Վերամուտ է արդէն, աշակերտութեան եռանդը նոր աշխուժութեամբ համակած է սուրիահայ համայնքին առօրեան: Հայկական վարժարանները երկրի տնտեսական ծանր պայմաններուն տակ կը շարունակեն գոյատեւել, հայ խոստմնալից սերունդներ հասցնել: Անոնք սակայն կարիքը ունին մեր բոլորին ուշադրութեան, հոգատարութեան եւ զօրակցութեան: Դպրոցն է վերջապէս սուրիահայ համայնքի գոյերթի շարունակութեան գլխաւոր երաշխիքը:
Այս առիթով «Գանձասար» հետեւեալ հարցումներով դիմեց Ազգ. Քարէն Եփփէ Ճեմարանի տնօրէն Յակոբ Քիլէճեանին.
«Գանձասար»- Ինչպէ՞ս դիմաւորեցիք վերամուտը, ինչպիսի՞ նախապատրաստական աշխատանքներ տարուեցան եւ ի՞նչ մթնոլորտ կը տիրէր աշակերտներուն մօտ:
Յակոբ Քիլէճեան- Կրթութեան Նախարարութիւնը յայտարարեց՝ 5 Սեպտեմբերը որպէս վերամուտի ժամկէտ, իսկ մենք 6 Սեպտեմբերին յաջողցուցինք մեր վերամուտը: Աշակերտութեան մեծամասնութիւնը ներկայ էր, ուրախութիւնը յստակ էր իրենց մօտ, մանաւանդ որ վերստին միացան իրենց դպրոցական աշխատանքներուն ամառնային արձակուրդէն ետք։ Դասացոյցները պատրաստ են, կը մնայ այն, որ մեր աշակերտները իրենց գիրքերն ու տետրակները, ստանան որպէսզի սկսի իրենց կանոնաւոր դասընթացքը:
«Գ.»- Նկատի ունենալով երկրիս տնտեսական իրավիճակը, սուրիական լիրային անկումը, ինչպիսի՞ դժուարութիւններ հարկ է որ յաղթահարեն մեր վարժարանները եւ ինչպէ՞ս:
Յ. Ք.- Շատ կարեւոր հարցում է, մենք բազմաթիւ դժուարութիւններ ունինք, սակայն հիմնականը տնտեսական վիճակն է թէ՛ երկրիս, եւ թէ մեր ծնողներուն ու դպրոցին: Պատերազմի շրջանին շատ չնչին ու խորհրդանշական գումարներ գանձեցինք ծնողներէն, անցեալ շրջանին մեր կրթաթոշակէն փոքր բաժին մը սկսանք գանձել: Սակայն այս տարի պէտք է ծնողները առ աւելի աջակցութիւն յայտնեն մեր դպրոցին: Մենք պիտի յայտարարենք մեր կրթաթոշակներուն ընդհանուր գումարը, իսկ եթէ ծնողներ դժուարանան զայն փակելու՝ դպրոցիս խնամակալութիւնը յարմար կողմերու դիմելով պիտի փորձէ լուծում գտնել ու եկամուտ ապահովել՝ օժանդակելու ծնողներուն: Անշուշտ կը հասկնանք ծնողներուն դժուարութիւնները, սղաճը ընդհանրապէս տիրող է այս տագնապին մէջ, սակայն մեր ծնողքին կը հետաքրքրէ նաեւ կրթական բաժինը, հետեւաբար կ’ենթադրեմ որ ծնողները իրենց կարելին կ’ընեն այս գծով աջակցելու մեզի:
«Գ.»- Համահայկական օժանդակութիւններու կարիքը կը զգացուի բնականաբար, ի՞նչ խօսք կ’ուղղէք Հալէպով եւ ընդհանրապէս սուրիահայ վարժարաններուն շարունակականութեամբ մտահոգ կողմերու, իսկ մենք ի՞նչ կրնանք ընել այս դժուարութիւնները դիմագրաւելու համար:
Յ.Ք.- Գաղտնիք մը բացայայտած չեմ ըլլար եթէ ըսեմ, որ մեր դպրոցը տարբեր կողմերէ՝ Շրջանաւարտից Միութենէ, Քալիֆորնիոյ Ընկերակցութենէ, կամ մեր շրջանաւարտ ընկերներէ բաւարար օժանդակութիւն չստանալու պարագային շատ դժուար կացութեան պիտի մատնուի:
Մօտիկ անցեալին ՆՍՕՏՏ Արամ Ա. կաթողիկոսը յատարարեց, որ աշխարհասփիւռ հայութիւնը պէտք է իր օժանդակութիւնը բերէ սուրիահայ վարժարաններուն: Կը միանամ Վեհափառ Հայրապետին կոչին եւ բոլոր բարեսիրական կողմերուն, անհատ բարերարներուն եւ նոյնիսկ մեր շրջանաւարտ ճեմարականներուն կրկին կոչ կ’ուղղեմ օժանդակելու Ճեմարանին, որովհետեւ իրենց կատարած չնչին օժանդակութիւնը մեծ դերակատարութիւն կրնայ ունենալ ճեմարանի ուսումնակրթական բնականոն ընթացքի պահպանման մէջ։ Իւրաքանչիւր շրջանաւարտ եթէ կրցաւ սանի մը կրթաթոշակը հոգալ, հաւանաբար իրեն համար ջնջին, սակայն մեզի համար մեծ նշանակութիւն ունեցող գումարով մը, մեծապէս օգտակար դարձած պիտի ըլլայ, մանաւանդ որ այս տարեշրջանը ճեմարանի 75-րդ ամեակին կը զուգադիպի, հետեւաբար կը կարծեմ, որ մեր ճեմարականները աւելի մեծ թափով պիտի օժանդակեն Ազգ. Քարէն Եփփէ Ճեմարանին: Իսկ մենք որպէս Սուրիոյ մէջ ապրող շրջանաւարտներ, պէտք է մեր դուրս բնակող ընկերներուն հետ կապ պահենք, աշխատանքներ տանինք անոնց հետ ի նպաստ մեր դպրոցին, ինչպէս նաեւ որոնենք տեղական մակարդակով հասոյթի աղբիւրներ, մեր կարելիութիւններու գերլարումով՝ միշտ աշխատելով ի նպաստ Ճեմարանի:
«Գ.»- Քարէն Եփփէ Ազգ. Ճեմարանի կրթադաստիարակչական ծրագիրներուն մէջ ինչպիսի՞ փոփոխութիւններ եղան եւ կը նախատեսուին, յատկապէս պատերազմի եւ համաճարակի պայմաններուն լոյսին տակ։
Յ.Ք.- Բոլոր կարգերու պարագային տեղի ունեցան երկու հիմնական, արմատական փոփոխութիւններ՝ անգլերէն եւ ֆրանսերէն լեզուներու դասաւանդման մեթոտներուն մէջ, որոնց համար պէտք է յատուկ աշխատանք տարուի, կրթական նախարարութիւնը քանի մը շաբաթ առաջ յայտարարեց նաեւ դասաւանդման ծրագիրին մէջ նոր առարկայի մը ներառնումին մասին, որն է՝ «Ընկերային եւ յուզական ուսուցում»: Այս նիւթը աշակերտին կը սորվեցնէ համակերպիլ շրջապատին հետ եւ պատերազմին հետեւանքով յառաջացած հոգեկան ճնշումները յաղթահարել: Շատ քաջալերելի միջոց մըն է այս, պայմանաւ որ ճիշդ ձեւով կիրարկուի մեր դպրոցներուն մէջ, որպէսզի դրական արդիւնքներ ստանանք: Այս նիւթը պիտի դասաւանդէ մեր դպրոցի հոգեբանական խորհրդատուն՝ շաբաթական երկու պահով: Յոյսով եմ, որ լուրջ արդիւնքներու կրնանք հասնիլ աշակերտներուն հոգեկան աշխարհը հարստացնելու եւ դժուարութիւնները յաղթահարելու իմաստով:
Հարցազրոյցը վարեց՝
Անժելա Չաղլասեան