Թէեւ մեր կեանքին մէջ յաճախ կ’ապրինք յուզիչ եւ տպաւորիչ պահեր, սակայն ՀՄԸՄ-ի Հալէպի մասնաճիւղի մարզադաշտերու բացման առինքնող տեսարանը հպարտանքի առիթ հանդիսանալով վերյիշեցուց միութեան արձանագրած մարզական յաղթանակները եւ անցեալի փառքի օրերը, միեւնոյն ատեն առիթ ընծայեց կենսունակ նոր սերունդներուն, որպէսզի մարզական ոլորտէն ներս բարձունքներ նուաճելու ձգտում ունենան:
ՀՄԸՄ-ը զանազան երկիրներու մէջ, շնորհիւ իր նուիրեալ անդամներուն, վարչութիւններուն եւ հաւատաւոր համակիրներուն անխոնջ աշխատանքին, ունեցած է մարզադաշտեր եւ ակումբներ, որոնք մեծապէս նպաստած են հայկական առողջ մթնոլորտի ստեղծման եւ հայապահպանութեան գործընթացին:
Դաշտի բացման խորհրդաւոր պահուն, ՀՄԸՄ-ական ըլլալու հպարտութիւնը կրկին արթնցաւ մեր հոգիներուն մէջ, ի տես վերակառուցուած դաշտերը, որոնք անհրաժեշտ են նոր սերունդներուն հայեցի դաստիարակութեան համար, հրամցուող դաստիարակչական ծրագիրներուն կողքին: Մթնոլորտը ինքնին համախմբելով հայ կը պահէ մեր երիտասարդները:
Հալէպահայութիւնը ու ՀՄԸՄ-ականներս տեսանք արդիական ու այժմէական պասքեթպոլի եւ ոտնագնդակի դաշտերուն, որոնք պիտի ծառայեն նոր սերունդի ֆիզիքական եւ բարոյական դաստիարակութեան:
ՀՄԸՄ-ը հիմնադրութեան օրէն մինչեւ օրս հայ ժողովուրդի զաւակներուն մէջ սերմանեց հայրենասիրութեան, ազգասիրութեան, եղբայրասիրութեան եւ իրերօգնութեան ոգին: ՀՄԸՄ-ը իր աւելի քան 100-ամեայ կեանքի ընթացքին հայ ժողովուրդին տուաւ երիտասարդութեան բանակ մը, որ ազգային ոգիով տոգորուած, պատրաստակամօրէն ծառայեց՝ պահպանելու հայկական արժէքները, ընտանեկան սրբութիւններն ու հայրենիքի ազատութիւնը: Փաստ՝ Արցախի 44-օրեայ պատերազմին մեր ՀՄԸՄ-ական անձնազոհ նահատակները, որոնք հայրենիքին համար զոհուելու գաղափարը վեր դասեցին իրենց անձնական կեանքէն եւ իրենց արիւնը թափեցին հայրենիքի ազատութեան համար:
ՀՄԸՄ-էն ներս դաստիարակուած եւ հասակ առած նոր սերունդի զաւակները, իրենց նուիրուածութեամբ եւ յանդուգն կեցուածքով հայ ժողովուրդին յոյսն ու հաւատքը ամրացուցին:
103 տարիներէ ի վեր ՀՄԸՄ-ը եղաւ ու կը շարունակէ մնալ բոցավառ ջահը հայ երիտասարդութեան: Այդ ջահին միջոցաւ հայ պատանին, սկաուտը, մարզիկը, երիտասարդն ու երիտասարդուհին առաջնորդուեցան դէպի լուսաւոր ճանապարհներ:
Այսօր ՀՄԸՄ-ին մեծ դեր եւ առաքելութիւն վստահուած է՝ հայ նոր սերունդները առաջնորդելու բարոյական եւ ազգային առողջ դաստիարակութեամբ, պայքարելով ապազգայնացման եւ այլասերման բոլոր օտարոտի փոթորիկներուն դէմ:
Այս առիթով շնորհակալութիւն կը յայտնեմ բոլոր նուիրատուներուն, աշխարհացրիւ ՀՄԸՄ-ականներուն եւ կը վստահեցնեմ, որ իրենց ընծայաբերած ամէն մէկ լուման իր նպաստը պիտի բերէ Միութեան վեհ նպատակներու իրականացման:
Սիրելի՛ ՀՄԸՄ-ական քոյրեր եւ եղբայրներ, խնամեցէ՛ք, գուրգուրացէ՛ք եւ ձեր նիւթական ու բարոյական աջակցութեամբ պահպանեցէ՛ք մեր ազգային կառոյցներն ու յատկապէս ՀՄԸՄ-ը, որովհետեւ յաջորդող սերունդը իր հայկական դիմագիծն ու նկարագիրը պահելու համար այսօր առաւել պէտք ունի ՀՄԸՄ-ի գաղափարաբանութեան եւ հայեցի դաստիարակութեան:
ՀՄԸՄ-ի Կեդրոնական Վարչութեան անունով կը շնորհաւորեմ բոլոր ՀՄԸՄ-ականները, ի մասնաւորի Սուրիոյ եւ Հալէպի վարչութիւնները, մաղթելով, որ ՀՄԸՄ-ի «Բարձրացիր-Բարձրացուր» նշանաբանի առաջնորդութեամբ անարգել եւ յարաճուն վերելքներ արձանագրեն:
Մանուկ Քէօշկէրեան