ՀՅԴ Հայաստանի Գերագոյն մարմինի ներկայացուցիչ, Հայաստանի Ազգային ժողովի փոխնախագահ Իշխան Սաղաթէլեան Ազգային ժողովի յայտարարութիւններու ժամուն ըսաւ, որ Արցախի իրաւունքներէն հրաժարիլը համազօր է նոր դաւաճանութեան:
Յայտարարութիւնը ամբողջութեամբ՝ ստորեւ.
«Սիրելի՛ հայրենակիցներ
Անցած շաբաթ լրացաւ Արցախի Հանրապետութեան 30-րդ յոբելեանը:
Արցախի Հանրապետութիւնը՝ թէկուզ վիրաւոր, թէկուզ խոցուած ու տարածքի մեծագոյն մասը կորցրած, բայց գոյութիւն ունի եւ չնայած Ատրպէյճանի պնդումներին եւ ցանկութեանը, ղարաբաղեան հիմնախնդիրը լուծուած չէ: Հիմնախնդրի լուծումը չեն ազդարարել ո՛չ բանակցային գործընթացն առաջնորդելու բացառիկ մանդատն ունեցող ԵԱՀԿ Մինսքի խմբի համանախագահող պետութիւնները, ո՛չ էլ որեւէ միջազգային կազմակերպութիւն:
Եւ ահա այս պայմաններում քննարկւում է Հայաստանի ապաշրջափակման, Հայաստանի եւ Ատրպէյճանի միջեւ սահմանազտումի եւ սահմանագծումի, ինչպէս նաեւ խաղաղութեան եւ բարի դրացիական յարաբերութիւններ հաստատելու մասին համաձայնագրեր ստորագրելու հարցը:
Դատելով Հայաստանի իշխանութիւնների վարած քաղաքականութիւնից, դիրքորոշումներից եւ իրենց գործունէութեան փաստացի արդիւնքներից՝ կարելի է եզրակացնել, որ այս ճանապարհով գնալու դէպքում մենք ունենալու ենք նոր կորուստներ՝ ապաշրջափակման փոխարէն ունենալու ենք աւելի խոր շրջափակում, սահմանազտումի եւ սահմանագծումի արդիւնքում ունենալու ենք տարածքային նոր կորուստներ, իսկ տարածաշրջանում խաղաղութիւն հաստատելու պարզունակ մտադրութեամբ վերջնականապէս կորցնելու ենք Արցախը:
Ատրպէյճանի եւ Թուրքիայի նպատակը պարզ է եւ յստակ. նրանք փորձում են պատերազմով ձեռք բերած առաւելութիւնները ամրագրել տէ ժիւրէ՝ այդպիսով հարցականի տակ դնելով հայ ժողովրդի՝ իր հայրենիքում ապրելու, զարգանալու, իր ինքնութիւնը պահելու եւ, առհասարակ, պետականութիւն ունենալու հարցը:
Նման պայմաններում, երբ Ատրպէյճանը եւ Թուրքիան փորձում են մեզ պարտադրել իրենց օրակարգը, երբ ակնյայտ յարձակողապաշտութիւն են իրականացնում Հայաստանի տարածքային ամբողջականութեան դէմ, անհանդուրժելի եւ անընդունելի է Հայաստանի իշխանութիւնների վարքագիծը: Այսքանից յետոյ գործող իշխանութիւնը յայտարարում է Թուրքիայից դրական ազդակների մասին, Սիւնիքի հայկական տարածքները դաւադիր կերպով կոչում է ատրպէյճանական անուանումներով՝ տուրք տալով Պաքուի բռնապետի շնական պահանջներին:
Փաստօրէն, թուրք-ատրպէյճանական ծաւալապաշտական քայլերի ու գործողութիւնների իշխանական ընկալումն այդպիսին էր:
Մեր ժողովրդի իրաւունքների պաշտպանութեան փոխարէն կառավարութեան ղեկավարը զբաղուած է տարածաշրջանում խաղաղութիւն հաստատելու՝ ինքնահռչակ եւ իրականութիւնից կտրուած խաբկանքներով:
Սիրելի՛ հայրենակիցներ, մենք դէմ չենք խաղաղութեանը, խաղաղութեան ձգտումը մեր գլխաւոր նպատակներից մէկն է, բայց տարածաշրջանային խաղաղութեան հաստատումը ենթադրում է երկկողմանի կամք ու ցանկութիւն, ինչն ատրպէյճանական կողմում ի սպառ բացակայում է: Խաղաղութիւնը պէտք է նուաճուի, հակառակ դէպքում թշնամու կողմից նուիրուած խաղաղութիւնը նոր կորուստների, նոր հայրենազրկման, նոր դժբախտութիւնների բացայայտ թակարդ է:
Ստեղծուած իրավիճակում յապաղումը, Արցախի իրաւունքներից, արդար պայքարից հրաժարումը հաւասարազօր է նոր դաւաճանութեան:
Հայաստանի Հանրապետութեան իշխանութիւնը պարտաւոր է օր առաջ յստակ եւ առանց աճպարարութեան յայտարարել Հայաստանի Հանրապետութեան պաշտօնական դիրքորոշումը ղարաբաղեան հիմնախնդրի վերաբերեալ, ի հարկէ, եթէ այլ թաքնուած նպատակներ չունի.
– Արցախի նկատմամբ ատրպէյճանական վերջին նախայարձակումը միջազգային հանրութեան կողմից պէտք է որակուի որպէս յարձակողապաշտութիւն՝ այդ եզրոյթի ամբողջ իրաւաքաղաքական գնահատմամբ։
– Արցախահայութեան ինքնորոշման իրաւունքի իրացման փաստի ճանաչումն այլընտրանք չունի։
– Ատրպէյճանում գտնուող բոլոր գերիների անյապաղ վերադարձը, Հայաստանի տարածքում գտնուող ատրպէյճանական զօրքերի դուրս բերումը, պատերազմում միջազգային ահաբեկչական միաւորումների մասնակցութեան վերաբերեալ միջազգային իրաւաքաղաքական գործընթացի մեկնարկումը, Արցախի հոգեւոր-մշակութային հարուստ ժառանգութեան պաշտպանութիւնը պէտք է միջազգայնանան՝ դառնալով Հայաստանի արտաքին քաղաքականութեան հիմնական ուղղութիւն եւ միջազգային քննարկման առարկայ:
ԵԱՀԿ-ի Մինսքի խմբի համանախագահների շրջանակում բանակցային գործընթացի վերականգնումը կենսական անհրաժեշտութիւն է: Այս շրջանակում Ատրպէյճանի հետ ուղիղ երկխօսութեան հերթական անհեռանկար փորձերը կարող են հարուածել բանակցային գործընթացի մեկնարկին՝ միջնորդ համանախագահութեան շրջանակում:
Սիրելի՛ հայրենակիցներ, Արցախի ճակատագիրը կանխորոշուած չէ, Արցախի ճակատագիրը կախուած չէ (ինչպէս փորձում են ձեզ համոզել) միայն գերտէրութիւնների կամքից կամ էլ մէկ պաշտօնեայի քմահաճոյքից, Արցախի եւ ընդհանրապէս, հայ ժողովրդի ճակատագիրը մեր ձեռքերում է: Բոլորը թող իմանան՝ Արցախը մեր ժառանգութիւնն է, մեր անվտանգութիւնը, մեր անկախութիւնը, մեր ապրելու եւ ապրեցնելու բնական իրաւունքը, Արցախը մեր հողն ու ջուրն է, արիւնը, մեր ինքնութիւնը:
Շուշին, Հատրութը եւ Արցախի Հանրապետութեան Սահմանադրութեամբ ամրագրուած միւս շրջանները միմիայն ժամանակաւորապէս են բռնազաւթուած թշնամու կողմից»: