Իմ սիրելի ձեռարուեստի աշխարհէն ներս խոշոր քայլերով մուտք գործեցի, ասեղնագործութիւն դասաւանդելով տարբեր խմբակներու. այդ միջոցին ես ալ նոր գիտելիքներ ձեռք բերի:
Հայաստան հաստատուելէ ետք ինծի համար շատ դիւրին եղաւ հոս աշխատանք գտնելը, միակ դժուարութիւնս օրէնսդրական կանոններուն լաւատեղեակ չըլլալս էր. նախընտրելի էր գրանցուած աշխատանք ունենալ, որպէսզի ճիշդ հիմքերու վրայ դրուած ըլլար գործս:
Սուրիոյ համայնքը մեծ մշակութային կեդրոն մը եղած էր, ուր միութիւնները, կազմակերպութիւնները, ընտանիքը միշտ կը պահպանէին աւանդոյթները, ծէսերը, աւանդական տօները, ու յատկապէս մեծ հետաքրքրութիւն եւ գուրգուրանք կը տածէին ասեղնագործութեան նկատմամբ:
Հալէպի մէջ նախասիրութեամբս տունս կը յարդարէի գեղեցիկ ասեղնագործութիւններով: Իւրաքանչիւր ասեղնագործ աշխատանքի ուսումնասիրութեամբ, դասընթացքներու հետեւելով, յատուկ տնտեսվարական ծրագիրներով կրցայ յաղթահարել բոլոր շուկայի դժուարութիւնները, ինչու չէ նաեւ անոնցմէ կրցայ թէ՛ գիտելիքներ ձեռք բերել եւ թէ՛ բարեկամութիւններ ունենալ, որոնց աջակցութիւնը վայելեցի:
Որպէս ձեռներէց անհատ կը գործակցիմ վարպետներու հետ եւ ունիմ նաեւ աշխատողներ: Եւրոպական կարատեսակները բոլորը իւրացուցած եմ իմ ջանքերովս եւ հետազօտութիւններովս, համադրութիւններ ըրած եմ եւրոպականի եւ հայկականի միջեւ եւ լայն տեսականիներու վրայ` դրոշմս դրած: Անսահման Երեւակայութեամբ կ’աշխատիմ` վզնոցներ, քողեր, տօնածառի խաղալիքներ………:
Հայաստանի Մշակոյթի նախարարութիւնը մեծապէս քաջալերեց զիս եւ միջազգային փառատօներու մասնակցելու առիթը ունեցայ:
Ամերիկայի Ուաշինկթըն քաղաքին մէջ Ապրիլ 2018-ին, Smith Sonion folk festiv 90-վարպետներու կողքին, հայկական մշակոյթը ներկայացուցինք, «Արարել Հայկական Տուն» ARMENIA CREATING HOME խորագրով, ուր ներկայացուեցաւ հայկական կենցաղը իր ասեղնագործութեամբ, երգով, պարով, օժիտով……..:
Մասնակցեցայ նաեւ Surajkund Art and craft mela Հնդկաստանի փառատօնին` Մարտ 2020-ին:
Ինչպէս նաեւ 2018-ին Գերմանիոյ մէջ թաղիքագործութեան խմբակով Վրաստանի փառատօնին` Սուրիահայերու միութեան հետ, մասնակցած եմ նաեւ Արցախի եւ Հայաստանի բոլոր տարածքներուն մէջ տեղի ունեցած փառատօներուն:
Օտարներու գնահատանքն ու հիացմունքը հպարտութեամբ կը լեցնէ սիրտս ու հոգիս:
Ասեղնագործութիւն աշխատած միջոցիս կ’անջատուիմ շրջապատէս, նախշերը ինծի կը տանին ուրիշ աշխարհ, կը մտածեմ անոնց խորհուրդին մասին, այդ տարածաշրջանի ժողովուրդի բնաւորութիւններուն մասին, որովհետեւ ասեղնագործութիւնը կ’արտացոլացնէ շրջանի նկարագիրը: Բոլոր ձեւի ասեղնագործութիւններուն մէջ Այնթապի գործը առաջին կարգի տեղ կը գրաւէ իմ քովս` Այնթապցի ըլլալուս:
Տիրապետած եմ Մարաշի, Ուրֆայի, Տիգրանակերտի, Սուազի, Վանի, Այնթապի, Լասէի, թոյլի եւ Շուքի գործերուն:
Կը քաջալերեմ, որ երիտասարդ սերունդը մշակութային արժէքները պահպանէ եւ տարածէ:
Մարալ Շէօհմէլեան-Պէրպէրեան