Կազմակերպութեամբ Սուրիական Արաբ Աւետարանական եկեղեցւոյ, մասնակցութեամբ Հալէպի մէջ գործող 22 միութիւններու, Շաբաթ, 3 Յուլիս 2021-ին տեղի ունեցաւ «Մոզայիք» նախաձեռնութիւնը:
Նկատի առած, որ հայ համայնքն ալ Հալէպի ժողովուրդին անբաժան մասնիկն է, 2 միութեամբ հալէպահայերն ալ իրենց մասնակցութիւնը բերին:
Ասիկա առիթ եղաւ որ մենք ալ մասնակցինք ու նոր գաղափարներու հաղորդակից դառնանք։
Մեզի նախապէս ըսուած էր, որ պիտի արծարծուին հոգեբանական ու հասարակական զանազան նիւթեր։ Կը կարծէինք, որ կլոր սեղանի մը շուրջ պիտի նստինք եւ իւրաքանչիւր միութիւն իր կարծիքը պիտի յայտնէ նիւթերուն մասին: Սակայն մեզ բաժնեցին ութը խումբերու, իւրաքանչիւր խումբի մէջ կային զանազան միութիւններէ անհատներ։ Բնականաբար նպատակը իրար ծանօթանալն ու միութիւններու միջեւ կապ ստեղծելն էր: Զրոյցը ընթացաւ ռալլիի միջոցով, իւրաքանչիւր խումբ այցելեց 4 տաղաւար ու ներկայացուած հանելուկը հանգուցալուծելէ ետք զրուցեց նիւթին շուրջ:
Խօսեցանք կնոջ հանդէպ բրտութեան կիրարկման, ընկերային արդարութեան, տգիտութեան, վարք ու բարքի, երիտասարդութեան ու կնոջ դերին եւ ընկերային զանազան նիւթերու մասին: Զարմացած էինք եւ ուրախ, որ այսպիսի նիւթերու սկսած ենք անդրադառնալ Սուրիոյ մէջ։ Արաբ մասնակիցները զարգացած էին ու համարձակօրէն կ՚արտայայտէին իրենց կարծիքը: Երախտապարտ էինք, որ հայերուս ալ առիթ ընծայուած էր ու մեր ձայնն ալ լսելի էր:
Զրոյցներու ընթացքին տիրող մթնոլորտը հաճելի էր։ Բոլորը կը լսէին զիրար, բոլորը կը յարգէին միմիանց կարծիքը: Այս նախաձեռնութեամբ անդրադարձանք, որ կրնանք միասնաբար զարգանալ, նոր մտքեր յառաջ բերել մասնակցելով այսպիսի ձեռնարկներու, նպաստելով մեր ընկերութեան յառաջընթացին եւ փոխհասկացողութեան դրական մթնոլորտ ստեղծել:
Անժելա Չաղլասեան