Կեռասը հանրածանօթ միրգ եղած է տասը հազարամեակ առաջ: Ան հարուստ  է կենսանիւթերով, քարօթինով եւ երկաթով: Աւանդական բժշկութիւնը խորհուրդ կու տայ բուժման նպատակով օգտագործել կեռասենիի պտուղները աղիստամոքսային հիւանդութիւններու, արեան տկարութեան, իսկ տերեւներն ու ծաղիկները՝ պաղառութեան պարագաներու: Ժողովրդական բժշկութեան մէջ կ’օգտագործուին կեռասենիի պտուղները, պտղակոթերը, տերեւը, բողբոջը, ծաղիկները եւ արմատը:

Սննդագէտներ կը թելադրեն կեռասը ներառնել մանուկներու սնունդին մէջ:

Կեռասը ունի միզամուղ յատկութիւն, որուն շնորհիւ կը թեթեւցէ մարմնին վիճակը ուռուցքներու պարագային: Կեռասի պտուղները եւ հիւթը կը կանոնաւորեն երիկամներու եւ լեարդի աշխատանքը, օգտակար են յօդացաւէ կամ ռոմաթիզմէ տառապողներուն: Կեռասենիի մութ կարմիր պտուղները յատկապէս կը նպաստեն արիւնատար երակներու պատերու ամրացումին:

Ամերիկացի հոգեբաններու ուսումնասիրութիւնները կը վկայեն նաեւ, որ կեռասի սիրահարները ունին հանգիստ եւ բարի բնաւորութիւն, անոնք անկեղծ են իրենց զգացումներուն մէջ եւ ընդունակ՝ զոհաբերութիւններու:

Գիտնականները  հաստատած են, որ եթէ մարդ ամէն օր՝ առաւօտեան եւ երեկոյեան, ուտէ քանի մը հատիկ կեռաս (թարմ կամ պահածոյ), անոր մօտ զգալիօրէն կը նուազի սրտի հիւանդութիւններու վտանգը:  A կենսանիւթի բարձր պարունակութեան շնորհիւ, կեռասը օգտակար է նաեւ մաշկին: Ան կը պաշտպանէ մաշկը յատկապէս ամրան կիզիչ արեւուն վնասակար ճառագայթներէն:

300 կրամ հաւու խաշուած կրծքամիս

300 կրամ եգիպտացորեն

300 կրամ սունկ

50 կրամ մանր կտրտուած ընկոյզ

2 պճեղ սխտոր

Աղ, կարմիր եւ սեւ պղպեղ

Թթուասեր եւ մայոնեզ

Հաւու խաշուած կրծքամիսը փետտել եւ տեղադրել խորունկ ամանի մը մէջ: Աւելցնել խաշուած եգիպտացորենի հատիկները, ապա սունկը՝ խաշուած կամ քիչ մը ձիթաիւղին մէջ թմրեցուած: Աւելցնել մանրուած ընկոյզը, ճզմուած երկու պճեղ սխտորը, աղը, կարմիր եւ սեւ փոշի պղպեղը եւ վերջապէս թթուասերն ու մայոնեզը: Խառնել եւ հիւրասիրել:

200 կրամ գիւղապանիր (գունդ-գունդ պահուող տեսակէն, արաբական արիշէ),  կամ կաթի թարմ սեր

50 կրամ հնդկընկոյզի տաշուք (40 կրամը ռաֆայելլոյին մէջ, 10 կրամը թաթխելու համար)

3 ճաշի դգալ մեղր

100 կրամ նուշ

Պանիրին կամ սերին վրայ աւելցնել մեղրն ու հնդկընկոյզին 40 կրամը, շաղել, փոքր գունդերու վերածել, իւրաքանչիւրին մէջ դնել մէկ նուշի հատիկ ու կլորել: Ապա թաթխել մէկ կողմ դրուած հնդկընկոյզին մէջ ու տեղադրել յատուկ ափսէի մը մէջ: Պահել սառնարանը: Այս քաղցրեղէնը սննդարար է: