Սննդագէտներ կը թելադրեն ձմրան եղանակին օգտագործել ածխաջրերով հարուստ ուտեստեղէն, նախապատուութիւնը տալով ոչ թէ շաքարաւազով պատրաստուած քաղցրեղէնին ու խմորեղէնին, այլ՝ հացահատիկներով պատրաստուած ուտեստին, որ աւելի առողջապահական է:

Ցուրտ ամիսներուն, երբ հիւանդանալու վտանգը աւելի մեծ է, օրկանիզմի դիմադրողականութեան բարձրացման համար անհրաժեշտ են սպիտակուցներն ու կենսանիւթերը՝ C կենսանիւթ, A կենսանիւթ, ֆոլաթթու եւ այլն:

C կենսանիւթի լաւագոյն աղբիւրը կը համարուին պղպեղը, կանաչեղէնը, կաղամբը, նարինջը, մանտարինը, արքայանարինջը, խնձորը, պրոքոլին եւ կոճապղպեղը: Կարելի է օգտագործել նաեւ թթուաշներ, որոնք թաղանթանիւթ կը պարունակեն ու  մարսողութեան կ’օգնեն:

Ցուրտ օրերուն առատօրէն կարելի է օգտագործել բանջարեղէնով կամ ոսպի ու սունկի տեսակներով ապուրներ, առանց իւղ աւելցնելու անոնց, այլ իւղը փոխարինելով ձիթաիւղով կամ մէկ ապուրի դգալ կարագով:

Թէյի տեսակները կարելի է օգտագործել օրական քանի մը անգամ, սակայն շաքարաւազին փոխարէն թէյին մաքուր

մեղր աւելցնել, կամ թէյին հետ արմաւ կամ տուրմ ուտել: Անհրաժեշտ է ճերմակ շաքարաւազի օգտագործումը նուազագոյնի իջեցնել եւ զայն փոխարինել առողջապահական քաղցրեղէնով:

Սննդագէտներ խորհուրդ կու տան թէյը կամ սուրճը օգտագործել ուտելէն մէկ ժամ առաջ կամ կէս ժամ վերջ, որպէսզի անոնց պարունակող քաֆէինը սնունդի ներծծման արգելք չհանդիսանայ:

Ձմրան հարկ է առատօրէն օգտագործել նաեւ արմատաւոր բանջարեղէն, ինչպէս՝ ճակընդեղ, ստեպղին, կանաչ սոխ, կանաչ սխտոր, շագանակ եւ այլն:

Առողջապահական քաղցրաւենի մը պատրաստելու եւ ձեր ընտանիքի անդամներուն սննդարար պատառիկներ հրամցնելու համար եկէ՛ք միասնաբար պատրաստենք պիստակեղէնով արմաւ՝ ձեր նախընտրած պիստակեղէնը օգտագործելով.

4 ապուրի դգալ մանրուած նուշ

4  ապուրի դգալ մանրուած գետնանոյշ (Ապիտ)

4 ապուրի դգալ  կնճիթ (շուշմայ)

4 ապուրի դգալ ընկոյզ

0,5 քիլօ շաղուած արմաւ

Պիստակեղէնի խառնուրդը մանրելու համար զայն ծածկել թափանցիկ թուղթով մը եւ քլանով լայնքին ճնշելով տրորել, որպէսզի միջակ մեծութեամբ կտորներու վերածուի:

Տապակի մը մէջ 2 ապուրի դգալ իւղ կամ կարագ դնել եւ ցած կրակի վրայ հալեցնել, ապա պիստակեղէնը աւելցնել ու խարկել, մինչեւ որ ոսկեգոյն դառնայ:

Աւելցնել շաղուած արմաւը եւ շարունակ խառնել պիստակեղէնին եւ իւղին  հետ մինչեւ որ միատարր զանգուածի վերածուի:

Ապա տապակէն դուրս բերել, շաղել եւ 15-20 սմ. լայնքով երկու կամ երեք երկար շերտերու վերածել, որպէսզի իւրաքանչիւր բաժին կարելի ըլլայ սահուն զանգուածի մը վերածել: Ապա իւրաքանչիւրին վրայ ցանել մանրուած ընկոյզ, կասիա եւ շուշմայ:

Կլոր հաւասար շերտերով կտրտրել զանոնք եւ հիւրասիրել:

Բարի ախորժակ: