ՍՕ Խաչը, որպէս ՀՕՄ-ի մէկ շառաւիղ, իր մարդասիրական առաքելութեան ընթացքին մի՛շտ ալ աշխատանք ծաւալած է ինքնաբաւ ըլլալու, կնոջական բազուկներուն վստահելով նիւթական հասոյթ ապահովելու ու անով իրականացնելու իր բարեսիրական բազմաբնոյթ ծրագիրները: Այս ծիրէն ներս, Շրջ. Վարչութիւնը ամէն առթիւ խրախուսած է իր յանձնախումբերն ու նստավայրի մասնաճիւղերը ինքնուրոյն հասութաբեր ծրագիրներ մշակելու, իւրաքանչիւրը ապաւինելով իր համեստ կարողութիւններուն:
Անցնող Սեպտեմբեր ամսուան ընթացքին, Շրջ. Վարչութիւնը հրաւէր ստացաւ Սուրիոյ Դիւանագիտական Ակումբէն մասնակցելու բարեսիրական ցուցահանդէս-վաճառքին, որ տեղի պիտի ունենար Շաբաթ, 9 Հոկտեմբեր 2021-ին, Դամասկոսի Տամա Ռոզ պանդոկէն ներս: Սոյն խմբակցութեան ներկայացուցիչները նախապէս այցելած էին ՍՕ Խաչի Ընկերաբժշկական կեդրոն, ծանօթացած` վարչութեանս կարգ մը ընկերուհիներուն հետ ու գաղափար մը կազմած միութեանս մինչ օրս ծաւալած ծրագիրներուն շուրջ:
Վարչութիւնս ընդառաջեց այս խմբակցութեան առաջարկին, յարմար առիթ նկատելով միութեան մասնակցութիւնը, քարոզչական նկատառումներով: Ցուցահանդէսի նախօրեակին Շրջ. Վարչութեան հինգ ընկերուհիներ ժամանեցին մայրաքաղաք: Կարճ ժամանակ անց, ի յայտ եկաւ, թէ ցուցահանդէսին կը մասնակցէին թուով 19 երկիրներու դեսպանատուներ, որոնք իրենց երկիրներու արտադրութիւնները կը ծանուցէին, իւրաքանչիւրը իրեն յատուկ ոճով ու ճաշակով: Այս տարի, առաջին անգամ ըլլալով, ակումբի պատասխանատուները հրաւիրած էին նաեւ Հալէպէն քանի մը բարեսիրական միութիւններ, մաս կազմելու սոյն բարձրորակ ցուցահանդէսին:
Նախաձեռնութեան նախօրեակին, Շրջ. Վարչութիւնը գործի լծեց Աշխատանոցի եւ Ձեռարուեստի յանձնախումբերը նոր արտադրութիւններով հարստացնելու իրենց հաւաքածոները: Առաջարկուեցաւ նաեւ նստավայրի մասնաճիւղերուն, հնարաւոր ուտեստներու եւ անուշեղէններու պատրաստութեամբ, իրե՛նք եւս մաս եւ բաժին ունենալ այս ծրագրին մէջ: Թելադրանքները լիիրաւ իրագործուեցան, սակայն հարկ էր այս բոլոր արտադրութիւնները միաւորել մէկ պիտակի տակ: Այս շրջանին, վարչութեանս յառաջացուցած Շուկայավարման յանձնախումբը «Narod» վաճառանիշի առաջարկութեամբ ներկայացած էր, որպէս ՍՕ Խաչի արտադրութիւններու առցանց վաճառանիշ: Գաղափարը աւելի քան նպատակայարմար էր: Հարկ էր որդեգրել սոյն պիտակը միաւորելու զոյգ յանձնախումբերուն եւ մասնաճիւղերուն արտադրութիւնները, ծանօթացնելու ՍՕ Խաչի արտադրանքը օտար միջավայրին:
Եւ այսպէս ծնունդ առաւ «Narod»ը: Ցուցահանդէսին դրական արձագանգ ունեցան հայկական ասեղնագործութիւնները, չորցած պտուղներով պատրաստուած քաղցրաւենիքն ու չիրերը եւ համարեա՛ բոլոր արտադրութիւնները, «Narod» պիտակի կցումով: Ականաւոր անձնաւորութիւնները դրուատանքի արտայայտութիւններով քաջալերեցին ՍՕ Խաչը, որպէս ինքնուրոյն դիմագիծ ունեցող միութիւն: Ուստի, արձանագրուած յաջողութիւնը աւելի քան խրախուսական էր: Վարձքը կատար նուիրեալ ընկերուհիներու այն հոյլին, որ անձնուրաց նուիրումով, տիւ եւ գիշեր անդուլ աշխատանքով, յաջողեցաւ կարճ ժամանակուայ ընթացքին անկարելին իրականացնել:
ՍՕ Խաչի Շրջ. Վարչութիւն