Աւելի քան տասը տարիներու վրայ երկարած սուրիական տագնապը Սուրիան եւ սուրիահայութիւնը դէմ յանդիման դրաւ այնպիսի դժուարին պահերու, որոնց հետեւանքով մեր ժողովուրդը, պետութիւնը ընդհանրապէս կը գտնուէին իրենց գոյութեան սպառնացող վտանգին առաջ:
Տագնապի տարաբնոյթ վտանգները յառաջացուցին ամէնօրեայ մարտահրաւէրներ, որոնցմէ յաղթանակած դուրս գալը կը մնար մնայուն հրամայական:
ՀՅԴ-ն տագնապի առաջին օրէն իսկ, յստակ դիրքորոշմամբ ու պատմական պահու ամբողջական գիտակցութեամբ եւ ուժերու գերլարումով ստանձնեց սուրիահայութեան առջեւ բարձրացող սպառնալիքներուն դէմ պայքարելու առաքելութիւնը: Միշտ հիմք ունենալով Սուրիական Հայրենիքի տարածքային ամբողջականութիւնը, սուրիական սահմանադրութեամբ հաստատուած Սուրիոյ պետականութեան եւ Սուրիոյ ժողովուրդին արժանապատիւ եւ ինքնիշխան ապրելու իրաւունքը:
Եւ այսպէս ընթացք առաւ ծաւալուն աշխատանք:
Աշխատանք, ուր Դաշնակցութիւնն ու իր գաղափարակից երիտասարդութիւնը անձնուրաց մղումով, սխրագործութիւններու ճանապարհը բռնած, օրն ի բուն աշխատեցան ժողովուրդին առօրեայ կարիքները ապահովելու եւ հայահոծ թաղերու ինքնապաշտպանութիւնը կազմակերպեցին ընդդէմ պատմական թշնամիին կողմէ հովանաւորուած ահաբեկչական հրոսակախումբերուն:
ՀՅԴ-ն եղաւ դրօշակիրը միասնակամ աշխատանքին եւ յաջողեցաւ ի մի բերել սուրիահայութիւնը՝ միասին գործելու եւ դիմագրաւելու մարտահրաւէրները:
Այսօր, Սուրիոյ ժողովուրդին ու անոր պետական բանակին շնորհիւ իրերայաջորդ յաղթանակներով կարելի եղաւ մեծաթիւ տարածքներ ազատագրել եւ զանոնք դարձնել պետութեան գերիշխանութեան ներքոյ:
Հեռացան մեզմէ մահասփիւռ հրասանդներն ու դիպուկահարներու չարաբաստիկ փամփուշտները, վերջ տալով մեր առօրեայ մղձաւանջներուն ու առիթ ընծայելով վերարժեւորելու մեր իրավիճակը եւ որոնելու մեր կորուստները վերականգնելու միջոցները:
Գաղութի ազգային դիմագիծին պահպանումը, ստեղծուած տնտեսական ճգնաժամը, Սուրիական Հայրենիքի վերամշակուող սահմանադրութիւնը, ազգային միութենական կառոյցներու վերականգնումը ու բազմաթիւ այլ օրակարգեր խճողեցին մեր առօրեան:
Արդարեւ, անցնող երկու տարիները եղան գերազանցօրէն աշխատանքի տարիներ, որոնց ընթացքին մեր ընկերները երբեմն անհատաբար եւ ընդհանրապէս հաւաքաբար անսակարկ նուիրումով իրենց ներդրումը բերին մեր ժողովուրդի խնդիրներու լուծման եւ իղձերու իրականացման գործին:
Եւ այսպէս.
Հայոց Ցեղասպանութեան նիւթը ներառուեցաւ Սուրիոյ Կրթութեան Նախարարութեան պետական դասագիրքերուն մէջ, երկար տարիներու Հայ Դատի իրերայաջորդ յանձնախումբերու, հայ երեսփոխաններու եւ հայ քաղաքական գործիչներու ծաւալած քարոզչական, յարաբերական եւ քաղաքական աշխատանքներու որպէս արդիւնք՝ Սուրիոյ Խորհրդարանին կողմէ հաստատուեցաւ Հայոց Ցեղասպանութեան ճանաչումը եւ դատապարտումը՝ ամրագրուեցաւ Սուրիոյ ժողովուրդին ականատեսի վկայութիւնը ընդդէմ ցեղասպան ոճրագործին:
Վերամշակուող Սուրիոյ Սահմանադրութեան մէջ հայութեան ներկայութիւնը առաւել եւս հաստատուած տեսնելու համար մեր ուղղութիւնը եղաւ քաղաքացիական հաւասար պարտաւորութիւններու եւ իրաւունքներու հաստատման շրջագիծին մէջ տեսնել՝ սուրիահայութեան կենսունակ յարատեւումի ու ազգային դիմագիծի պահպանման երաշխիքը:
Մեկնելով մեր քաղաքացիական պարտաւորութիւններէն, հայութեան ներուժի ներկայացման լաւագոյն առիթը նկատուեցաւ սուրիական խորհրդարանական վերջին ընտրութիւնը: Մեր համակիրներուն պարտաճանաչ ու գիտակից մասնակցութիւնը, ինչպէս նաեւ մեր ընկերներուն կազմակերպուած ու կարգապահ աշխատանքը, գործին հանդէպ ունեցած հաւատքն ու յանձնառութիւնը, քարոզչական ու յարաբերական աշխուժութիւնը պսակուեցան իւրայատուկ յաղթանակով մը:
Այսօր, Սուրիոյ Խորհրդարանէն ներս սուրիահայ ժողովուրդը կը ներկայացնեն երեք հայ երեսփոխաններ, որոնց հետ խորհրդարանէն ներս սուրիական եւ հայկական հարցերու արծարծումին համար գործակցութեան գծով կը մնանք նախանձախնդիր:
Պսակաձեւ ժահրը իր կարգին եկաւ բարդացնելու արդէն տագնապի հետքերը դեռ չթօթափած ինչպէս Սուրիոյ, այնպէս ալ հայութեան կեանքը:
Թագավարակի մահասփիւռ վտանգը հարկ էր դիմադրել ստեղծելով բուժօգնութեան կեդրոններ, տրամադրելով համապատասխան ծառայութիւններ:
Այս ամբողջը միայն բաժին մըն է այն բազմատեսակ աշխատանքներու, որոնք կատարուեցան մեր յարակից միութիւններուն ու կամաւոր համակիրներուն ջանքերով:
Սակայն այս բոլորին կողքին մեծագոյն մտահոգութիւնը կը մնար Սուրիոյ հայահոծ շրջաններուն մէջ հայկական կառոյցներու ամրապնդումը ու անոնց վերակազմակերպումը՝ մշակութային, բարեսիրական, մարզական եւ այլ բնագաւառներէն ներս գործող հայ հաւաքական կեանքի վերակազմակերպման թափ տալով:
Տագնապին հետեւանքով յառաջացած մարդուժի նօսրացումը հայութեան կ’առաջնորդէր դէպի վատագոյն եւ անդառնալի հետեւանքներով լի ապագայ:
Հարկ էր աշխուժացնել սուրիահայութեան երբեմնի ազգային միջավայրը՝ ներառելով նորանոր ուժեր, որոնք փորձառութիւն ձեռք ձգելով պիտի ստանձնեն ազգային պարտաւորութիւններ: Այս է միակ ճանապարհը, որ կ’ապահովէ գաղութին հայկական դիմագիծի եւ էութեան պահպանումը:
Մեր յոյսերը ի դերեւ չելան եւ մեր միութիւնները օր ըստ օրէ աւելի աշխուժանալով համալրուեցան նոր ուժերով:
Այս բոլորին զուգահեռ աննկատ չէին մնացած Հայաստանի ու Արցախի երկնակամարին կուտակուող սեւ ամպերը, թուրք-ատրպէյճանական դաշնութիւնը, մինչեւ ատամները սպառազինուած ոճրագործին ծանօթ յոխորտանքով կը սպառնային Արցախի եւ Հայաստանի հանրապետութիւններուն:
Եւ չուշացաւ մարդակեր գազաններու գրոհը հայրենի Արցախ:
Մեծագոյն մայրաքաղաքներու մէջ կազմակերպուեցան Ատրպէյճանի եւ Թուրքիոյ դէմ դատապարտման ցոյցեր, մշակուեցան դիւանագիտական առաքելութիւններ՝ տարբեր կողմերու բացատրելու արցախեան պատերազմին վտանգաւոր հետեւանքներն ու Թուրքիոյ համաթուրանական նկրտումները:
Կրկին աշխարհը ցոյց տուաւ մարդկային անզօրութիւնը քաղաքական դաւադրանքներուն դիմաց:
Դաշնակցական գործով ու փորձով «միայն զէնքով կայ հայոց փրկութիւն»ը առաւել իմաստաւորուեցաւ, երբ դարձեալ հայութիւնն ու հայրենի Արցախը յանձնուեցան իրենց ճակատագիրին:
Հայրենիքի ու հայ ժողովուրդի կանչը Դաշնակցութեան գաղափարներով սնուած ու անոր պատմական առաքելութեան գիտակից եւ նախնիներու ժառանգը պահած մեծաթիւ դաշնակցականներ մղեց դէպի հայրենի հող, օրհասական այդ պահերուն կանգնելու համար արցախահայութեան կողքին: Անոնք փութացին կամաւոր ու անկեղծ զինուորի անձնազոհութեան գերագոյն նուիրումով:
Հոն էր նաեւ սուրիահայութիւնը, դաշնակցական մեր ընկերները հաւատարիմ իրենց ուխտին, այնպէս ինչպէս Հալէպի հայահոծ թաղերու պաշտպանութիւնը ստանձնած էին, այս անգամ նոյն վարձկաններուն դէմ դրին Շուշի մատոյցներուն վրայ, հայուն պատուաբեր նահատակութեամբ գրկեցին մահը, ու իրենց հոգիները ճախրելով Շուշիի երկնակամարին միացան իրենց ներշնչումը հանդիսացող Հայ Յեղափոխական Դաշնակցութեան նահատակներու փաղանգին:
Փա՜ռք ձեզ նմանները ծնողներուն, սիրելի՛ ընկերներ:
Փա՜ռք Հայ Յեղափոխական Դաշնակցութեան, որ ձեր նահատակութեամբ առաւել պայծառացաւ:
Փա՜ռք հայ ժողովուրդին ու անոր հայրենիքին՝ Ազատ, Անկախ ու Միացեալ Հայաստանին: