Սիրելի՛ հերոս, նահատա՛կ Մոսիկ,
Արդէն տարի մը գլորեցաւ բացակայութեամբդ մթագնող կեանքէս: Դուն չկաս, նախընտրեցիր հերոսաբար ննջել «Եռաբլուր»ի բարձունքին վրայ՝ հայ զինուորին վայել հպարտութեամբ:
Կը յիշեմ մեր ծանօթացման առաջին պահը, Պէյրութ, երբ չորս ընկերներուդ հետ դարձար իմ դրացին: Ես ձեր մաքրամաքուր հոգիներուն առնչուելով երաշխաւոր դարձայ եւ տանտիրոջ համոզեցի, որ ձեզ իր տունը վարձքով տայ: Զգացած էի, որ բոլորդ ազգային բարձր նկարագիրով, հայրենասէր եւ աշխատասէր տղաք էք: Մեր ջերմ յարաբերութիւնը սկսաւ այստեղէն, սիրելի՛ տղաս, Մոսի՛կ:
Միշտ կը մաղթէի, որ Աստուած ինծի քեզի նման տղայ մը պարգեւած ըլլար, իսկ դուն կը պատասխանէիր.
-Հօրաքո՛յր Լուսին, արդէն այդպէս է, ես տղադ եմ:
Դուն անզուգական զաւակս դարձար, այդպէս ալ պիտի մնաս, իմ հերո՛ս որդի:
Ինչքա՞ն ծրագիրներ ունէինք՝ միասին պիտի վերադառնայինք Հալէպ, քեզ պիտի ամուսնացնէինք, տուն-տեղ պիտի կազմէիր, գործ պիտի հիմնէիր եւ կեանքդ կարգաւորէիր: Սակայն հայրենի հողին կանչը աւելի գերակշիռ էր քեզի համար: Եթէ յաղթանակի դափնեպսակը կրած դառնայիր, որքա՜ն պիտի ուրախանայինք…:
Քանի-քանի անգամներ ձեռք-ձեռքի տուած երգեցինք. «Ա՜խ ֆետայիներ, ջա՛ն ֆետայիներ»: Երգ, որուն արձագանգը մինչեւ հիմա ներկայութիւնդ կը յիշեցնէ:
Քանի անգամներ կրկնած ես. «Այդ ձեռքերդ չփճանան, Լուսի՛ն հօրաքոյր»: Սակայն ետիդ դատարկութիւն մը ձգելով անվերադարձ հեռացար այս անհեթեթ աշխարհէն: Երանի դո՛ւն զիս թաղէիր, իմ հերո՛ս որդի, ոչ թէ ես այս ծանր ցաւով շարունակէի կեանքս:
Մեր հարազատ կապը զարգացաւ, խորացաւ եւ անկեղծութեամբ շարունակուեցաւ Հալէպի մէջ եւս: Քեզ ուշ գտայ, ի՛մ որդի, սակայն շուտ կորսնցուցի, նուիրեա՛լ նահատակ:
Մահուանդ գոյժը սարսափելի էր, շնչահեղձ դարձուց զիս, սակայն հպարտութեամբ լեցուց հոգիս ու սիրտս: Այդ փոքր մարմնիդ մէջ որքա՞ն խիզախութիւն կուտակած էիր, տղա՛ս: Կ’աղօթեմ, որ Տէր Աստուած համբերութեամբ զինէ մայրդ եւ մեզ:
Քեզ, քու խիզախ հոգիին անմահութեան համար ամէն Կիրակի մոմ կը վառեմ, աղօթք կը բարձրացնեմ առ Աստուած:
Ձեր յիշատակը յաղթանակի ճամբաներ թող ուրուագծէ մեր ազգին դիմաց, հալէպահայ, խիզա՛խ երիտասարդներ, Դաշնակցութեան եւ հայրենիքի մարտիկնե՛ր:
Լուսին Բանոյեան