-Սուրիոյ  պասքեթի Բ. դասակարգի ախոյեանութեան աւարտական քառեակի մրցումներուն, ՀՄԸՄ-ի կազմը  Դամասկոսի մէջ 73 – 92 արդիւնքով յաջողեցաւ պարտութեան մատնել հիւրընկալ Ֆէյհա խումբը:

-Սուրիոյ ֆութպոլի Ա. դասակարգի ախոյեանութեան մրցումներուն, Հալէպի Ահլին 3 – 0 արդիւնքով պարտութեան մատնուեցաւ աղիւսակին առաջին դիրքը գրաւող Ֆըթուէի խումբէն, ինչպէս նաեւ Հուրիէն 1 – 0 արդիւնքով զիջեցաւ Թալիաաին։ Նոյն արդիւնքով Հըթթինը յաղթեց Ճէյշին, իսկ Թըշրինը՝ Ուասպէին:

Կիրակի օր Անգլիոյ Փրեմիէր Լիկի առաջնութեան 27-րդ փուլի մրցումներուն, ախոյեան  Մանչեսթըր Սիթին իր  տան մէջ  մրցում մը ունեցաւ Մանչեսթըր Իւնայթըտի հետ: Հանդիպումը իր աւարտին հասաւ 3 – 1 արդիւնքով՝ ի նպաստ Սիթիին: 8-րդ վայրկեանին, հանդիպման հաշիւը բացուած յայտարարեց Իւնայթըտի անգլիացի յարձակող Մարկոս Ռաշֆորտթը։ Քաթալոնէացի Խոսէփ Կուարտիոլայի գլխաւորած խումբը առաւելութեան հասաւ շնորհիւ անգլիացի կիսապաշտպան Ֆիլ Ֆոտէնի եւ նորվեկիացի յարձակող Էրլինկ Հալանտի կոլերուն: Աղիւսակի առաջին դիրքը գրաւող  Լիվըրփուլը  հիւրընկալեց Նոթինկհեմ Ֆորեսթը: Գերմանացի Եորկէն Կլոպի գլխաւորած կազմը դժուարութեամբ կրցաւ յաղթել՝ 1 – 0 արդիւնքով: Խումբին միակ կոլը նշանակեց նորվեկիացի յարձակող Տարուին Նունիէզին՝ յաւելեալ 9-րդ վայրկեանին:  63 կէտով մրցաշարքի աղիւսակը գլխաւորեց Լիվըրփուլը, որուն մէկ կէտի տարբերութեամբ յաջորդեց Սիթին:

Լոս Անճելըս Լէյքըրզի Պասքեթպոլիստ Լեպրոն Ճէյմս Տենվէր  ակումբին դէմ խաղին յաջողեցաւ նշանակել  26 կէտ։ Ըստ kommersant.ru-ին Ճէյմս այս արդիւնքով իր մարզական կեանքի ընթացքին  անցաւ 40 հազար կէտի սահմանը:

Պասքեթի ազգային մրցանակի (NBA) պատմութեան մէջ նախապէս  ոչ մէկ խաղացող կրցած է արձանագրել այս արդիւնքը:

39-ամեայ Լեպրոն Ճէյմս ընդհանուր առմամբ ունի 40.017 կէտ:

Ճէյմս NBA-ի քառակի ախոյեան է (2012, 2013, 2016, 2020): Ան չորս անգամ հռչակուած է  կանոնաւոր առաջնութեան եւ փլէյ-օֆֆի շարքի ամենաթանկարժէք խաղացողը:  ԱՄՆ-ի հաւաքականի կազմին մարզիկը յաղթած է 2008 եւ 2012 թուականներու Ողոմպիական խաղերուն։