Վերջապէս աւետիս մը՝ Համբիկ Սասունեանի ազատ արձակումը, նշոյլ մը յոյս կաթեցուց մեր հոգիներուն մէջ հայրենիքի թէ սփիւռքի այս անյոյս օրերուն: Ինչքա՜ն կարիքը ունինք այսպիսի հերոսներու ներկայութեան մեր իրականութեան մէջ: Արդարութեան համար պայքարող անշահախնդիր հայորդիի մը, որ հայրենիքին ու իր դատին համար պատրաստ է ի սպաս դնել իր ողջ կարելիութիւնը, ոչ թէ թշնամիին ձեռք երկարող նորօրեայ հայրենի ղեկավարութեան անձնատուութեան ճամբան բռնել: Այս աւետիսը կը զուգադիպի մեր պատմութեան ամօթալի էջերէն մէկուն առաջին ամեակին՝ Արցախի մեծ մասը թշնամիին յանձնելու ստորագրութեան առաջին ամեակին:
Համբիկ Սասունեանի վերադարձը յոյս տալէ աւելի մտածել կու տայ մարդոց նկարագրային գիծերու, հայրենասիրութեան ապրումներու տարբերութեան մասին, քաղաքական կեանքի մէջ ըլլան անոնք, թէ պարզ նուիրեալներ:
Մին կեանքը կը մաշեցնէ յանուն Հայաստանի եւ հայութեան, 40 տարի ըմպելով ամէնէն դժուար տառապանքները, ճաշակելով ամէն տեսակի ցաւ, սակայն պողպատեայ կամքը ամուր պահելով, ազատ հոգին բանտերու ճաղերէն դուրս արձակելով, Հայաստանի ու հայ ժողովուրդի հանդէպ սէրը վառ պահելով:
Բնականաբար Թուրքիոյ Արտաքին Գործոց Նախարարութիւնը պիտի դատապարտէր Համբիկի ազատ արձակումը եւ գովաբանէր իր ծրագիրները իրականացնողները: Թուրքիոյ իշխանութիւններն են անհանգստացողն ու դատապարտողը, մի՛ զարմանաք. երկրի մը իշխանութիւնները, որոնք չեն զանազաներ արդարութեան մարտիկը ահաբեկիչէն, իշխանութիւնները երկրի մը, որուն անցեալը լի է արիւնահեղութեամբ եւ զարհուրելի դէպքերով, 1,5 միլիոն անմեղներու անէծքով: Միեւնոյնն է, սակայն, Համբիկը բանտի ճաղերուն ետին քառասուն տարի դիմանալէ ետք վերջապէս կը հասնի ողջ-առողջ: Անոր ներկայութիւնը Հայաստան կը յուշէ, որ դատի մը նուիրուիլը լոկ կուսակցական ըլլալ չի նշանակեր, արդար պայքարի դաշտ նետուիլը զգացական պոռթկումի արդինք չէ միայն, այլ գործնական քայլերու՝ ժամանակին եւ տեղին համապատասխան քայլերու: Մեր ազգի իրաւունքներուն պաշտպանութեան պարտքը կը կրեն ե՛ւ մարտիկը, ե՛ւ զինուորը, ե՛ւ ազգային գործիչը, ե՛ւ քաղաքական գործիչը. իւրաքանչիւրը ի՛ր ոլորտին, ի՛ր կարելիութեան, ի՛ր գիտակցութեան եւ վճռականութեան համաձայն: Մէկը միւսը չի փոխարիներ յաճախ, սակայն բոլորին աշխատանքն ու նկրտումները մէկ նպատակի կը ծառայեն, նպատակ մը, որ վեր է նեղ շահերէն, որուն հետապնդումը նուիրում ու գիտակցութիւն կը պահանջէ:
Համբիկը այս ծանր օրերուն յոյսի պատգամ մը բերաւ Հայ Դատի արդար լուծման հաւատացողներուս: Այդ պատգամը կը յուշէր, որ որքան ալ տիրող ըլլայ անարդարութիւնը, զայն վերացնելու յանդգնութիւնը չի խամրիր ու պիտի չխամրի: Պարտութիւնները կարելի է յաղթահարել յանձնառու հայերու խիզախ որոշումներով, յանդուգն քայլերով, աննահանջ մարտնչումներով, այլապէս ո՞ր ժողովուրդը դիւրաւ, ակնթարթի մը մէջ տիրացած պիտի ըլլար իր իրաւունքներուն: Նոր զէնքեր յօրինելու եւ մեր արդար պայքարը շարունակելու, մեր միտքն ու ապրումները շաղախելով նոր ռազմավարութեամբ շարժելու վստահութիւնն է, որ կը ներշնչէ Համբիկը: Անոր հայրենիք ներկայութիւնն ու ժպիտը, հայկական գինիի բարձրացուցած բաժակը իմաստ ունին վերջապէս:
9 Նոյեմբերի ամօթալի ստորագրութենէն անցաւ մէկ տարի: Տարի մը եւ մենք տակաւին չենք սթափած անձնատուութեան հարուածէն ու տակաւին Հայաստանի մէջ անտեղի ըսի ըսաւներով ժամանակ կը վատնեն, փոխանակ պատրաստուելու յաջորդ պատերազմին ու ազատագրական պայքարին: Տարի մը կորսնցուցինք եւ նման բազում տարիներ, որոնց ընթացքին կրնայինք պատրաստել հայոց արդիական բանակը, շահիլ քաղաքական բեմի վրայ դաշնակիցներ ու ժողովուրդի կենսամակարդակը բարձր պահելով տնտեսական լծակներուն գերին չդառնալ:
Միւս կողմէ, թշնամին շատ լաւ օգտագործեց մեր այս անկազմակերպ վիճակը եւ կը շարունակէ օգտուիլ եւ ներկայ իշխանութիւններէն յաւելեալ զիջումներ պահանջել՝ արհամարհելով հայութեան զոհերն ու մարտնչումները:
Ուստի ձեռնածալ մնալու փոխարէն ծրագրենք, գուցէ սկիզբէն սկսինք ամէն բան, բայց ծրագրենք ու վերաբանանք մեր պանծալի գոյերթի ուղին՝ ազատութեան պայմաններու մէջ, առանց ուրիշին պարտադրեալ լուծը կրելու: Մեր ընկերներուն արեան կանչը այս կը թելադրէ:
Յառաջիկայ օրերուն ՀՅԴ 131-ամեակի յիշատակումը դարձնենք մեր յառաջիկայ ծրագիրները քննելու, ռազմավարութիւնը ուրուագծելու առիթ ու ինքնաքննադատութենէն սկսելով նոր գործելաոճ որդեգրենք հասնելու յաղթանակի ճամբայ առաջնորդող իրատեսական ծրագիրներու: Մեր երիտասարդութեան ողջ ուժն ու միտքը, բազուկն ու կամքը ծառայեցնենք այս նպատակին՝ Համբիկ Սասունեանի համբերութեամբ ու ինքնավստահութեամբ ազատութեան հասնելու եւ այդ ազատութեան ուղերձը հայրենի հողին վրայ կանգնած փոխանցելու օրինակը մեր յուշարարը դարձնելով:
Սագօ Խալոյեան