6 Ապրիլ 2022_ին Ազատութեան հրապարակին մէջ “Հայաստան” դաշինքի կազմակերպութեամբ տեղի ունեցաւ յանուն Հայաստանի եւ Արցախի պաշտպանութեան հանրաւաք, որ յանգեցաւ հետեւեալ յայտարարութեան.
“Յանուն Հայաստանի եւ Արցախի պաշտպանութեան հրաւիրուած հանրահաւաքի մասնակիցներս, անկախ մեր գաղափարաբանական եւ քաղաքական տարբերութիւններից, վճռականօրէն մերժում ենք թուրք-ատրպէյճանական տանդեմի կողմից պարտադրուող օրակարգերը։ Խաղաղութեան նախադրեալներ ստեղծելու համար Ատրպէյճանը պէտք է վերադարձնի հայ ռազմագերիներին, պատանդներին, այլ պահուող անձանց, ազատազրկման դատապարտուածներին, իր զօրքերը հեռացնի ինչպէս Հայաստանի ինքնիշխան տարածքներից, այնպէս էլ Արցախի տարածքում 9 Նոյեմբեր 2020–ի դրութեամբ դիրքերին:

Մենք՝ հանրահաւաքի մասնակիցներս, յայտարարում ենք, որ առաջնորդուում ենք հետեւեալ հիմնարար սկզբունքներով.

– հաստատել, որ Հայաստանի Հանրապետութիւնն Արցախի ժողովրդի անվտանգութեան եւ ինքնորոշման իրաւունքի իրացման երաշխաւորն է՝ բոլոր բաղադրիչներով,

– բացառել Արցախի որեւէ կարգավիճակ Ատրպէյճանի կազմում,

– բացառել առանց Հայաստանի հետ յուսալի ցամաքային կապի Արցախի անկլաւային վիճակը,

– քայլեր ձեռնարկել 1994 թ. ԵԱՀԿ գագաթաժողովի որոշմամբ ամրագրուած ձեւաչափով եւ նպատակներով բանակցային գործընթացի վերականգնման ուղղութեամբ,

– բացառել Հայաստանի ինքնիշխանութեան եւ տարածքային ամբողջականութեան հաշուին հաղորդակցութեան ուղիների ապաշրջափակման անուան տակ միջանցքների տրամադրումը,

– Ատրպէյճանի կողմից ուժի կիրառման եւ ուժի կիրառման սպառնալիքի պայմաններում բացառել ցանկացած միջպետական պայմանագրի ստորագրում եւ սահմանազատման ու սահմանագծման ցանկացած գործընթաց,

– չստորագրել Ատրպէյճանի հետ որեւէ պայմանագիր, որը կը խափանի Արցախի ինքնորոշման իրաւունքի՝ առանց սահմանափակումների իրացումը,

– Հայաստան-Թուրքիա յարաբերութիւններում բացառել որեւէ համաձայնութիւն, որը հարցականի տակ կը դնի հայ ժողովրդի հայրենազրկման եւ ցեղասպանութեան իրողութիւնը, ինչպէս նաեւ հայութեան հոգեւոր-մշակութային ժառանգութեան կրողը լինելու իրաւունքը։

Այս սկզբունքները բխում են հայ ժողովրդի կենսական շահերից, ուստի ցանկացած իշխանութիւն պարտաւոր է առաջնորդուել այս օրակարգով եւ ապահովել դրա իրականացումը։ Այս օրակարգի առաջադրումը չի նշանակում պատերազմ, այլ հայ ժողովրդի կենսական շահերի հաշուառմամբ իրական, արդար եւ արժանապատիւ խաղաղութիւն հաստատելու պատրաստակամութիւն։

Ներկայացուած սկզբունքների չիրագործումն անխուսափելիօրէն կը հանգեցնի համաժողովրդական լեգիտիմ հակազդեցութեան բոլոր հնարաւոր միջոցներով եւ եղանակներով։

Սոյն յայտարարութիւնը բաց է ներկայացուած օրակարգը կիսող անհատների, հասարակական կազմակերպութիւնների եւ կուսակցութիւնների համար:

Ազատութեան հրապարակ
5 Ապրիլ 2022թ.”

«Հայաստան Դաշինք»