ՏԵՂԱԿԱՆ
ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ
– Յորդանանի մէջ տեղի ունեցած արաբական ակումբներու ախոյեանական մրցումներու աւարտին, ՀՄԸՄ-ի նախկին խաղացող Սաուրա կազմի խմբապետուհի Ալիսիա Մակարեան ընտրուեցաւ մրցաշարքի լաւագոյն կէտ նշանակողը ( Scorer ): Սոյն մրցաշարքին Ալիսիան ճանչցուեցաւ որպէս աստղ եւ անոր արձանագրած կէտերը մեծ դեր ունեցան խումբին վրայ: Կիսաւարտականին ան նշանակեց վեց հեռաւոր հարուած՝ դաշտի տարբեր անկիւններէն:
– Սուրիոյ Պասքեթի նորընտիր Դաշնութիւնը պաշտօնական այցելութեամբ մեկնեցաւ Համա, ուր հանդիպում ունեցաւ տեղւոյն պասքեթի պատասխանատուներուն եւ ակումբներու ներկայացուցիչներուն հետ, սերտելով յառաջիկայ տարեշրջանի մրցաշարքերու մանրամասնութիւնները:
– Սուրիոյ ֆութպոլի ախոյեանութեան երրորդ փուլի մրցումներուն, Հալէպի Իթթիհատը 1-1 արդիւնքով հաւասարեցաւ Ֆութուէին հետ, իսկ Քարամէն 3-0 արդիւնքով պարտութեան մատնեց Նաուաիրը. Ճէյշի խումբը 4-0 արդիւնքով յաղթեց Հուրճուլային, որուն բոլոր կոլերը նշանակեց Մուհամմէտ Ուաքէտը: Դամասկոսի Ուահտէն Հալէպի մէջ 3-1 արդիւնքով յաղթեց Աֆրինին, իսկ Ուասպէն 2-1 արդիւնքով պարտութեան մատնեց Թալիաան:
ՄԻՋԱԶԳԱՅԻՆ
ՌՈՆԱԼՏՈՆ ԵՐԿՈՒ ԿՈԼԵՐՈՎ ՆԵՐԿԱՅԱՑԱՒ
ԻՐ ԱՌԱՋԻՆ ՄՐՑՈՒՄԻՆ
Անգլիոյ Մանչեսթըր Իւնայթըտ խումբէն 12 տարիներ հեռու մնալէ ետք, փորթուկալցի խաղացող Քրիստիանօ Ռոնալտօ կրկին միացաւ իր նախկին խումբին, որուն հետ մաս կազմած առաջին հանդիպումին յաջողեցաւ երկու առիթներով ցնցել մրցակից Նիւ Քասըլ խումբին դարպասը՝ 46 -րդ եւ 62-րդ վայրկեաններուն: Հանդիպումը վերջ գտաւ 4-0 արդիւնքով: Մանչեսթըրի մնացեալ երկու կոլերը նշանակեցին Պրոնօ Ֆերնանտէզը՝ 80-րդ եւ Ճէսի Լինկարտը՝ 90-րդ վայրկեաններուն: Շնորհիւ այս արդիւնքին, Մանչեսթըր Իւնայթըտը10 կէտով կը գրաւէ աղիւսակին առաջին դիրքը, իրեն կը յաջորդէ Մանչեսթըր Սիթին՝ 9 կէտով:
ԻՒՐԻ ՏԻԼԵՄԱՆՍ ՊԱՀԱՆՋՈՒԱԾ Է
ԵՐԵՔ ԱԿՈՒՄԲՆԵՐԷ
Ըստ AS-ին, Սպանիոյ Ռէալ Մատրիտը, քաթալոնէական Պարսելոնան եւ Անգլիոյ Մանչեսթըր Իւնայթըտը հետաքրքրուած են անգլիական Լեսթըր Սիթիի 24-ամեայ պելճիքացի կիսապաշտպան Իւրի Տիլեմանսի ծառայութիւններով: Փոխադրութիւնը կրնայ տեղի ունենալ 2022 թուականի ամրան։ Մանչեսթըր Իւնայթըտ Տիլեմանսը իր կազմին միացնել կ’ուզէ այն պարագային, եթէ յաջորդ տարեշրջանին խումբէն հեռանայ աշխարհի ախոյեան, Ֆրանսայի հաւաքականի կիսապաշտպան Փոլ Փոկպան։ Իւրի Տիլեմանսի փոխադրութեան արժէքը սահմանուած է 55 միլիոն եւրոյով։ Ան Լեսթըր Սիթիին հետ է 2019 թուականէն ի վեր, իսկ պայմանագրութիւնը կ’երկարի մինչեւ Յունիս 2023։
Ռաֆֆի Սիւլահեան