ՏԵՂԱԿԱՆ ԼՈՒՐԵՐ ՍՈՒՐԻՈՅ ՄԱՐԶԱԿԱՆ ԿԵԱՆՔԷՆ – Սուրիոյ ֆութպոլի հաւաքականներու ձախող ընթացքին հետեւանքով, անցեալ շաբթուան ընթացքին Ֆութպոլի Դաշնութիւնը իր ամբողջ կազմով հրաժարական ներկայացուց: Երկուշաբթի օր Դամասկոսի մէջ տեղի ունեցաւ դաշնութեան արտակարգ նիստը, որուն աւարտին Թաուֆիք Սարհան ընտրուեցաւ առժամեայ նախագահ: – Մասնակցութեամբ վեց ակումբներու` Իթթիհատի, Ուահտէի, Ճէյշի, Քարամէի, Ճալաաի եւ Հըթթինի, Դամասկոսի մէջ սկսաւ Սուրիոյ պասքեթի Սուփր Բաժակի մրցաշարքը: Սոյն մրցաշարքը Սուրիոյ պասքեթի պատմութեան մէջ առաջինն է, որ կազմակերպուեցաւ նորընտիր Պասքեթի Դաշնութեան կողմէ: ՄԻՋԱԶԳԱՅԻՆ ԱՆԳԼԻՈՅ ՖՈՒԹՊՈԼԸ ՊԱՏԺԱԿԱՆ ՏՆՕՐԻՆՈՒՄԻ ԵՆԹԱՐԿՈՒԵՑԱՒ ՈՒԵՖԱ-ն պատժական տնօրինում սահմանեց Անգլիոյ Ֆութպոլի Դաշնութեան` Եւրօ-2020-ի Անգլիա – Իտալիա հանդիպումին տեղի ունեցած անկարգութեան հետեւանքով: Յառաջիկայ երկու տեղական հանդիպումներուն, Անգլիոյ հաւաքականը պիտի ներկայանայ առանց ժողովուրդի: Անգլիոյ Ֆութպոլի Դաշնութիւնը ստացաւ նաեւ 100 հազար եւրոյի արժողութեամբ նիւթական տուգանք: Յիշեցնենք, որ 11 Յուլիսին Լոնտոնի «Ուեմպլի» մարզադաշտին մէջ տեղի ունեցած եզրափակիչ հանդիպումէն առաջ, քանի մը հարիւր անգլիացիներ առանց տոմսի ներխուժած էին դաշտ, ուր բախումներ տեղի ունեցած էին անվտանգութեան աշխատակիցներու հետ: Խաղի ընթացքին անգլիացի անհատներ ծեծի ենթարկած են հանդիսականները եւ տարբեր առարկաներ նետած են խաղադաշտ: ՊԵՆԶԵՄԱՆ ՆՈՐ ՊԱՐԳԵՒ ՍՏԱՑԱՒ Սպանիոյ Ռէալ Մատրիտ ակումբը իր պաշտօնական կայքին վրայ յայտարարեց, որ խումբի ֆրանսացի յարձակողական խաղացող Քարիմ Պենզեման նուաճում մը եւս արձանագրելով տիրացաւ Սեպտեմբեր ամսուան լաւագոյն խաղացողի կոչումին: Ըստ կայքին, Պենզեման կրցաւ գրաւել առաջին դիրքը, իրեն յաջորդեցին Վինիսիոս Ճինիըրը եւ Քորթուան: Աւելցնենք, որ ֆրանսացի մարզիկը այս տարեշրջանին մինչ օրս նշանակած է 9 կոլ: ԿԱՐԻԷԹ ՊԷՅԼ ՊԱՀԱՆՋՈՒԱԾ Է ԱՐՍԵՆԱԼԻ ԿՈՂՄԷ Ըստ Defensa Central-ին, Լոնտոնի Արսենալը փափաք յայտնած է ձեռք բերել Սպանիոյ Ռէալ Մատրիտի եւ Ուելզի հաւաքականի յարձակողական մարզիկ Կարիէթ Պէյլը: Անգլիական ակումբը 32-ամեայ ֆութպոլիստին գծով իր առաջարկը ներկայացուցած է արքայական ակումբին, որպէսզի Յունուարի փոխադրաշրջանին Պէյլը միացնեն լոնտոնեան ակումբին: Ընթացիկ մրցաշրջանին Պէյլ Ռէալին հետ մասնակցած է 3 հանդիպումի եւ արձանագրած է մէկ կոլ: Պէյլ 2013-ին Լոնտոնի Թոթենհամ ակումբէն միացաւ Ռէալին` փոխան 101 միլիոն եւրոյի:
ՊԱՏՐԱՍՏԵՑ ՌԱՖՖԻ ՍԻՒԼԱՀԵԱՆ