20 Յունիսին “Հայաստան” դաշինքը յայտարարութիւն հրապարակեց Հայաստանի ներկայ իշխանութիւններուն նկատմամբ. “Այսօր Հայաստանի Հանրապետութեան Բարձրագոյն դատական խորհրդի՝ լիազօրութիւնները կասեցուած նախագահ Ռուբէն Վարդազարեանը հրապարակել է ձայնագրութիւն, որի արժանահաւատութիւնը կասկածի տակ չի դրել կողմերից եւ ոչ մէկը։
Ձայնագրութիւնը պարունակում է յանցանքի ակնյայտ տարրերի, ՍԴ կազմի նկատմամբ ապօրինի միջամտութեան համեմատականներ, քրէական գործերին միջամտութիւնների եւ կոնկրետ պահանջների չկատարման դէպքում սպառնալիքների փաստեր։
Այդ հանգամանքները պէտք է քննութեան առարկայ դառնան այն իրաւապահ մարմինների կողմից, որոնց, փաստացի, ըստ հրապարակուած ձայնագրութեան, պարտադիր կատարման ցուցումներ է կարողանում տալ Բարձրագոյն դատական խորհրդի յայտնի անդամը՝ Գագիկ Ճհանկիրեանը։
Ձայնագրութիւնը նաեւ պարունակում է քաղաքական գործունէութեանը միջամտելու խոստում, եւ դրա հետեւանքները փաստացի արձանագրուած են միջազգային հանրութեան կողմից իբր արդար ու թափանցիկ խորհրդարանական ընտրութիւններով։
Սոյնով «Հայաստան» դաշինքն արձանագրում է․
1. խորհրդարանական վերջին ընտրութիւնների առաջնորդութեան բացակայութիւնը, որը մեր կողմից քանիցս հիմնաւորուել էր, այլեւս հաստատուում է նաեւ դատական համակարգի յստակ կանխակալ տրամադրուածութեան, միջամտութեան անհերքելի փաստով,
2. նման վարքագիծ ու արարքներ թոյլ տուած բարձրաստիճան պաշտօնեայ Գագիկ Ճհանգիրեանն այլեւս չի կարող պաշտօնավարել,
3. ակնյայտ է, որ Հայաստանում առկայ է մէկ մարդու բռնապետութիւն, որով պայմանաւորուած է իրաւապահ համակարգի համակարգային կախուածութիւնն ու քաղաքականացումը։
Ստեղծուած իրավիճակից միակ ելքը օրուայ իշխանութիւնների անյապաղ հեռացումն է”։