Շարունակելով օտարագիր հայ գրողներու աշխատութիւնս կ’անդրադառնամ ֆրանսագիր Վահէ Քաչային (Վահէ Խաչատուրեան):
Ծնած է 1 Ապրիլ 1928-ին, Դամասկոս: Նախնական ուսումը ստացած է Պէյրութի մէջ։ 1945-ին մեկնած է Փարիզ, ուր երեք տարի հետեւած է բեմադրական դասընթացքներու։ Եղած է «Սուար Տը ՊԷյրութ» («Soir de Beyrouth») թերթի թղթակիցը Փարիզի մէջ։ 1953-ին լոյս տեսած է իր առաջին վէպը՝ «Կիրակի Օրուանից Մնացած Ծխուկներ»։
Հեղինակին մեծ յաջողութիւն բերած է «Ակն Ընդ Ական» վէպը (1955), որ հայերէն հրատարակուած է 1956 թուականին, իսկ 1957-ին արժանացած է Ռիւարոլի մրցանակին: Հետագայ տարիներուն Քաչա հրատարակած է շարք մը վէպեր ու վիպակներ, որոնց պատճառով ծանօթ դարձած է՝ «Կարթ» (1957), «Սեղմուած Բռունցքներ» (1958), «Արարչի Ութերորդ Օրը» (1960), «Գիշատիչների Խնճոյքը» (1960):
Քաչան իր գրական գործունէութեան զուգահեռ համագործակցած է ֆրանսական շարժապատկերի նշանաւոր դէմքերու հետ, միեւնոյն ժամանակ շարունակած է նաեւ լրագրութիւնը։ 1962-ին «Խղճահարութիւն չկայ կոյրերի հանդէպ», «Քաղցկեղաւորները» տեղեկագրութիւններուն համար ստացած է մամուլի Պելման մրցանակ։
Քաչայի ստեղծագործութիւններէն են՝ «Գաւազան» (1963), «Կապիկների Նաւը» (1966), «Հրեայի Մահը»,( 1968), «Մի Մարդ Ընկաւ Փողոցում» (1975), «Աշխարհ» (1977), «Աղմուկ, Որ Լսւում Էր» (1979):
Քաչայի գլուխգործոցը կը համարուի «Մի Դաշոյն Այս Պարտէզի Մէջ» (1981) վէպը, որ բարձր ոգիով գրուած ստեղծագործութիւն մըն է։ Կը ներկայացնէ Արեւմտեան Հայաստանի իրականութիւնը, պոլսահայութեան կեանքը՝ համիտեան արհաւիրքներէն մինչեւ Մեծ Եղեռն։
Վահէ Քաչայի վէպերուն ու վիպակներուն մէջ կը տիրէ իրականութեան արատներու քննադատութիւնը եւ պատերազմի դատապարտումը, նկատելի է նաեւ գոյապաշտութեան (existentialism) ազդեցութիւնը։
«Գիշատիչների Խնճոյքը» Վահէ Քաչայի լաւագոյն վիպակներէն է, ուր հեղինակը կը քննարկէ թէ ինչպիսի՞ պայմաններու տակ տեղի կ’ունենայ մարդ-գիշատիչ փոխակերպումը: Պատմութեան իրադարձութիւնները տեղի կ’ունենան 1942 թուականին, գերման զօրքէ գրաւեալ Փարիզի մէջ։ Քաչան նախ իր հերոսները «սահմանային իրավիճակի» մէջ կը դնէ, ապա աստիճանաբար կը հանէ անոնց դիմակները։ Պրիժիտ Մանսէի տարեդարձի օրն է, խնճոյքի սեղանին շուրջ հաւաքուած են բարեկամները, որոնք ջերմ խօսքեր կ’ուղղեն իրար հասցէին: Յանկարծ գերմանացի սպայ մը ներս կը մտնէ եւ երկու պատանդ կը պահանջէ՝ անոնց որոշակի ժամանակ յատկացնելով, որպէսզի խնճոյքի մասնակիցները իրենք իրենց մէջ ընտրեն պատանդը… Եւ այսպիսով բարեկամներու խնճոյքը կը փոխուի գիշատիչներու խնճոյքի:
Վահէ Քաչան, մարդ արարածը որոշ իրավիճակի մեջ դնելով, ցոյց կու տայ, թէ ինչպէ՞ս ան կ’անցնի իր «մարդ լինելու» կոչման սահմանը։ Միւս կողմէն, հեղինակը կը շեշտէ թէ այս փոխակերպման հիմնական պատճառը պատերազմն է, որ չունի արդարացում:
Հեղինակին «Ակն Ընդ Ական», «Արարչի Ութերորդ Օրը», «Գալիա», «Ուզածիդ Չափ», «Հրեայի Մահը», «Մի Մարդ Ընկաւ Փողոցում», «Գիշատիչների Խնճոյքը», «Լողի Ուսուցիչը» վէպերն ու վիպակները տեսերիզի վերածուած են։ Քաչայի ստեղծագործութիւնները թարգմանուած են տարբեր լեզուներու։
Վահէ Քաչան մահացած է 14 Յունուար 2003-ին, Փարիզ:
Նայիրի Ազարիկեան