Urolog.am-ի ներկայացուցած մէկ ուսումնասիրութեան համաձայն, կեանքի առաջին տարին, հօր դերը շատ կարեւոր է մանուկի ֆիզիքական զարգացման եւ հիմնական հմտութիւններու ձեւաւորման մէջ: Որպէս կանոն, հօր եւ մանկան խաղերը կը տարբերին մանուկը զուարճացնելու մօր հնարքներէն։ Հայրերը աւելի հակում ունին ֆիզիքական աշխոյժ խաղերու: Անոնք չեն վախնար մանուկներու իյնալէն, կը սորվեցնեն լողալ, կը նստեցնեն իրենց ուսերուն  եւ այլն: Այս բոլորը կը խթանեն մանուկին ֆիզիքական աշխուժութիւնը:

Հայրը կրնայ նաեւ մեծ ներդրում ունենալ մանուկի մտածողութեան զարգացման մէջ: Կարծիք կայ, որ հայրերը կրնան իրենց մանուկներուն սորվեցնել աւելի արագ եւ աւելի ճիշդ խօսիլ, քան մայրերն ու մեծմայրերը, որովհետեւ հայրերը, ի տարբերութիւն մայրերուն, չեն աղաւաղեր բառերը: Որպէս կանոն, տղամարդիկ աւելի լաւ կը սորվեցնեն մանուկներուն մտածողութեան առնչուող տարբեր խաղեր: Հօր հետ շփումը կ’ընդլայնէ մանուկին մտահորիզոնը, կը նպաստէ հետաքրքրութիւններու բազմազանութեան:

Հօր կերպարը կարեւոր է մայր-երեխայ կառուցողական յարաբերութիւններու հաստատման համար նաեւ: Երեխայի զարգացման որոշակի փուլին, ներդաշնակ յարաբերութիւններ ունեցող ընտանիքին մէջ (սովորաբար մէկ տարի անց), հայրը կ’օգնէ մանուկին «առանց ցնցումներու առանձնանալ» մօրմէն եւ հեռաւորութիւն պահել անկէ, անկախանալ: Որոշ հոգեբաններ նոյնիսկ հայրերուն կը թելադրեն մասնակցիլ մանուկին համար կարեւոր համարուող առիթներուն, ինչպէս՝ «առանձին ննջարան տեղափոխուիլը» կամ մանկապարտէզ յաճախելը: Մէկ խօսքով, հայրը մանուկին «ուղեցոյցն» է դէպի արտաքին աշխարհ, որուն շնորհիւ մանուկը ինքզինք աւելի ապահով կը զգայ:

Հայրը մանուկին կը սորվեցնէ հմտութեամբ ընկալել ընկերային տարբեր երեւոյթներ, կը բացատրէ, թէ ի՛նչ կը նշանակէ հեղինակութիւն եւ այլն: Ի տարբերութիւն մօր, որ կը սիրէ մանուկը պարզապէս այն պատճառով, որ ան իր զաւակն է, հայրը սովորաբար մանուկէն կ’ունենայ ակնկալութիւններ, զորս ան պէտք է կատարէ:

Կարեւոր է նաեւ հօր դերը մանուկի սեռական ինքնահաստատման մէջ: Տղաները, նայելով իրենց հօր, կը ստեղծեն վարքի որոշ ձեւ մը, որուն կը սկսին հետեւիլ հետագային: Աղջիկները հօր գուրգուրանքը տեսնելով կ’ըմբռնեն, որ իրենք նուրբ սեռի ներկայացուցիչ են ու հօր թիկունքը իրենց պաշտպան է միշտ:

Հետեւաբար հայրը մանուկին կու տայ այն, ինչ որ մայրը չի կրնար տալ: Այլ խօսքով՝ ծնողները տարբեր են՝ մէկը միւսը լրացնող:

———————————-

ԳԵՂՕՆ ՍՕՍԵԱՑ ԱՆՏԱՌԻՆ