրբ. Եպս. Զօպուեան ըսաւ, որ Հայաստանի անկախութեան յիշատակման այս օրը կը զուգադիպի յաղթանակած Սուրիոյ նախագահի ընտրութեան, յանձին՝ Պաշշար ալ Ասատի։ Նախագահ մը, որ տասը տարի շարունակ պատերազմին կուրծք տալէ, ամէն տեսակ ցաւ, տանջանք եւ հալածանք տեսնելէ ետք հպարտութեան էջ մը կ’արձանագրէ իր պայքարով եւ համբերանքով։ Սուրիոյ պատերազմէն յաղթանակած դուրս գալը կը պարտինք սուրիական բանակին, նախագահին, ժողովուրդին, մանաւանդ հալէպահայութեան։ «Պատի՛ւ ձեզ, հալէպահայե՛ր, որ դիմացաք ու այսօր հաւաքուած այս անգամ կը տօնէք Սուրիոյ յաղթանակը եւ Հայաստանի Հանրապետութեան կերտման 103-ամեակը։ Մեր ժողովուրդը վեց դարեր անհայրենիք մնալէ ետք, շնորհիւ մեր մարտունակ եւ տեսիլք ունեցող ղեկավարներուն, իր հերոսներու բազուկին ու արեան շնորհիւ եւ Դաշնակցութեան վերատիրացանք մեր անկախութեան», ըսաւ սրբազան հայրը։ Ապա Տէր Մասիս շեշտեց, որ ցնծալու իրաւունք ունինք, երբ համատարած, ամէն տեղ, Սփիւռքի ողջ տարածքին կը տեսնենք մայիսեան խորհուրդով ապրող երիտասարդութիւն, որ իր կեանքին մէջ կենդանի կը պահէ այդ խորհուրդը եւ բռնութեան դէմ պայքարելու կամեցողութիւնը։ Եզրափակելով ըսաւ, որ այս հաւատքն ու այս տեսիլքը գործի վերածելով կրնանք յաղթահարել մեր հայրենիքին ու ազգին սպառնացող վտանգները։
Մարմանդ Աշոտեան